Cavanşir Paşazadə: Xalqımızda yüksək vətənpərvərlik ruhu var və hər bir vətəndaş qələbəyə köklənib

Bakı:

16 °C

88 %

0 m/s

AZ RU EN

Ana səhifə / Siyasət / Cavanşir Paşazadə: Xalqımızda yüksək vətənpərvərlik ruhu var və hər bir vətəndaş qələbəyə köklənib

Cavanşir Paşazadə: Xalqımızda yüksək vətənpərvərlik ruhu var və hər bir vətəndaş qələbəyə köklənib

27.10.2020 [09:23]

“Şanlı Azərbaycan Ordusu sentyabrın 27-dən etibarən təcavüzkar Ermənistanın hərbi təxribatlarına cavab olaraq əks-hücum əməliyyatları ilə işğal altında olan ərazilərimizin azad edilməsi istiqamətində yeni-yeni qələbələr qazanır. Ölkə Prezidenti, Ali Baş Komandan İlham Əliyevin rəhbərliyi ilə ordumuz demək olar ki, hər gün irəliləyir, uğurlar əldə edir. Ordumuzun gücü qarşısında düşmənin hərbi birləşmələri döyüş mövqelərindən qaçır”. Bu fikirləri Milli Məclisin deputatı Cavanşir Paşazadə deyib.
Cavanşir Paşazadə bildirib ki, əks-hücum əməliyyatlarının ilk günündə ordumuz, qəhrəman əsgərlərimiz Füzuli rayonunun bir neçə kəndini, bir sıra strateji yüksəklikləri, o cümlədən Murovdağ zirvəsini azad etdi. Həmin gündən sonra da bir-birinin ardınca gələn qələbə xəbərləri xalqımızı sevindirir. Cəbrayıl, Füzuli, Zəngilan, Qubadlı şəhərlərinin, eləcə də digər bir çox qəsəbə və kəndlərin işğaldan azad edilməsi buna sübutdur. Cənab Prezident xalqımıza son müraciətində də yeni qələbə müjdəsi verdi, ötən gün işğaldan azad olunan yaşayış məntəqələrinin adlarını açıqladı. Bu qələbələr münasibətilə bütün xalqımızı təbrik edirəm! Eşq olsun Azərbaycan Ordusuna! Yaşasın Ali Baş Komandan İlham Əliyev!.
Millət vəkilinin sözlərinə görə, Azərbaycan Prezidenti, Ali Baş Komandan cənab İlham Əliyev həm xalqa müraciətlərində, həm də xarici kütləvi informasiya vasitələrinə müsahibələrində prinsipial mövqeyini dəfələrlə bəyan edib: “Bu mövqe ondan ibarətdir ki, Ermənistan işğal etdiyi Azərbaycan torpaqlarından çıxmalıdır. Bundan sonra məsələ siyasi müstəvidə həll oluna bilər. Amma biz hələ ki, erməni tərəfindən hər hansı konstruktiv mövqe görmürük. Əksinə, Ermənistanın baş naziri indiyədək mövcud olan münaqişənin həlli ilə bağlı baza prinsiplərini inkar edir. Bilirsiniz ki, oktyabrın 10-da Moskvada Rusiyanın vasitəçiliyi ilə tərəflər arasında humanitar atəşkəslə bağlı razılaşma əldə olundu. Amma erməni tərəfi dərhal bu razılaşmanı pozdu. Onlar ikinci dəfə də, yəni oktyabrın 18-də atəşkəslə bağlı razılaşmaya əməl etmədilər, döyüş mövqelərimizi və yaşayış məntəqələrini intensiv atəşə tutdular. Oktyabrın 26-da da elan edilmiş atəşkəs Ermənistan tərəfindən cəmi bir neçə dəqiqə sonra pozuldu. Bütün bunlar o deməkdir ki, işğalçı Ermənistan bu razılaşmalardan sui-istifadə edib itirdiyi mövqeləri geri qaytarmağa çalışır. Bu faktlar erməni xislətinin göstəricisidir. Paşinyan hakimiyyəti indi də atəşkəs razılaşmasından öz məqsədləri üçün istifadə etməyə cəhdlər göstərir. Amma unutmamalıdırlar ki, Azərbaycan 1990-cı illərin əvvəlindəki Azərbaycan deyil”.
“Təbii ki, indiki şəraitdə ölkəmizdə güclü milli həmrəylik və vətəndaş birliyi mövcuddur. Xalqımızda yüksək vətənpərvərlik ruhu var, hər bir vətəndaş qələbəyə köklənib. Cənab Prezidentin xalqa müraciətində verdiyi növbəti qələbə xəbərləri hər bir kəsi daha da ruhlandırır. O cümlədən, mənim təmsil etdiyim, Lənkəran və Masallı rayonlarının sakinləri də yüksək vətənpərvərlik mövqeyi nümayiş etdirirlər. İnşallah, tezliklə bütün torpaqlarımızdan işğalçılar qovulacaq, Azərbaycanın ərazi bütövlüyü tam təmin ediləcək! Qarabağ Azərbaycandır!”, - deyə deputat vurğulayıb.
N.BAYRAMLI

Paylaş:

Baxılıb: 457 dəfə