Xalq Yaradıcılığı Paytaxtları elan olundu

Bakı:

26 °C

68 %

3 m/s

Əlaqə

AZ RU EN

Ana səhifə / Siyasət / Xalq Yaradıcılığı Paytaxtları elan olundu

Xalq Yaradıcılığı Paytaxtları elan olundu

25.02.2010 [09:39]

Əbülfəs Qarayev: Azərbaycanda mədəniyyət sahəsində həyata keçirilən proqramlar beynəlxalq təşkilatların diqqət mərkəzindədir
Dünən Mədəniyyət və Turizm Nazirliyi tərəfindən hazırlanan “2010-2014-cü illər üçün Xalq Yaradıcılığı Paytaxtları” proqramının icrası istiqamətində görülmüş işlər haqqında mətbuat konfransı keçirilib. Konfransda çıxış edən mədəniyyət və turizm naziri Əbülfəs Qarayev əvvəlcə son 3-4 il ərzində mədəniyyət sahəsində əldə olunan uğurlardan danışıb. Nazir Azərbaycan mədəniyyətinin, qeyri-maddi mədəni irs nümunələrinin beynəlxalq aləmdə təbliği işində Heydər Əliyev Fondunun fəaliyyətini alqışlayıb, qurumun mədəniyyətimizə bəxş etdiyi töhfələri əvəzsiz sayıb.
Sonra o, “Bakı İslam Mədəniyyətinin Paytaxtı-2009” ili çərçivəsində təşkil olunan yüksək səviyyəli tədbirlərdən söhbət açıb. Bu beynəlxalq layihəni Azərbaycan xalqının, mədəniyyətinin uğuru kimi qiymətləndirib: “Bakı İslam Mədəniyyətinin Paytaxtı-2009” ili çərçivəsində keçirilən tədbirlər şəhərin görkəmindən tutmuş, mədəniyyət ocaqlarında gedən islahatlaradək və ən əsası şəhər sakinlərinin təfəkkürünə, mənəviyyatına müsbət təsir göstərdi. 2018-ci ildə isə Naxçıvan-İslam Mədəniyyətinin Paytaxtı elan olunb. Bu, ölkəmiz üçün böyük uğurdur”.
Daha sonra nazir diqqətə çatdırıb ki, “2010-2014-cü illər üçün Xalq Yaradıcılığı Paytaxtları” proqramına əsasən, 2010-cu ildə Gəncə-Azərbaycanın əfsanələr paytaxtı, Qazax - folklor paytaxtı, Şəki isə sənətkarlıq paytaxtı elan olunub. Nazirin sözlərinə görə, sözügedən proqram Azərbaycanın qeyri-maddi mədəni irsinin qorunması və dəstəklənməsi istiqamətində aparılan islahatların bir hissəsidir. Ə.Qarayev deyib ki, hazırda Azərbaycanın qeyri-maddi mədəni irs konsepsiyası, qeyri-maddi mədəni abidələrin İnventar Pasportlaşdırılması, həmçinin, Muğam-tur, Aşıq-tur, Xalça-tur, Novruz-tur beynəlxalq mədəni-turizm marşrutlarının yaradılması istiqamətində işlər aparılır. Bundan başqa, Azərbaycanın qeyri-maddi irs subyektlərinin informasiya bankı, bu sahəyə həsr olunan intangible.az ünvanlı veb-portalın yaradılması və digər konseptual proqramların icrası da diqqət mərkəzindədir.
Proqramın hazırlığına ötən ilin noyabrından başlandığını söyləyən mədəniyyət və turizm naziri 2010-cu il ərzində Gəncə şəhərində milli mərasim, adət-ənənələr, şifahi xalq yaradıcılığı və milli oyunlar, Qazax şəhərində xalq musiqisi, rəqsləri və teatrı, Şəki şəhərində isə xalq tətbiqi sənəti, ənənəvi dekorativ sənəti və milli təsviri ənənələri ilə bağlı silsilə tədbirlərin keçirilməsinin daxil olduğu xüsusi tədbirlər planının təsdiq olunduğunu diqqətə çatdırıb.
TURANƏ

Paylaş:

Baxılıb: 1325 dəfə