Ölkədə mövcud olan sabitliyi qoruyub saxlamaq üçün vətəndaşlıq mövqeyi nümayiş etdirilməlidir

Bakı:

26 °C

53 %

1 m/s

Əlaqə

AZ RU EN

Ana səhifə / Siyasət / Ölkədə mövcud olan sabitliyi qoruyub saxlamaq üçün vətəndaşlıq mövqeyi nümayiş etdirilməlidir

Ölkədə mövcud olan sabitliyi qoruyub saxlamaq üçün vətəndaşlıq mövqeyi nümayiş etdirilməlidir

18.07.2020 [01:21]

Ekspertlər bildirirlər ki, orduya dəstək aksiyasından pozuculuq fəaliyyəti üçün sui-istifadə yolverilməzdir və təxribatçılar qanun qarşısında cavab verməlidirlər

Məlum olduğu kimi, iyul ayının 12-dən başlayaraq Ermənistan-Azərbaycan dövlət sərhədinin Tovuz rayonu istiqamətində Ermənistan silahlı qüvvələri təxribat törədib. Buna baxmayaraq, Azərbaycan Ordusu düşmənə layiqli cavab verib. Öz növbəsində, Azərbaycan xalqı ölkənin hər yerində birlik və həmrəylik nümayiş etdirib. İyulun 14-dən 15-ə keçən gecə Azərbaycan Ordusuna dəstək məqsədilə paytaxtda keçirilmiş aksiya da cəmiyyətimizdə vətənpərvəlik ruhunun yüksək olduğunun daha bir nümunəsi idi. Lakin aksiyanın sonunda bir qrup şəxs tərəfindən yaradılmış şəraitdən sui-istifadə halları və vəziyyəti nəzarətdən çıxarmaq cəhdləri baş verib. Bu isə cəmiyyətimizdə haqlı etirazla qarşılanıb. Ümumi qənaət belədir ki, sərhəddə hərbi əməliyyatlar getdiyi bir vaxtda bir qrup şəxsin Milli Məclisin binasına girərək vandallıq törətməsi, polislərə qarşı güc tətbiqi və Bakının küçələrində iğtişaş yaratmaq cəhdləri vətəndaşlıq mövqeyinə, qanunlara ziddir və şəhidlərin ruhuna hörmətsizlikdir.

Məsələyə münasibət bildirən Milli Məclisin deputatı Könül Nurullayeva deyib ki, aksiya iştirakçılarının vətənpərvərliyi, onların səfərbərlik elan olunması istəyi, ordu sıralarında qulluq etmək niyyəti həqiqətən də qürurverici haldır: “Azərbaycan cəmiyyətində vətənpərvərlik əhval-ruhiyyəsi hər zaman yüksək olub. Təbii ki, orduya dəstək hər bir vətəndaşın borcudur və bu məqsədlə müxtəlif tədbirlərin, aksiyaların keçirilməsi də təbii haldır. Təəssüf ki, bütün bunların fonunda gecə saatlarında yaradılmış şəraitdən sui-istifadə halları da müşahidə edilib”.

Deputatın sözlərinə görə, məqsədli şəkildə prosesə siyasi məzmun verməyə və pozuculuq fəaliyyətinə cəhdlər yolverilməzdir: “Hazırda sərhəddə hərbi əməliyyatlar getdiyi bir vaxtda paytaxtda iğtişaş yaratmaq cəhdləri, bir qrup şəxsin Milli Məclisin binasına zorla girərək vandallıq törətməsi, polislərə qarşı zor tətbiq olunması, ilk növbədə, vətəndaşlıq mövqeyinə və qanunlara ziddir”.

K.Nurullayeva onu da bildirib ki, belə həssas dövrdə istənilən pozuculuq fəaliyyətinə qarşı öz vətəndaş mövqeyimizi ortaya qoymalıyıq. Buna görə də istər pandemiya ilə mübarizədə, istərsə də cəbhədə düşmənə qarşı milli birlik, həmrəylik nümayiş etdirməliyik: “Hər birimiz sabitliyi qoruyub saxlamaq üçün bütün səylərimizi səfərbər etməliyik”.

“Xalq Cəbhəsi” qəzetinin baş redaktoru Elçin Mirzəbəyli isə deyib ki, orduya dəstək aksiyasını iğtişaşa çevirmək istəyən, Milli Məclisin binasına girərək vandallıq törədən, polislərə güc tətbiq edən və təhrikçi çağırışlar səsləndirənlərlə sosial şəbəkələrdəki təxribat qrupları istisnasız olaraq sinxron hərəkət edirdilər: “Təbii ki, kobud qanun pozuntularına yol verənlərin arasında təxribatçı qrupların yaratdıqları neqativ emosiyaların təsir altına düşənlər də yox deyildi. Sırf onlara münasibətdə deyirəm: Qəhrəman əsgər və zabitlərimizin Vətənimizin sərhədlərini qorumaq üçün ölüm-dirim savaşına atıldıqları bir zamanda təxribatlara uyaraq, milli birliyimizi, həmrəyliyimizi nümayiş etdirən aksiyaların mahiyyətini dəyişməyə, onu iğtişaşa, qarşıdurmaya çevirməyə cəhd göstərənlərin fitnəsinə uymaq vətəndaşlıq mövqeyinə, qanunlara ziddir, ən əsası isə şəhidlərin ruhuna hörmətsizlikdir”.

Ekspert onu da bildirib ki, təxribatçılarla qanunun ən sərt üzü ilə danışmaq lazımdır: “Vətənpərvərlik aksiyasını iğtişaşa çevirmək cəhdi, aksiya iştirakçılarının təhlükəsizliyini qoruyan və onlarla ilə birlikdə orduya dəstək verən polis əməkdaşlarına qarşı güc tətbiq etmək, dövlət müstəqilliyimizin bərpası ilə bağlı Konstitusiya Aktının qəbul olunduğu parlament binasında vandalizmə yol vermək özbaşınalığın, mənəviyyatsızlığın ən son həddidir və heç bir halda bağışlanmamalıdır”.

Qaşqay ZİYƏDDİNOĞLU

Paylaş:

Baxılıb: 431 dəfə