ABŞ ilə Rusiya dünyanı bölür?

Bakı:

19 °C

82 %

1 m/s

Əlaqə

AZ RU EN

Ana səhifə / Siyasət / ABŞ ilə Rusiya dünyanı bölür?

ABŞ ilə Rusiya dünyanı bölür?

28.12.2021 [10:15]

Pərviz Sadayoğlu

Son dövrlərdə daha da aktivləşən təkqütblü dünya uğrunda mübarizə yeni istiqamət almaqdadır. Belə ki, qlobal liderliyə can atan ABŞ-ın “Ukrayna sahilləri”nə lövbər salmaq niyyəti daşa dəyir. Bəlkə də, bu səbəbdəndir ki, rəsmi Vaşinqton Rusiya ilə qarşıdurmada fərqli yollara əl atır. Məsələn, Ukraynanın keçmiş müdafiə naziri Andrey Zaqorodnyuk ABŞ Prezidenti Co Baydenin administrasiyasında Rusiyaya güzəştə getməyin tərəfdarı olan insanların olduğunu bildirib. Onun sözlərinə görə, Kremlin əsas məqsədi Qərb ölkələrini, ilk növbədə, ABŞ-ı Ukrayna ərazisinə buraxmamaqdır: “Putin dünyanı bölməyi təklif edir. ABŞ-dakı o şəxslər də deyirlər: gəlin belə edək, bura sizin, bura da bizim ərazimizdir”.

Zaqorodnyuk vurğulayıb ki, “qırmızı xətlər” daha da dərinləşsə, bu, Rusiyanın Ukrayna ilə bağlı yeni tələblər irəli sürməsinə gətirib çıxaracaq: “Rusiya Ukraynanı “İkinci Belarus”a çevirmək istəyir”.

Bu açıqlama, əslində, ABŞ-ın açıq döyüşdən yayınmağa çalışdığını göstərir. Belə ki, Ağ Ev dolayısı ilə Rusiyanı dünyanı, daha doğrusu, hazırda mübahisə mövzusu olan əraziləri masa arxasında bölməyə çağırır. Rusiya isə bu təklifin səmimiliyinə inanmır. Kreml hesab edir ki, ABŞ-ın bu təklifi vaxt udmağa hesablanıb. ABŞ-Rusiya danışıqlarının yeni raundunun gələn ilin yanvarına planlaşdırıldığını nəzərə alsaq, Ağ Evin masa arxasında yuxarıda qeyd edilən təkliflə otura bilmə ehtimalı yüksəkdir. Rusiya Prezidenti Vladimir Putin isə bütün hallarda böhranın aradan qaldırılması üçün NATO-nun Şərqə doğru genişlənməyəcəyinə dair təminat tələbindən də əl çəkmir.

Məsələ ilə bağlı fikirlərini bölüşən politoloq İbrahim Babayev bildirib ki, Rusiya ilə ABŞ arasında 2014-cü ildən başlanan Ukrayna problemi artıq pik həddə çatmaqdadır. Politoloqun fikrincə, ABŞ-ın irəli sürdüyü heç bir təklif Rusiyaya cəlbedici görünmür: “Kremlin yeganə tələbi NATO-nun Şərqə doğru genişlənməsinin qarşısını almaqdır. NATO-nun Şərqə doğru genişlənmə planında Rusiya üçün ən təhlükəli ölkələr isə Ukrayna ilə Gürcüstandır. Rəsmi Moskva bütün vasitələrdən istifadə etməklə bu ölkələrin Alyansa qatılmasının qarşısını almağa çalışır. Təbii ki, indiki halda hər iki tərəf mümkün imkanlarını işə salıblar. Zaqorodnyakın fikirləri, bəlkə də, düz ola bilər. Amma bu daha çox Vaşinqtonun apardığı informasiya təbliğatına bənzəyir”.

İ.Babayev qeyd edib ki, Rusiya ilə ABŞ arasında indiki halda hansısa konstruktuv müzakirənin baş tutma ehtimalı çox azdır. Bir müddət öncə Ağ Evin sözçüsü Psaki bildirmişdi ki, Rusiyanın qaldırdığı məsələləri açıq müzakirə etmək bizə konstruktiv görünmür və belə diplomatik söhbətlərlə irəliləyiş əldə olunması keçmişdə qalıb. Rəsmi Vaşinqton Rusiya ilə şərtsiz danışıq arzusundadır. Amma Kreml NATO-nun Şərqə doğru genişlənmə planının dayandırılmasında israrlıdır. “Gələn ilin ilk ayında müəyyən danışıqlar nəzərdə tutulur. Amma bu danışıqların da 2021-ci ildəki müzakirələrdən fərqlənməyəcəyini düşünürəm. Belə olan halda isə, ABŞ-ın Rusiyaya qarşı fəaliyyəti yalnız iqtisadi müstəvi ilə məhdudlaşmaya bilər. Ağ Ev açıq şəkildə Ukraynaya dəstəyini artıracağını bildirir. Pentaqon kömək məqsədilə rəsmi Kiyevi kəşfiyyat məlumatları ilə təmin etmək planı üzərində işlədiyini belə gizlətmir. Hətta Pentaqon rəsmilərindən ibarət kiçik bir qrupun bu yaxınlarda ölkənin hava hücumundan müdafiə ehtiyaclarını qiymətləndirmək üçün Ukraynaya səfər etdiyi barədə məlumatlar da var. Bu məlumatı Pentaqonun sözçüsü Con Kirbi təkzib etməyib. ABŞ artıq Ukraynanı “Javelin” tank əleyhinə idarə olunan raketlərlə təchiz edir. Belə olan halda, hansısa konstruktiv danışığın mümkünlüyü sual altına düşür”, - deyən politoloq əlavə edib ki, Pentaqonun kəşfiyyat məlumatlarını ötürmək təklifi açıq şəkildə müharibəyə təhrikdir. Vaxtaşırı Qara dəniz sahillərində ABŞ hərbi donanmasına məxsus gəmilərin və ya təyyarələrin görülməsi də bu baxımdan istisna deyil.

Paylaş:

Baxılıb: 864 dəfə