Özbəkistan KTMT-yə üzv olacaq?

Bakı:

25 °C

67 %

1 m/s

Əlaqə

AZ RU EN

Ana səhifə / Siyasət / Özbəkistan KTMT-yə üzv olacaq?

Özbəkistan KTMT-yə üzv olacaq?

13.01.2022 [10:30]

Nardar BAYRAMLI

Qazaxıstanda baş verən hadisələrin Mərkəzi Asiyanın digər ölkələrinə transfer olunacağı barədə müzakirələr davam edir. Növbəti hədəfin Özbəkistan olacağı bildirilir.

Nə üçün xəbərdarlıq edilir?

Kollektiv Təhlükəsizlik Müqaviləsi Təşkilatının (KTMT) liderlərinin Qazaxıstanla bağlı keçirdiyi onlayn görüşdə Belarus Prezidenti Aleksandr Lukaşenko bildirib ki, əgər Qazaxıstandakı hadisələrdən dərs götürülməsə, oxşar hadisələr təkrar oluna bilər, ilk növbədə, hədəf Özbəkistan olacaq. Belarus liderinin sözlərinə görə, onun əlində informasiya var ki, terrorçuların nəzəri artıq bu ölkəyə yönəlib. Bir sıra xarici ekspertlər də hesab edirlər ki, belə xəbərdarlıqların məqsədi Özbəkistanı KTMT sıralarına qoşmaqdan ibarətdir.

Ciddi xarici təhlükə yaranarsa...

Özbəkistanın Tədqiqat Təşəbbüsləri Mərkəzinin direktoru Mano Bəxtiyar Yerqaşev isə bildirib ki, Özbəkistanın yerli terror qruplaşmalarının hücumlarını dəf etmək təcrübəsi var. Onun sözlərinə görə, ciddi xarici təhlükə yaranarsa, ölkənin KTMT-yə qayıtması ehtimalı azdır, lakin müttəfiqlik münasibətləri çərçivəsində yardım üçün Rusiyaya müraciət edəcək: “Özbəkistanda vəziyyəti ayıq və sakit şəkildə qiymətləndirirlər və başa düşürlər ki, ölkədə “yatmış” terrorçu və ekstremist hüceyrələr var. Amma bu, bir neçə minlik böyük, güclü və koordinasiyalı bir hərəkat olacaqsa, o zaman kömək lazım ola bilər. Özbəkistan isə KTMT-yə deyil, 2005-ci ildə müttəfiqlik münasibətləri haqqında müqavilə imzaladığı ölkəyə üz tutacaq. Bu, Rusiyadır”. Yerqaşev qeyd edib ki, ölkəsi siyasi bloklarda təmsil olunmayacaq: “Özbəkistanda Qazaxıstandakı vəziyyətdən fərqli olaraq, elita daxilində ciddi ziddiyyətlər yoxdur. Əsas məsələdə konsensus var. Bu, Özbəkistanın hərbi-siyasi bloklarda və təşkilatlarda iştirak etməyəcəyidir və KTMT də konkret olaraq buraya daxildir”.

Mərkəzi Asiyada vəziyyəti gərginləşdirmək istəyən dairələr var

Mövzu ilə bağlı qəzetimizə açıqlama verən hərbi ekspert Emin Həsənli bildirib ki, Mərkəzi Asiya regionunda vəziyyəti gərginləşdirməyə maraqlı olan dairələr var. Bu baxımdan, Qazaxıstandan sonra növbəti hədəfin Özbəkistan olması ilə bağlı deyilənlər təsadüfi sayılmamalıdır. Onun sözlərinə görə, yarana biləcək təhlükənin qarşısını almaq üçün bu ölkənin KTMT-yə üzv olması yeganə çıxış yolu deyil: “Özbəkistan müstəqil dövlətdir və özünün təhlükəsizlik, hüquq-mühafizə orqanları var. Əgər ölkədə terrorçular baş qaldırarsa, onların qarşısını almaq, ilk növbədə, həmin qurumların vəzifəsidir”.

Hər iki variant Özbəkistan üçün məqbul deyil

Ekspert söyləyib ki, artıq Özbəkistan KTMT-yə qayıtmayacağını bəyan edib: “Digər tərəfdən, təhlükəli vəziyyət yaranarsa, dəstək üçün birbaşa Rusiyaya müraciət ediləcəyi qeyd olunur. Düşünürəm ki, hər iki variant Özbəkistan üçün məqbul deyil. Çünki belə vəziyyət onu başqa ölkələrdən asılı vəziyyətə sala bilər. Fikrimcə, ən optimal variant Türk Dövlətləri Təşkilatı çərçivəsində əməkdaşlığın edilməsidir”.

Paylaş:

Baxılıb: 769 dəfə