Vaxtilə Azərbaycan torpaqlarının işğal edilməsinə şərait yaradan radikal müxalifət yenə də düşmənlərin mənafeyini müdafiə edir

Bakı:

25 °C

48 %

6 m/s

AZ RU EN

Ana səhifə / Siyasət / Vaxtilə Azərbaycan torpaqlarının işğal edilməsinə şərait yaradan radikal müxalifət yenə də düşmənlərin mənafeyini müdafiə edir

Vaxtilə Azərbaycan torpaqlarının işğal edilməsinə şərait yaradan radikal müxalifət yenə də düşmənlərin mənafeyini müdafiə edir

18.08.2021 [15:42]

Məlum olduğu kimi, AXCP sədri Əli Kərimli, eləcə də ölkəmizə qarşı çirkin kampaniyalar aparmaqla “görəvləndirilmiş” Sevinc Osmanqızı kimi radikallar sosial şəbəkələrdə mütəmadi olaraq şanlı qələbəmizə kölgə salmağa cəhd göstərirlər. Bununla da onlar xaricdəki ermənipərəst dairələrin “dəyirmanına su tökməkdə” davam edirlər. Vurğulanmalıdır ki, vaxtilə Azərbaycan torpaqlarının Ermənistan tərəfindən işğal edilməsinə şərait yaradan Əli Kərimlinin və digər dağıdıcıların bu gün tarixi qələbəmizi hədəfə almaları onların xəyanətkar xislətini bir daha üzə çıxarır. Radikalların xəyanətindən söz düşmüşkən, Prezident İlham Əliyev Kəlbəcər rayonuna səfəri çərçivəsindəki çıxışında da bildirib ki, Şuşa və Laçının işğala məruz qalması AXC-”Müsavat” cütlüyünün xəyanəti nəticəsində baş vermişdir. Vurğulandığı kimi, Şuşa və Laçının işğal altına düşməsi sırf AXC-”Müsavat” cütlüyünün xəyanətidir, satqınlığıdır. Kəlbəcər rayonu işğal altına düşəndə isə artıq AXC-”Müsavat” cütlüyü öz çirkin məqsədlərinə çatmışdı, təxminən bir ilə yaxın idi hakimiyyətdə idi. Yəni Kəlbəcər 1993-cü il aprel ayının əvvəlində işğal altına düşmüşdü və bunun da günahkarı AXC-”Müsavat” cütlüyüdür, AXC-”Müsavat” hakimiyyətidir. Onların xəyanətkar, satqın, antimilli hakimiyyəti Kəlbəcərin işğalını şərtləndirdi.

Məsələ ilə balı fikirlərini bölüşən Milli Məclisin deputatı İlham Məmmədov bildirib ki, radikal müxalifət təmsilçilərinin Vətən müharibəsində əldə olunan qələbəyə kölgə salmaq cəhdləri heç də təsadüfi deyil. Dağıdıcı ünsürlərin Qarabağ zəfərini, Ermənistanın kapitulyasiyasını qəbul etməmələrinin onların yaşadıqları “yarımçıqlıq sindromundan” irəli gəldiyini deyən İ.Məmmədov vurğulayıb ki, radikal müxalifətin bu addımı bir daha onların ermənilərlə və separatizmi dəstəkləyən bəzi maraqlı xarici dairələrlə işbirliyini təsdiqləyir: “Radikallar Vətən müharibəsində qazanılan zəfəri kiçiltməyə çalışmaqla vaxtilə etdikləri xəyanətlərin üstünü örtməyə cəhd göstərirlər. Yeri gəlmişkən, cənab Prezidentimiz Kəlbəcər rayonunda çıxışında da bildirdi ki, Kəlbəcərin işğala məruz qalması satqın AXC-”Müsavat” hakimiyyətinin əməlləridir. Kəlbəcər işğal altına düşəndən sonra Ermənistanla keçmiş Dağlıq Qarabağ Muxtar Vilayəti arasında birbaşa coğrafi bağlantı yarandı və artıq digər torpaqların işğalı da labüd idi. Göründüyü kimi, bu fakt bir daha dağıdıcı ünsürlərin dövlət, xalq maraqlarına düşmən kəsildiyini ortaya qoyur”.

Milli Məclisin deputatı Kamilə Əliyeva da radikal müxalifətin və düşərgənin xaricdəki uzantılarının Azərbaycanın 44 günlük Vətən müharibəsində qazandığı qələbəyə qarşı sosial şəbəkələrdə qaralama kampaniyaları aparmağa cəhd göstərdiyini deyib. Onun sözlərinə görə, bu, bir daha onların əsl simasını Azərbaycan cəmiyyətinə göstərmiş oldu: “Xaricdəki ermənipərəst mərkəzlərə xidmət edənlər çirkin kampaniyalarla böyük qələbəmizi kiçiltməyə cəhd edirlər. Qələbəmiz barədə bir kəlmə xoş söz deməyi özünə sığışdırmayanların bu gün Ermənistanın rəzil məğlubiyyətini gizlətməyə çalışması onların siyasi kimiliyinin üstünə işıq salır. Halbuki, bu torpaqların erməni işğalı altına düşməsi məhz AXC-”Müsavat” cütlüyünün yartımaz siyasətinin nəticələri idi. Bu gün Kəlbəcərin, Şuşanın, Laçının və digər işğal altında olan ərazilərimizin azad edilməsi xalq-iqtidar birliyinin səyi, Prezident İlham Əliyevin qətiyyətli siyasətinin nəticəsidir. Bunu dərk etməyən və ya etmək istəməyən radikal ünsürlər ermənipərəstlərin kölgəsinə sığınmaqla xəyanatkar addımlarına davam edirlər. Bunun isə sonu yoxdur”.

Pərviz SADAYOĞLU

Paylaş:

Baxılıb: 603 dəfə