“Beşinci kolon” xəyanətkar mövqeyini davam etdirir

Bakı:

20 °C

68 %

2 m/s

Əlaqə

AZ RU EN

Ana səhifə / Siyasət / “Beşinci kolon” xəyanətkar mövqeyini davam etdirir

“Beşinci kolon” xəyanətkar mövqeyini davam etdirir

14.07.2021 [08:53]

Azərbaycan dövlətinin 44 günlük Vətən müharibəsində qazandığı möhtəşəm qələbədən sonra ölkəmizin inkişafında yeni mərhələ başlayıb. Hazırda bütün cəmiyyətimiz işğaldan azad edilmiş ərazilərimizdə aparılan bərpa-quruculuq işlərinə köklənib. Hər bir vətəndaş bu prosesə öz töhfəsini verməyə çalışır.
Bütün bunların fonunda “beşinci kolon”un təmsilçiləri isə yenə də sosial şəbəkələrdə absurd iddialar irəli sürməklə süni gündəm yaratmağa və ictimai rəyi manipulyasiyaya məruz qoymağa cəhd göstərirlər. Belə ki, “beşinci kolon”un fəal təmsilçiləri olan Qənimət Zahid, Gültəkin Hacıbəyli və digərləri “ənənə”lərinə uyğun olaraq virtual platformada təxribatla məşğul olur, ordumuzun şücaəti və rəşadəti sayəsində qazanılan parlaq Zəfərin dəyərini kiçiltməyə - əhəmiyyətini azaltmağa çalışırlar. Ermənilərin özləri 10 noyabr razılaşmasını Ermənistan üçün kapitulyasiya aktı hesab etdikləri halda, “beşinci kolon” təmsilçiləri bunun əksini iddia edirlər. Bu məsələdə canfəşanlıq edənlərin sırasında Q.Zahid xüsusilə fərqlənir. Belə ki, o, özünün internet televiziyasında növbəti dəfə reallıqları təhrif etməyə çalışıb.
Görünən odur ki, Qənimət Zahid kimilər ermənipərəst dairələrin direktivləri əsasında hərəkət edirlər. Əks halda, ordusu darmadağın olmuş, bu gün acınacaqlı vəziyyətə düşmüş Ermənistana göstərilən bu canıyananlıq haradan qaynaqlanır? Q.Zahid bütün imkanları ilə “ermənilərin məğlub olmadıqları”nı sübut etməyə çalışır. Belə olan halda, 44 gün ərzində Azərbaycan Ordusunun döyüş meydanında ərazilərimizi azad etməsinə, sonra Ermənistanın üç rayonumuzu Azərbaycana qaytarmağa məcbur olmasına niyə toxunulmur? Qənimət Zahidin nə deməsindən, nə yazmasından asılı olmayaraq, ortada bir reallıq var. Azərbaycan Vətən müharibəsində tarixi qələbə qazanıb və yeni reallıqlar yaradıb. Bu gün işğaldan azad edilmiş bölgələrimizdə quruculuq işləri sürətlə davam edir. Doğma yurdlarına qayıdacaq insanların həyat şəraitinin yüksək səviyyədə təmin edilməsi üçün bütün lazımi addımlar atılır. Xüsusilə, 10 noyabr birgə Bəyanatına əsasən, kommunikasiyaların bərpa edilməsi Azərbaycanın maraqlarına tam uyğundur. O cümlədən Zəngəzur dəhlizinin açılması nəinki ölkəmizin, hətta bütün Türk dünyasının strateji mənafeyinə cavab verir. Yəni bütün məsələlər mərhələlərlə həyata keçiriləcək.
Göründüyü kimi, müharibənin başa çatmasından sonra atılan bütün addımlar Azərbaycanın maraqlarına tam adekvatdır. Eyni zamanda, bu addımlar regionda sülh və təhlükəsizliyin təmin olunmasına xidmət edir. Bütün bunların fonunda radikalların israrla möhtəşəm qələbəmizə kölgə salmaq cəhdləri və milli maraqlara zidd mövqe sərgiləmələri qəbuledilməzdir.
Nardar BAYRAMLI

Paylaş:

Baxılıb: 772 dəfə