Makronun İranın nüvə proqramı ilə bağlı çağırışı...

Bakı:

18 °C

76 %

6 m/s

Əlaqə

AZ RU EN

Ana səhifə / Siyasət / Makronun İranın nüvə proqramı ilə bağlı çağırışı...

Makronun İranın nüvə proqramı ilə bağlı çağırışı...

01.02.2022 [10:28]

Nəyə hesablanıb və real nəticə vəd edirmi?

P.SADAYOĞLU

İranın nüvə proqramı ilə bağlı problemi yenidən gündəmə gəlir. Belə ki, Fransa prezidenti Emmanuel Makron iranlı həmkarı İbrahim Rəisi ilə söhbətində Tehran və Vaşinqtonu nüvə ilə bağlı razılaşma üçün danışıqları sürətləndirməyə çağırıb. Yelisey sarayının mətbuat xidmətinin yaydığı məlumata görə, Vyanada danışıqların bərpasından bir neçə ay sonra Fransa Prezidenti nəzərəçarpacaq irəliləyişə nail olmaq üçün danışıqları sürətləndirməyin vacibliyini vurğulayıb. Makron, həmçinin qeyd edib ki, İranın nüvə problemi ilə bağlı danışıqlarda uğur qazanmağı mümkün hesab edir.

Qeyd edək ki, ötən ilin noyabrın 29-da Vyanada İranla bağlanmış beynəlxalq nüvə sazişinin bərpası ilə əlaqədar danışıqların növbəti raundu keçirilmişdi. ABŞ rəsmiləri İranın danışıqlar yolu ilə vaxt qazanmağa və öz nüvə proqramını inkişaf etdirməyə çalışdığını düşünür. İranın isə bu məsələdə mövqeyi və tələbləri aydındır. Onların fikrincə, bu sazişdən imtina edən ABŞ geriyə dönməli və bütün sanksiyaları ləğv etməlidir. ABŞ isə sanksiyaların tamamilə ləğvinə qarşıdır. Yeri gəlmişkən, 2018-ci ildə ABŞ birtərəfli qaydada sazişi tərk etdikdən sonra sazişin bərpası üçün danışıqlar Aİ-nin sədrliyi altında İranla beş ölkə - Almaniya, Böyük Britaniya, Çin, Fransa və Rusiya arasında aparılır.

Məsələ ilə bağlı fikirlərini bölüşən siyasi şərhçi İlqar Vəlizadə bildirib ki, Fransanın vasitəçilik missiyasını üzərinə götürmək istəyinin arxasında mühüm məqamlar dayanır. Belə ki, rəsmi Paris özünü Avropa lideri rolunda görür və belə təqdim etmək istəyir: “Fransa prezidenti özünü Avropanın “ən təcrübəli siyasətçisi” kimi görür. Çünki Avropanın böyük dövlətləri sırasında ən çox hakimiyyətdə olan siyasətçi Makrondur. Fransa prezidenti düşünür ki, Paris həm Avropa, həm də dünya siyasətində əsaslı rol oynaya bilər. Digər tərəfdən, hazırda Fransa Avropa İttifaqının sədridir. Makron çalışır ki, Avropanın bu məsələyə yanaşmasını məhz onun dövləti ortaya qoysun”.

“Əslində, Fransanın və Makronun Avropa məkanında nüfuzu o qədər də böyük deyil. Makron həm beynəlxalq aləmdə, həm də Avropanın özündə real siyasi çəkiyə malik deyil. Bunu İran tərəfi də anlayır. Bu baxımdan, onun vədləri də o qədər real görünmür. Sadəcə olaraq, nüvə proqramı sazişinin üzvü olduğu üçün bu kimi dialoqlarda iştirakçı olur. İran isə bu dialoqu fövqəladə hadisə kimi qəbul etmir. Bu mənada, rəsmi Tehranın da bu təklifə yanaşması ehtiyatlı olacaq”, - deyən İ.Vəlizadə onu da əlavə edib ki, Fransanın İranın uğur qazanmasına inanması bu ölkənin ardıcıl olmayan siyasətindən xəbər verir. Vaxtilə İrana qarşı müxtəlif tribunalardan hədələr yağdıran, nüvə proqramının məhdudlaşdırılması ilə bağlı çağırışlar edən Makronun birdən-birə fərqli fikrə düşməsi məqbul sayıla bilməz: “Bunlar, sadəcə olaraq, siyasi oyunlardır. Makron Fransa-İran münasibətlərini yaxşılaşdırmaq, həm də guya dünya siyasətinə təsir imkanlarını göstərmək istəyir. Qısacası, cari siyasi konyukturaya hesablanan addımdır. Bunu İranda da yaxşı anlayırlar. Eyni zamanda, Makron bundan yaxın aylarda keçiriləcək prezident seçkilərində də istifadə etmək niyyətindədir. O, xarici siyasətdə xal qazandırmaq istəyir”.

Paylaş:

Baxılıb: 1111 dəfə