Ermənistanın “sərhəd davranışı”nın əsl səbəbləri...

Bakı:

22 °C

88 %

9 m/s

Əlaqə

AZ RU EN

Ana səhifə / Siyasət / Ermənistanın “sərhəd davranışı”nın əsl səbəbləri...

Ermənistanın “sərhəd davranışı”nın əsl səbəbləri...

23.11.2021 [10:38]

Rəsmi İrəvan XX əsrdə Azərbaycandan oğurladığı torpaqları itirməkdən qorxur

Bu ölkə 1920-1980-ci illər aralığında qeyri-qanuni şəkildə 1000 kv.km-ə qədər ərazimizi mənimsəyib

Ermənistan artıq Azərbaycanla sərhədlərin delimitasiya və demarkasiyasına hazır olduğunu bildirir. Bu məsələ 2020-ci ilin 10 noyabrında imzalanmış üçtərəfli Bəyanatda öz əksini tapsa da, bir ildən artıqdır ki, rəsmi İrəvan bundan yayınır. Həm Azərbaycan Ordusunun erməni təxribatlarına verdiyi uğurlu cavab, həm də Rusiya prezidentinin iki ölkə arasında sərhədlərin müəyyənləşdirilməsi ilə bağlı fikirləri artıq bu ölkənin “daşı ətəyindən tökməsinə” yol açıb. Ermənistanın Baş naziri Paşinyan delimitasiya ilə bağlı “isti fikirlər” səsləndirməyə başlayıb. Rəsmi İrəvanın indiyə qədər delimitasiyadan boyun qaçırmasının arxasında isə mühüm məqamlar dayanmaqdadır. Bununla bağlı KİV-ə açıqlamasında Milli Məclisin deputatı Əziz Ələkbərli maraqlı fikirlər səsləndirib. Bildirilib ki, Ermənistan sərhədlərin müəyyənləşdirilməsi prosesinə başlasa, 10 noyabrda imzaladığı kapitulyasiya sənədini yekun olaraq təsdiq etmiş olacaq. Digər tərəfdən, Qazaxın hələ də işğal altında saxladığı kəndlərini, Naxçıvanın Kərki kəndini rəsmi olaraq qaytarmış olacaq. Qarabağda sülhməramlıların nəzarətində olan ərazilərdə saxladığı silahlı terrorçu dəstələrlə əlaqələri xeyli dərəcədə kəsilmiş olacaq. Millət vəkilinin fikrincə, Azərbaycan K(b)P MK Siyasi və Təşkilat Bürolarının 1920-ci il 30 dekabr və 1921-ci il 12 yanvar tarixli iclaslarında Azərbaycanın tarixi ərazisi olan Zəngəzur Moskvanın təhriki ilə faktiki olaraq iki yerə bölünəndə 6742 kv.km olub, onun 3637 kv.km-i Ermənistana birlədirilib, 3105 kv.km-i isə Azərbaycanın tərkibində qalıb. Ermənistana verilmiş həmin ərazi 1930-cü il sentyabrın 9-da Ermənistan SSR-də rayonlaşdırma aparılarkən dörd rayona - Gorus, Qarakilsə, Qafan və Meğri rayonlarına bölünüb. Amma 1980-ci illərin əvvəllərində həmin rayonların ərazisi Gorus rayonu - 752 kv.km, Qarakilsə (Sisian) rayonu - 1719 kv.km, Qafan rayonu - 1345 kv.km, Meğri rayonu - 664 kv.km kimi göstərilib. Bu isə toplamda 3637 deyil, 4480 kv.km ərazi edir. Bu baxımdan, sərhədlərin delimitasiyası prosesi başlayanda Ermənistan qanunsuz olaraq zəbt etdiyi 843 kv. km ərazini də itirmiş olacaq.

Göründüyü kimi, Ermənistanın sərhədlərin müəyyənləşməsinə yaratdığı əngəlin əsl səbəbləri artıq ortaya çıxmaqdadır. Azərbaycanın torpaqları hesabına özünə dövlət yaratmış, hətta paytaxt seçmiş bu ölkə ötən yüzillikdə addım-addım oğurladığı torpaqlarımızın cavabını verməkdən çəkinir. Prezident İlham Əliyevin qətiyyətini hər kəsdən yaxşı bilən Ermənistan anlayır ki, Qaragöl, Zod, Şurnuxu məsələsində bir addım geri çəkilməyən Azərbaycan sərhədlərin müəyyənləşməsi məsələsində də öz maraqlarını təmin edəcək. Beləliklə də, yüz il ərzində Azərbaycandan oğurladığı torpaqların siyahısı üzə çıxacaq, üstəlik, bu torpaqlar əlindən çıxacaq.

2020-ci il Vətən müharibəsi işğal altındakı torpaqların azad edilməsi ilə yanaşı, illərdir ki, tapdanan haqqı, ədaləti bərpa edir. Azərbaycan Prezidentinin “nəyi necə, nə vaxt etmək lazımdır, bunu mən bilirəm” fikri növbəti dəfə öz təsdiqini tapır. Müharibədə məğlub olan, siyasi-iqtisadi böhranın girdabına düşən, 30 ilə işğal altında saxladığı Azərbaycan torpaqlarını itirən Ermənistan sərhədlərin müəyyənləşməsi nəticəsində yüz il ərzində həyata keçirdiyi cinayətlərin, oğurluğun da cavabını verəcək. Bu gün elə də uzaqda deyil...

Pərviz Sadayoğlu

Paylaş:

Baxılıb: 1001 dəfə