Bakıda Rusiya İnformasiya-Mədəniyyət Mərkəzinin açılmasının birinci ildönümü qeyd olunub

Bakı:

11 °C

87 %

2 m/s

Əlaqə

AZ RU EN

Ana səhifə / Siyasət / Bakıda Rusiya İnformasiya-Mədəniyyət Mərkəzinin açılmasının birinci ildönümü qeyd olunub

Bakıda Rusiya İnformasiya-Mədəniyyət Mərkəzinin açılmasının birinci ildönümü qeyd olunub

18.03.2010 [10:20]

Dünən üzeyir Hacıbəyli adına Bakı Musiqi Akademiyasında şəhərimizdə Rusiya İnformasiya-Mədəniyyət Mərkəzinin açılmasının birinci ildönümü ilə bağlı tədbir keçirilib. Qeyd edilib ki, Azərbaycan ilə Rusiya arasında humanitar əlaqələr ümummilli lider Heydər Əliyevin xüsusi diqqəti və qayğısı sayəsində inkişaf edib. Bu gün də Azərbaycanda rus dilinə və mədəniyyətinə böyük önəm verilir. Respublikamızda rus dilində orta ümumtəhsil məktəbləri, ali təhsil ocaqlarında rus bölmələri, zəngin elmi-pedaqoji ənənələri olan Bakı Slavyan Universiteti, Səməd Vurğun adına Azərbaycan Dövlət Rus Dram Teatrı, milli teatrların nəzdində rus truppaları fəaliyyət göstərir. Televiziya və radio kanallarında rus dilində daimi verilişlər yayımlanır, çoxsaylı mətbuat orqanları və müxtəlif təyinatlı ədəbiyyat nəşr olunur. M.Lomonosov adına Moskva Dövlət Universitetinin Bakı filialının açılması isə ölkəmizin elmi-mədəni ictimaiyyətinin həyatında diqqətəlayiq hadisə olub.
Tədbirdə Rusiyanın Azərbaycandakı səfiri Vladimir Doroxin, Rusiya İnformasiya-Mədəniyyət Mərkəzinin rəhbəri Ənvər Şeyxov vurğulayıblar ki, mərkəz keçən ilin martında fəaliyyətə başladığı gündən ölkələrimiz arasında ictimai-mədəni əlaqələrin inkişafına, xalqlar arasında dostluq münasibətlərinin daha da möhkəmlənməsinə sanballı töhfələr verib.
Bildirilib ki, ötən bir ildə mərkəz ictimaiyyəti Rusiya Federasiyası xalqlarının tarixi və mədəniyyəti, iqtisadi potensialı ilə yaxından tanış etmək, Azərbaycandakı rus icması arasında mədəni-maarifləndirmə işi aparmaq, Azərbaycan təşkilatları ilə əlaqələr qurmaq və inkişaf etdirmək kimi əsas vəzifəsini layiqincə yerinə yetirib.
Bu gün mərkəzin işi yalnız Rusiya vətəndaşları üçün deyil, həm də azərbaycanlılar üçün maraqlıdır. Burada rus dili kursları fəaliyyət göstərir, müxtəlif konfranslar, “dəyirmi masa”lar, kitabların təqdimatı keçirilir. Mərkəzin zəngin kitabxanasında isə həm rus, həm xarici nəşrlərdən istifadə etmək olur. Sərgi-konsert zalında mütəmadi fotoekspozisiyalar, sərgilər, bayram tədbirləri təşkil edilir.
Mədəniyyət və turizm nazirinin müavini Sevda Məmmədəliyeva Azərbaycan ilə Rusiya arasında əməkdaşlığın möhkəmləndirilməsi və inkişafı sahəsində mərkəzin xidmətlərini yüksək qiymətləndirərək vurğulayıb ki, bu əlaqələr ölkələrimizin Prezidentləri İlham Əliyev və Dmitri Medvedev arasında olan dostluq münasibətləri üzərində qurulub. Sözsüz ki, bu, ümummilli liderimiz Heydər Əliyev və Rusiyanın keçmiş Prezidenti Vladimir Putin tərəfindən əsası qoyulmuş dostluq əlaqələrinin davamıdır.
Mərasimdə diplomatlar, Milli Məclisin deputatları, Bakı və Xəzəryanı bölgə yeparxiyasının, Azərbaycanda Rus İcmasının nümayəndələri və digər şəxslər iştirak ediblər.
Mərasim konsert proqramı ilə davam edib.

Paylaş:

Baxılıb: 1128 dəfə