Aİ Belarusa müşahidəçi göndərməyəcək...

Bakı:

23 °C

40 %

4 m/s

Əlaqə

AZ RU EN

Ana səhifə / Siyasət / Aİ Belarusa müşahidəçi göndərməyəcək...

Aİ Belarusa müşahidəçi göndərməyəcək...

17.02.2022 [10:26]

Amma prosesi diqqətlə izləyəcək

P. İSMAYILOV

Belarus prezidenti Aleksandr Lukaşenkonun fərmanı ilə Konstitusiyasına əlavə və dəyişikliklərlə bağlı fevralın 27-də referendum keçiriləcək. Belarus Mərkəzi Seçki Komissiyasının rəhbəri İqor Karpenko referenduma hazırlıqla bağlı məlumat verib. Bildirib ki, Belarus MSK 101 beynəlxalq müşahidəçini, o cümlədən MDB missiyasından 92 müşahidəçini akkreditasiya edib.

Avropa İttifaqı isə Belarusdakı referendumu müşahidə etmək üçün missiya göndərməyəcək. Avropa Xarici İşlər Nazirliyinin rəsmi nümayəndəsi Piter Stano bildirib ki, Avropa İttifaqı fevralın 27-də keçiriləcək konstitusiyaya dəyişikliklərlə bağlı referendum üçün Belarusa müşahidəçi göndərmək niyyətində deyil. “Belarus hakimiyyəti ATƏT-in Demokratik Təsisatlar və İnsan Haqları Bürosunu Belarusda müşahidə missiyası yerləşdirməyə dəvət etməyib. Aİ də öz növbəsində Belarusa hər hansı rəsmi müşahidə missiyası göndərməyi planlaşdırmır”, - Stano deyib.

Eyni zamanda, o qeyd edib ki, Aİ vətəndaşları referendumu müşahidə etmək üçün bu ölkəyə gedə bilərlər, lakin “onlar bunu öz şəxsi imkanları daxilində edəcəklər”. Qurum rəsmisi bildirib ki, Aİ hadisələri izləməyə davam edəcək: “Biz Belarusda baş verənləri referendumdan əvvəl və səsvermə günü izləməyə davam edəcəyik və buna uyğun reaksiya verəcəyik”“.

Xatırladaq ki, Belarusla Qərb ölkələri arasında münasibətlər 2020-ci ilin avqustunda keçirilən prezident seçkiləri dövründə kəskin hal alıb. Avropa İttifaqı, Böyük Britaniya, ABŞ, Kanada və bir sıra digər ölkələr rəsmi Minski seçki pozuntularında və insan haqlarının pozulmasında ittiham edərək bəzi dövlət rəsmilərinə, eləcə də müəssisələrə qarşı mərhələli şəkildə sanksiyalar tətbiq ediblər. 2021-ci ilin dekabr ayının əvvəlində isə Belarusa qarşı yeni sanksiyalar elan edilib. Bunun qarşılığında isə Minsk hakimiyyəti ərzaq embarqosu da daxil olmaqla, cavab tədbirləri görüb.

Məsələ ilə bağlı fikirlərini “Yeni Azərbaycan”a bildirən siyasi şərhçi İbrahim Babayev Aİ-nin Belarusdakı referendumu izləmək üçün müşahidə missiyası göndərməməsinin səbəblərinin tarixi keçmişə söykəndiyini deyib. Sonuncu prezident seçkiləri dövründə baş verənləri xatırladan İ.Babayev qeyd edib ki, Qərb bu seçkilərin nəticələri ilə bağlı pozitiv münasibət bildirməyib: “Həmin dövrdə mühüm siyasi proseslər baş vermişdi. Hətta bəzi siyasətçilərin, xüsusilə Lukaşenkonun rəqiblərinin həbsi də baş vermişdi ki, sonradan bu gərginliklər aradan qaldırıldı. Avropanın bəzi təsisatları bəzən ölkələrdə keçirilən seçkilərdə daha çox rol almaq niyyətində olurlar. Hətta yersiz və özlərinin maraqlarına uyğun müdaxilələrin belə şahidi oluruq. Prosesin nəticəsi mütləq şəkildə xalqın iradəsinə söykənməlidir”.

Siyasi şərhçi bildirib ki, Belarusda keçiriləcək referendum Konstitusiyaya yeni əlavələri və düzəlişləri özündə ehtiva edəcək. Belə ki, ana qanunda əsas dəyişiklik təşəbbüsü eyni şəxsin iki dəfədən çox prezident seçilməsinə məhdudiyyətin bərpası, prezident seçilmək yaşının 35-dən 40-a qaldırılmasıdır. Digər təklifə əsasən, prezident seçilmək istəyən şəxs son 20 ildə ölkədə daimi yaşamalıdır. Başqa ölkənin vətəndaşı olmuş və ya xaricdə yaşamaq hüququ əldə etmiş şəxsin prezidentliyə namizədliyi yasaqlanır. “Burada bəzi məsələlər var ki, müasir dövrün təhlükəsizlik problemi çağırışları ilə səslənir. Məsələn, xarici vətəndaşların dövlət başçısı seçilməsinə məhdudiyyətin qoyulması məntiqlidir. Nəzərə alsaq ki, bu gün belarusla Qərb dünyası arasındakı münasibətlər kəskin şəkildədir, bu, dövlətin özünü qorumaq instinktini artırmağa yönəlib”, - deyə İ.Babayev əlavə edib.

Paylaş:

Baxılıb: 927 dəfə