Gürcüstan hakimiyyətində fikir ayrılığı...

Bakı:

16 °C

88 %

5 m/s

Əlaqə

AZ RU EN

Ana səhifə / Siyasət / Gürcüstan hakimiyyətində fikir ayrılığı...

Gürcüstan hakimiyyətində fikir ayrılığı...

05.04.2022 [10:50]

Xarici işlər naziri niyə istefa verdi?

N.BAYRAMLI

Rusiya-Ukrayna müharibəsi ilə əlaqədar Qərbin Rusiyaya tətbiq etdiyi sanksiyalara beynəlxalq müstəvidə fərqli yanaşmalar var. Müəyyən ölkələr sanksiyalara qoşulmaqdan imtina edib. Qonşu Gürcüstanda da bu məsələ ilə bağlı fərqli yanaşmalar var və hökumət daxilində fikir ayrılığının mövcudluğu açıq-aydın görünür. Gürcüstanın xarici işlər naziri David Zalkalianinin öz vəzifəsindən istefa verməsi də bu fikir ayrılığının göstəricisi kimi dəyərləndirilir.

Bəs Gürcüstan hakimiyyətində yaranan fikir ayrılıqlarının səbəbi nədir? Məsələ ilə bağlı politoloq Ceyhun Əhmədli qəzetimizə açıqlamasında bildirib ki, hazırda regionda çox mürəkkəb proseslər baş verir və ölkələr mövcud gərginlikdən maksimum itkisiz çıxmağa çalışır. Onun sözlərinə görə, Gürcüstanın da ərazi bütövlüyü problemi var, bu səbəbdən hazırkı münaqişədən uzaq durmağa çalışır: “Abxaziya və Cənubi Osetiyada separatçı rejim mövcuddur. Onlar Rusiya tərəfindən dəstəklənir. Ona görə də, Gürcüstanla Rusiyanın münasibətləri kifayət qədər soyuqdur. Buna baxmayaraq, Gürcüstan əlavə problem istəmir. Amma Gürcüstanda Rusiyanın qatı əleyhdarları var ki, sanksiyalara qoşulmağın tərəfdarıdır. David Zalkalianinin xarici işlər naziri vəzifəsindən istefa verməsini də bu amillə əlaqələndirənlər var. Artıq Gürcüstanın yeni xarici işlər naziri adı bəllidir, o, İlya Darçiaşvilidir. David Zakaliani isə ABŞ-a səfir göndərilir. Ümumiyyətlə, sanksiyalara qoşulmaqla bağlı ölkə hakimiyyətində fikir ayrılığı qabarıq şəkildə özünü göstərir. Bu yaxınlarda Gürcüstan Prezidenti Salome Zurabişvili “CNN” telekanalına müsahibəsində bildirdi ki, Gürcüstan Ukraynaya hücuma görə Rusiyaya qarşı tətbiq edilən bütün beynəlxalq maliyyə sanksiyalarına qoşulub. O, ölkəsinin Ukraynanı dəstəkləmək üçün yaradılmış bütün beynəlxalq platformalarda iştirak etdiyini deyib. Amma prezidentin ardınca Baş nazir İrakli Qaribaşvili jurnalistlərə açıqlamasında bunu təkzib edərək bəyan etdi ki, Gürcüstan Rusiyaya qarşı iqtisadi sanksiyalar tətbiq etməyəcək. Qaribaşvili Gürcüstan hökumətinin bu qərarla ölkənin və xalqın milli maraqlarını üstün tutduğunu deyib. Bu ikili yanaşma hakimiyyətdə fikir ayrılığının böyük olduğunu göstərir”.

Politoloq qeyd edib ki, bütün bunların fonunda Ukrayna Müdafiə Nazirliyinin baş kəşfiyyat idarəsi Rusiyanın sanksiyaya məruz qalmış malların, o cümlədən hərbi malların Gürcüstan ərazisindən qaçaqmalçılıq yolu ilə keçirilməsi üçün kanal yaratmağa çalışdığını iddia edib: “Məlumatda bildirilir ki, beynəlxalq sanksiyaların tətbiqi ilə əlaqədar Rusiya Federasiyası geniş çeşiddə hərbi, ikili təyinatlı və mülki malların tədarükü imkanını itirib. Sanksiyalardan yan keçmək üçün Rusiya agentləri, xüsusən də Rusiya Federasiyasının ərazisindən keçən qaçaqmalçılıq kanalları yaradırlar. Eyni zamanda, Gürcüstan xüsusi xidmət orqanlarının nümayəndələri siyasi rəhbərlikdən qaçaqmalçıların fəaliyyətinə mane olmamaq barədə göstərişlər alıblar. Bütün hallarda, hakimiyyət nə qədər düzgün addım atarsa, bir o qədər dövlətin və xalqın maraqlarını qorumuş olacaq”.

Paylaş:

Baxılıb: 605 dəfə