Milli Məclisin Elm və təhsil komitəsinin iclasında bir sıra qanun layihələri müzakirəyə çıxarılıb

Bakı:

23 °C

94 %

3 m/s

AZ RU EN

Ana səhifə / Siyasət / Milli Məclisin Elm və təhsil komitəsinin iclasında bir sıra qanun layihələri müzakirəyə çıxarılıb

Milli Məclisin Elm və təhsil komitəsinin iclasında bir sıra qanun layihələri müzakirəyə çıxarılıb

03.05.2018 [09:46]

Mayın 2-də Milli Məclisin Elm və təhsil komitəsinin iclası keçirilib.
AZƏRTAC xəbər verir ki, komitə sədri İsa Həbibbəyli qanunvericilik təşəbbüsü qaydasında dövlətimizin başçısı tərəfindən bir sıra qanunlara dəyişikliklərin edilməsi ilə bağlı parlamentə sənədlərin daxil olduğunu bildirib. Qanunlara təklif olunan dəyişikliklər 2017-ci il 14 aprel tarixində qəbul edilmiş “Məktəbəqədər təhsil haqqında” Qanuna uyğunlaşdırmaq məqsədi daşıyır.
Məlumat verilib ki, Əmək Məcəlləsinin 118-ci maddəsində göstərilən əmək məzuniyyətinin 42 təqvim günü müddətinə verilən işçilər siyahısına təklif olunan dəyişikliyə əsasən, bu hal uşaq evlərinin, məktəbəqədər təhsil müəssisələrinin rəhbər işçilərinə, tərbiyəçilərinə, tərbiyəçi-müəllimlərinə, metodistlərə, defektoloqlara, loqopedlərə, musiqi rəhbərlərinə, psixoloqlara aid edilir. Bu düzəliş, eyni zamanda, bu sahədə çalışan və siyahıya əlavə edilən digər işçilərin də hüquqlarının müdafiəsinə xidmət edir.
Bildirilib ki, “Təhsil haqqında” qanunun 14.5.1-ci maddəsində “xüsusi uşaq bağçası” sözləri “və “Məktəbəqədər təhsil haqqında” Qanuna uyğun olaraq, digər məktəbəqədər təhsil müəssisələri” sözləri ilə əvəz edilir. 18.3-cü maddədə edilən düzəlişə görə, ölkədə məktəbəqədər təhsil üç yaşdan başlayaraq deyil, 1-6 yaşlı uşaqları əhatə edir. Qanuna əlavə edilən 18.7-ci maddədə isə deyilir ki, məktəbəqədər təhsilin hüquqi, iqtisadi və təşkilati əsasları bu Qanun və “Məktəbəqədər təhsil haqqında” sənədlə tənzimlənir.
Diqqətə çatdırılıb ki, bir sıra qanunlarda vaxtilə istifadə edilmiş terminlərin “Məktəbəqədər təhsil haqqında” Qanunda istifadə olunan terminlərə uyğunlaşdırılması nəzərdə tutulur. Belə ki, “Penitensiar müəssisələrdə cəza çəkməkdən azad edilmiş şəxslərin sosial adaptasiyası haqqında” Qanunun 13-cü maddəsində “orta peşə-ixtisas və texniki peşə təhsili” sözləri “ilk peşə-ixtisas təhsili və əlavə təhsil” sözləri ilə, “tərbiyə” sözü “təhsil” sözü ilə əvəz edilir. Həmçinin “Yanğın təhlükəsizliyi haqqında” Qanunda “məktəbəqədər tərbiyə müəssisələri”, “ümumtəhsil məktəbləri” terminləri “məktəbəqədər və ümumi təhsil müəssisələri” termini ilə əvəz olunur.
Qeyd olunub ki, “Məktəbəqədər təhsil haqqında” Qanunun qəbulu ilə əlaqədar “Dövlət qulluğu haqqında” və “Sanitariya-epidemioloji salamatlıq haqqında” qanunlara da bəzi texniki dəyişikliklər edilib.
İclasda çıxış edən komitə üzvləri Bəxtiyar Əliyev, Asim Mollazadə, Sona Əliyeva, Gövhər Baxşəliyeva, Kamilə Əliyeva, Elşad Həsənov təklif olunan dəyişikliklərin zamanın tələbi baxımından əhəmiyyətli olduğunu, təhsilin inkişafına xidmət edəcəyini söyləyiblər. Fikir mübadiləsi zamanı deputatların səsləndirdikləri bəzi suallara komitə sədri tərəfindən aydınlıq gətirilib.
Müzakirələrin sonunda qanun layihələri baxılmaq üçün Milli Məclisin plenar iclasına tövsiyə edilib.
Sonra İsa Həbibbəyli diqqətə çatdırıb ki, “Ümumi təhsil haqqında” yeni qanun layihəsinin hazırlanması nəzərdə tutulub. Bununla bağlı işçi qrupunun yaradılması planlaşdırılır.

Paylaş:

Baxılıb: 708 dəfə