Qafandan Qarakilsəyə...

Bakı:

23 °C

72 %

11 m/s

Əlaqə

AZ RU EN

Ana səhifə / Siyasət / Qafandan Qarakilsəyə...

Qafandan Qarakilsəyə...

06.01.2022 [10:33]

Ermənistan KİV-i hakimiyyətin yeni planından yazır

Rəsmi İrəvan Zəngəzurun mərkəzini köçürmək niyyətindədir?

P. İsmayılov

Ermənistan KİV-i Zəngəzurun mərkəzinin Qafandan köçürülməsi ilə bağlı məlumatlar yaymaqdadır. Qeyd olunur ki, Ermənistan hökuməti Zəngəzur bölgəsinin mərkəzini Qafan şəhərindən Sisian (Qarakilsə) şəhərinə köçürmək istəyir. Zəngəzurun mərkəzinin məhz Azərbaycana görə köçürülməsinin müzakirə olunduğu bildirilir. Vilayət mərkəzinin köçürülməsinin səbəbi kimi iki ölkə arasında razılaşdırılmış Zəngəzur dəhlizi göstərilsə də, Ermənistanın “təhlükəsizliyi” bəhanə etməsi ortadadır.

Məsələ ilə bağlı fikirlərini bölüşən Milli Məclisin deputatı Ramil Həsən bildirib ki, yayılan bu informasiya hələlik Ermənistan KİV-ində müzakirə edilir. Ermənistan dövləti bu informasiyanı rəsmi şəkildə təsdiqləməyib. Bu baxımdan, xəbərin dəqiqliyi hələ tam məlum deyil. Millət vəkili qeyd edib ki, ötən ilin sonlarında Azərbaycan Prezidenti İlham Əliyevlə Ermənistanın baş naziri Nikol Paşinyan arasında istər Soçidə, istərsə də Brüsseldə baş tutan görüşlərdə Zəngəzur dəhlizinin reallaşması ilə bağlı razılıq əldə olundu. Bununla bağlı, artıq real iş aparılır və müvafiq komissiyalar lazımi addımları atırlar. Çox güman ki, Zəngəzurun mərkəzinin köçürülməsi ilə bağlı Ermənistan KİV-ində başlanan müzakirələrin əsasında bu amil dayanır: “Ola bilsin ki, Ermənistan ictimaiyyətinin müəyyən kəsimi bu addımı “təhlükəsizlik”lə əlaqələndirməyə çalışırlar. Amma unudurlar ki, Azərbaycanın İkinci Qarabağ müharibəsində qazandığı qələbə yalnız öz torpaqlarını işğaldan azad edilməsinə hədəflənmişdi. Biz heç zaman təcavüzkar dövlət olmamışıq. Cənab Prezident dəfələrlə bildirib ki, bizim heç kimin torpağında gözümüz yoxdur. Düzdür, Zəngəzur Azərbaycanın tarixi torpağıdır. Bununla belə, Azərbaycan dövləti Ermənistanın beynəlxalq səviyyədə tanınan ərazilərinə qarşı heç zaman təcavüzkar addım atmayıb. Hətta bu torpaqları əldə etmək imkanımız olsa da, bunu etməmişik. Fikrimcə, Ermənistan cəmiyyəti anlamalıdır ki, Azərbaycanın apardığı siyasət yalnız regionun inkişafına yönəlikdir. Bu mənada, biz heç kimə hər hansı bir təhlükə yaratmırıq”.

R.Həsən onu da əlavə edib ki, Zəngəzur dəhlizi iqtisadi layihədir və ermənilərin bu layihəni siyasi müstəviyə transfer etmək cəhdləri boş və əsassızdır. O mənada ki, Zəngəzurun tarixi Azərbaycan torpağı olmasını həm tarixi sənədlər, həm də faktlar təsdiqləyir. “Həmin torpaqlarda yaşayan yüzminlərlə azərbaycanlı Ermənistanın başlatdığı milli ədavət və konflikt nəticəsində öz yurdlarından didərgin salınıblar. Fikrimcə, gələcəkdə münasibətlərin normallaşdırılması prosesinə uyğun olaraq, Zəngəzura qayıdacağıq. Cənab Prezidentimizin dəfələrlə qeyd etdiyi “Biz tarixi torpaqlarımıza qayıdacağıq” fikri hər zaman aktualdır. Bu haqqı bizə tarixi reallıqlarla yanaşı, beynəlxalq hüquq normaları da verir”, - deyən millət vəkili onu da qeyd edib ki, bunun ərazi iddiası ilə bağlılığı yoxdur.

Paylaş:

Baxılıb: 953 dəfə