Azərbaycan dövləti hər zaman öz vətəndaşlarının yanındadır

Bakı:

25 °C

54 %

1 m/s

Əlaqə

AZ RU EN

Ana səhifə / Siyasət / Azərbaycan dövləti hər zaman öz vətəndaşlarının yanındadır

Azərbaycan dövləti hər zaman öz vətəndaşlarının yanındadır

23.07.2020 [09:26]

Ekspertlərin fikrincə, Tovuz rayonunun yaşayış məntəqələrində bərpa işlərinin aparılmasına dair dövlətimizin başçısının müvafiq Sərəncamı bu reallığın daha bir bariz nümunəsidir
Məlum olduğu kimi, Ermənistan silahlı qüvvələri iyul ayının 12-dən başlayaraq Ermənistan-Azərbaycan dövlət sərhədinin Tovuz rayonu istiqamətində təxribatlar törədib və layiqli cavablarını alıblar. Lakin bu təxribat zamanı təkcə Azərbaycan Ordusunun mövqeləri deyil, rayonun yaşayış məntəqələri də hədəfə alınıb. Belə ki, erməni silahlı qüvvələrinin qəsdən iriçaplı silahlardan və ağır artilleriya qurğularından Tovuz rayonunun bir neçə kəndini intensiv atəşə tutması nəticəsində mülki əhaliyə, dövlət əmlakına və infrastruktur obyektlərinə ciddi ziyan dəyib. Qeyd edək ki, Tovuz rayonuna dəymiş ziyanın aradan qaldırılması məqsədilə iyul ayının 20-də Prezident İlham Əliyev “Azərbaycan Respublikasının Tovuz rayonunu Ermənistan Respublikası Silahlı Qüvvələrinin intensiv atəşə tutması nəticəsində mülki əhaliyə, dövlət əmlakına, o cümlədən infrastruktur obyektlərinə dəymiş ziyanın aradan qaldırılması ilə bağlı tədbirlər haqqında” Sərəncam imzalayıb. Ekspertlərin fikrincə, dövlət başçısının imzaladığı müvafiq Sərəncam əhalinin hərtərəfli diqqət və qayğısı ilə əhatə edilməsinin, dövlətin hər zaman vətəndaşların yanında olmasının növbəti göstəricisidir.
Məsələyə münasibət bildirən Milli Məclisin deputatı Arzu Nağıyev deyib ki, dövlət başçısının imzaladığı Sərəncam bir daha göstərdi ki, dövlət istənilən vaxt öz vətəndaşının yanındadır: “Məlum olduğu kimi, ermənilərin təxribatı nəticəsində Tovuzun 6 kəndində təxminən 35 evə və digər infrastruktura ciddi ziyan dəyib. Düşünürəm ki, bəhs olunan Sərəncam dəymiş zərərin aradan qaldırılması üçün çox mühüm əhəmiyyətə malikdir. Bir məqamı da xüsusi vurğulayım ki, Birinci vitse-prezident Mehriban xanım Əliyevanın tapşırığı ilə Tovuz döyüşlərində şəhid olan 12 hərbçinin ailə üzvlərinin bütün qayğıları daim Heydər Əliyev Fondunun nəzarətində olacaq”.
A.Nağıyev onu qeyd edib ki, hazırda Tovuz rayonunun, xüsusən də atəş altında olan ərazilərin sakinləri öz gündəlik həyat tərzlərini davam etdirirlər: “Azərbaycan Ordusu tam şəkildə əraziyə nəzarət edir. Əhali arasında heç bir təşviş və gərginlik yoxdur. Çünki vətəndaşlar öz ordusuna güvənirlər. Rayonun Ağdam, Dondar Quşçu və digər sərhəd kəndlərdə dinc quruculuq işləri davam etdirilir”.
Milli Məclisin deputatı Ceyhun Məmmədov isə deyib ki, Ermənistan tərəfi həmişə olduğu kimi, beynəlxalq hüququn bütün norma və prinsiplərini pozaraq mülki əhaliyə qarşı cinayət törədib: “Bildiyiniz kimi, erməni hərbi qüvvələri Tovuzda mülki əhaliyə də atəş açıb. Əsgər və zabitlərimizlə yanaşı, 1 nəfər mülki şəxs həlak olub. Ermənistanın təcavüzkar davranışlarının qarşısını almaq üçün bu cinayət əməlləri beynəlxalq qurumlar tərəfindən qətiyyətlə pislənilməlidir”.
C.Məmmədov onu da xatırladıb ki, Ermənistan birinci dəfə deyil ki, bu kimi vandalizm əməlləri törədir: “2016-cı ilin Aprel döyüşləri zamanı da ermənilər mülki şəxsləri qətlə yetirmiş, yaşayış məntəqələrinə xeyli ziyan vurmuşdular. Həmin vaxt dövlət başçısı İlham Əliyevin müvafiq Sərəncamı ilə bütün tikinti, təmir və bərpa işləri dövlət tərəfindən aparıldı. Bu dəfə də dövlət vətəndaşa diqqət və qayğı göstərmək kimi özünün ali vəzifəsini yerinə yetirir. Prezident İlham Əliyevin məlum Sərəncamı da əhalinin dövlətin diqqət və qayğısı ilə əhatə olunmasının növbəti göstəricisidir”.
“Deputat həmkarlarımızla Tovuza səfərimiz zamanı bir daha dövlətin öz vətəndaşının yanında olduğunun şahidi olduq. Artıq dövlət başçısının məlum Sərəncamının icrası ilə əlaqədar yaradılan İşçi Qrup rayonun atəşə məruz qalmış kəndlərində ekspertiza və qiymətləndirmə işləri aparır. Yekunda müvafiq qərarlar qəbul ediləcək, təmir və bərpa işlərinə başlanılacaq”, - deyə C.Məmmədov bildirib.
Qaşqay ZİYƏDDİNOĞLU

Paylaş:

Baxılıb: 389 dəfə