Radikal müxalifət indi də Zəngəzur dəhlizi ilə bağlı qara piar kampaniyası aparır

Bakı:

19 °C

82 %

1 m/s

Əlaqə

AZ RU EN

Ana səhifə / Siyasət / Radikal müxalifət indi də Zəngəzur dəhlizi ilə bağlı qara piar kampaniyası aparır

Radikal müxalifət indi də Zəngəzur dəhlizi ilə bağlı qara piar kampaniyası aparır

25.08.2021 [10:50]

Azərbaycanın ötən il 44 günlük Vətən müharibəsində qazandığı şanlı qələbə ərazi bütövlüyümüzün təmin olunması ilə yanaşı, regionda yeni siyasi-iqtisadi reallıqlar, əməkdaşlıq perspektivləri yaratdı. Öz növbəsində, Azərbaycan, Rusiya və Ermənistan arasında 2020-ci il 10 noyabr tarixində imzalanmış üçtərəfli Bəyanat, həmçinin bu ilin yanvarın 11-də Moskvada imzalanmış bəyanat regionun gələcək inkişafı üçün təkan rolunu oynaya bilər. Belə ki, hər iki bəyanat, eyni zamanda, Zəngəzur dəhlizinin reallaşması üçün də hüquqi zəmin yaradır. Onu da vurğulamaq lazımdır ki, Azərbaycan dövləti Zəngəzur dəhlizinin açılması ilə bağlı məsələdə qəti mövqeyini ortaya qoyub.

Lakin təəssüflər olsun ki, hər məsələdə antidövlət, antixalq mövqeyi sərgiləyən radikal müxalifət bu məsələdə də düşmənlərin sözçüsü rolunda çıxış edir. Daha dəqiq desək, dünyanın aparıcı dövlətlərinin və təşkilatlarının dəstəklədiyi, regionun yeni inkişaf erasının başlanğıcı sayılan Zəngəzur dəhlizinin açılması ilə bağlı məsələdə radikal müxalifət düşərgəsinin sərgilədiyi mövqe revanşist ermənilərin mövqeyi ilə üst-üstə düşür. Beləliklə xaricdəki ermənipərəst mərkəzlərin sifarişi ilə hərəkət edərək, indi də sosial şəbəkələrdə Zəngəzur dəhlizi ilə bağlı qara piar kampaniyası aparan radikal müxalifət təmsilçiləri bir daha xəyanətkar simalarını cəmiyyətə nümayiş etdirirlər.

Məsələ ilə bağlı fikirlərini bölüşən Milli Məclisin deputatı Müşfiq Məmmədli bildirib ki, Zəngəzur dəhlizinin açılması regional inkişafa yeni istiqamət verəcək. Belə ki, bu dəhlizin açılması Şərq-Qərb tranzit yükdaşımalarını, eləcə də sərnişin daşımanı asanlaşdıracaq. Bu baxımdan, sözügedən layihənin reallaşması bütün region ölkələrinin maraqlarına xidmət edir: “Prezident İlham Əliyev “CNN Türk” televiziya kanalına müsahibəsində də bildirmişdi ki, Zəngəzur dəhlizinin açılması bölgə ölkələri üçün də yeni fürsət olacaq”.

Millət vəkili onu da bildirib ki, radikal müxalifətin ciddi-cəhdlə sosial şəbəkələrdə Zəngəzur dəhlizinin açılmasına qarşı apardığı təbliğat kampaniyası xəyanətin göstəricisidir: “Bununla yanaşı, həm də bu sifarişin xaricdən verildiyi açıq-aydın ortadadır”.

Milli Məclisin deputatı Kamilə Əliyeva da deyib ki, antimilli ünsürlər və onların xaricdəki havadarları Azərbaycanın regionda yaratdığı yeni geostrateji reallıqlardan narahatdırlar: “Görünən budur ki, Vətən müharibəsinin qəti qələbəmizlə nəticələnməsi, regionda yeni iqtisadi-siyasi əməkdaşlıq platformaları ilə bağlı məsələlərin ortaya çıxması həm radikal ünsürlərin, həm də onları maliyyələşdirən xarici ermənipərəst dairələrin planlarını pozur. Ümumiyyətlə, radikal müxalifətin istər müharibə dövründə, istərsə də noyabrın 10-dan sonra sərgilədiyi davranış təsadüfi deyil. Dağıdıcılar apardıqları çirkin kampaniyalarla xaricdəki ermənipərəst mərkəzlərə xidmət etdiklərini aşkar şəkildə ortaya qoyurlar”.

Pərviz SADAYOĞLU

Paylaş:

Baxılıb: 728 dəfə