Türkdilli ölkələr arasında əməkdaşlığın daha da inkişaf etdirilməsi tarixi zərurətdən irəli gəlir

Bakı:

26 °C

53 %

1 m/s

AZ RU EN

Ana səhifə / Siyasət / Türkdilli ölkələr arasında əməkdaşlığın daha da inkişaf etdirilməsi tarixi zərurətdən irəli gəlir

Türkdilli ölkələr arasında əməkdaşlığın daha da inkişaf etdirilməsi tarixi zərurətdən irəli gəlir

16.09.2020 [09:31]

Azərbaycan türkdilli ölkələr arasında siyasi, iqtisadi, mədəni sahələrdə əlaqələrin inkişafına mühüm töhfələr verir
Türkdilli ölkələr arasında inteqrasiyanın daha da gücləndirilməsi, əməkdaşlığın genişləndirilməsi istər regional, istərsə də qlobal miqyasda mühüm proseslərdən biridir. Vurğulamaq lazımdır ki, ölkəmizin hazırda sədri olduğu Türkdilli Dövlətlərin Əməkdaşlıq Şurasının fəaliyyətinin əsas məqsədi də türkdilli ölkələr arasında hərtərəfli əməkdaşlığa yardım etməkdir. Türkdilli dövlətlər ticarət əlaqələri və investisiyalar üçün əlverişli şəraitin yaradılması, hərtərəfli və balanslaşdırılmış iqtisadi yüksəlişə, sosial və mədəni inkişafa səy göstərilməsi, elm, texnologiyalar, təhsil və mədəniyyət sahəsində qarşılıqlı əlaqələrin genişləndirilməsi, KİV arasında əlaqələrin, eləcə də daha geniş miqyasda informasiya mübadiləsinin təşviq edilməsi və hüquqi məlumatların mübadiləsinin, hüquq sahəsində əməkdaşlığın genişləndirilməsi istiqamətində yaxın əməkdaşlığa malik olsalar da, bu əməkadaşlıq platformasının daha da genişləndirilməsi aktual çağırışlardan biri kimi mühüm əhəmiyyətə malikdir.
Yeri gəlmişkən, Türkiyənin məşhur “Türkiyə” qəzetində dərc olunmuş Məryəm Aybikə Sinanın “Türk Dünyası Nazirliyi” sərlövhəli məqaləsi də türkdilli dövlətlər arasındakı əlaqələrin daha da intensivləşdirilməsinə həsr olunub. Türk birliyinin tarixi zərurətdən irəli gəldiyini vurğulayan müəllif qeyd edir ki, müasir dövrdə ölkələr irq, din və qohumluq əlaqələrinə əsaslanaraq bir araya gəlir, birlikdə hərəkət edir, bütün sahələrdə həmrəylik nümayiş etdirərək ortaq maraqlarını genişləndirməyə çalışırlar. Vurğulanır ki, məhz bu səbəbdən Türkdilli Dövlətlərin Əməkdaşlıq Şurasına üzv ölkələr, türkdilli xalqlar da daxil olmaqla bütün dünyada yaşayan və sayı təxminən 300 milyona çatan türklərin birlikdə hərəkət etməsi önəmlidir. Bir müddət öncə Azərbaycan Prezidenti İlham Əliyevin Yunanıstanın yeni təyin olunmuş səfirini qəbul edərkən hər sahədə Türkiyənin yanında olduqlarını bəyan etməsini böyük bir addım adlandıran M.A.Sinan bu addımın digər qardaş ölkələrdə də dəyərləndiriləcəyinə ümidvar olduğunu bildirib.
Qeyd etmək lazımdır ki, Azərbaycan hər zaman türkdilli ölkələrin inteqrasiyasında, əməkdaşlığın inkişaf etdirilməsində təşəbbüskarlığı ilə seçilir və istər iqtisadi, istərsə də siyasi platformada əməkdaşlığın genişləndirilməsi istiqamətində mühüm addımlar atır. Azərbaycan Respublikasının Prezidenti İlham Əliyev tərəfindən irəli sürülən və türkdilli ölkələr arasındakı siyasi və iqtisadi sahələrdə əlaqələrin inkişafına yönəldilmiş layihələrin əhəmiyyəti bu mənada xüsusilə seçilir. Hazırda TDƏŞ-ə sədrlik edən Azərbaycan türkdilli dövlətlərin regionda sabitliyin və sülhün qorunub saxlanılması, ölkələrimizin ərazi bütövlüyünün beynəlxalq münasibətlər sistemi səviyyəsində tanınması və qəbul olunması, BMT-nin qəbul etmiş olduğu qətnamələrdən irəli gələn məsələlərin quruma üzv ölkələr arasında yekdilliklə qarşılıqlı hörmətə dayanaraq qəbul olunması kimi məsələlərin vacibliyini daim vurğulayır. Bütövlükdə, Azərbaycan türkdilli ölkələr arasında siyasi, iqtisadi, mədəni sahələrdə əlaqələrin inkişafına mühüm töhfələr verir.
Pərviz SADAYOĞLU

Paylaş:

Baxılıb: 320 dəfə