Söz və nüfuz sahibi Azərbaycandır!

Bakı:

24 °C

53 %

6 m/s

Əlaqə

AZ RU EN

Ana səhifə / Siyasət / Söz və nüfuz sahibi Azərbaycandır!

Söz və nüfuz sahibi Azərbaycandır!

07.04.2022 [09:48]

Brüsseldən Bakıya geosiyasi baxış

Nurlan QƏLƏNDƏRLİ

Aprelin 6-da Brüsseldə işgüzar səfərdə olan Azərbaycan Respublikasının Prezidenti İlham Əliyevin Avropa İttifaqı (Aİ) Şurasının Prezidenti Şarl Mişel ilə təkbətək görüşü keçirilib. Görüşdə dövlətimizin başçısı Avropa İttifaqı Şurasının Prezidenti Şarl Mişelin Ermənistanla Azərbaycan arasında postmünaqişə dövründə münasibətlərin normallaşması prosesinə verdiyi töhfəni yüksək qiymətləndirib və ötən ilin dekabrında keçirilmiş üçtərəfli görüşü xatırladıb. Prezident İlham Əliyev həmin görüşdə müəyyən edilmiş Brüssel sülh gündəliyinin əhəmiyyətini qeyd edib və bu gün (dünən - red.) keçirilən üçtərəfli görüşün nəticəyönümlü olacağını vurğulayıb.

Şarl Mişel isə Ermənistan və Azərbaycan arasında aparılan dialoqun əhəmiyyətini qeyd edib. Görüşdə Avropa İttifaqı ilə Azərbaycan arasında ikitərəfli gündəliyə dair məsələlər müzakirə edilib və əməkdaşlığın müxtəlif istiqamətlər üzrə dinamik şəkildə inkişaf etdiyi qeyd olunub.

Aİ Ermənistanla Azərbaycan arasında postmünaqişə dövründə münasibətlərin normallaşması, Cənubi Qafqazda etimad quruculuğu ilə əlaqədar fəallıq nümayiş etdirir. Müzakirələr isə Brüsseldə müəyyən olunmuş sülh gündəliyi əsasında davam etdirilir. Ermənistan-Azərbaycan münasibətlərinin normallaşdırılması, kommunikasiyaların bərpası, itkin düşmüş şəxslərin taleyinin müəyyən edilməsi, minaların təmizlənməsində Azərbaycana yardım və etimad quruculuğu kimi məsələlər sülh gündəliyinə daxildir. Səsləndirilən fikirlər isə postmünaqişə dövründə prosesləri tənzimləyən əsas qüvvənin - söz və nüfuz sahibinin Azərbaycan olduğunu təsdiqləyir.

Görüşdə diqqət mərkəzində olan məsələlərdən biri də enerji təhlükəsizliyi olub. Şarl Mişel Azərbaycanın Avropanın enerji təhlükəsizliyində oynadığı rolu yüksək qiymətləndirib. Təbii ki, bu, proseslərin Avropanı enerji böhranına doğru apardığı hazırkı şəraitdə xüsusilə önəmlidir. “Qoca qitə”nin enerji təhlükəsizliyi məsələsində alternativ mənbələrə ehtiyacının olduğu, demək olar ki, hər gün ifadə edilir. Buna görə də etibarlı tərəfdaş olan Azərbaycanla əməkdaşlığın dərinləşdirilməsi daha da aktuallaşır. Ölkəmizə inam isə sonsuzdur. Çünki Azərbaycan uzun müddətdir ki, Avropa bazarında etibarlı enerji təchizatçısıdır və prosesdə hər hansı fasilə olmayıb. Azərbaycanla əməkdaşlığın üstünlüyünü şərtləndirən digər amillər ondan ibarətdir ki, respublikamızın təbii qazının qiyməti digər mənbələrdən daxil olan qazdan ucuzdur. Eyni zamanda, Cənub Qaz Dəhlizi alternativ mənbə kimi çox mühüm əhəmiyyətə malikdir. Bu isə həm enerji təhlükəsizliyi, həm də regional iqtisadi sabitlik və inkişaf məsələsidir. Yeri gəlmişkən, məlumata əsasən, Azərbaycan 2022-ci ilin sonunadək Avropaya qaz tədarükünü ötən illə müqayisədə artırmağı planlaşdırır. 2021-ci ildə Avropaya 8,2 milyard kubmetr təbii qaz ixrac edilib. Bu il həmin göstəricinin 9,1 milyard kubmetrə çatdırılması planlaşdırılır. 2023-cü ildə isə Azərbaycanın Avropa ölkələrinə 11 milyard kubmetr qaz tədarük etməsi gözlənilir.

Bəhs olunan görüş zamanı regional təhlükəsizliyə dair fikir mübadiləsi də aparılıb. Bu, ilk növbədə, təhlükəsizlik məsələsində Cənubi Qafqazın lider dövlətinin Liderinin - Azərbaycan Prezidentinin fikir, rəy və mövqeyinin xüsusi nəzərə alındığını - əsas götürüldüyünü bir daha təsdiqləyir. Ölkələrin, təşkilatların rəsmi şəxslərinin regional təhlükəsizliklə bağlı - həm Cənubi Qafqazda postmüharibə reallıqları, həm də Rusiya-Ukrayna müharibəsi ilə əlaqədar Prezident İlham Əliyev ilə müzakirələr aparması Azərbaycanın bölgənin geosiyasi gündəliyini formalaşdıran əsas qüvvələrdən biri olduğunu göstərir - Bakının nüfuzunu - prestijini əks etdirir.

Nəticə etibarilə, İlham Əliyev ilə Şarl Mişelin görüşü, səmərəli fikir mübadiləsinin - müzakirələrin aparılması regionda sülh quruculuğu, təhlükəsizlik və əməkdaşlıq mühitinin yaradılması, eləcə də Azərbaycan-Aİ münasibətlərinin inkişafı baxımından əhəmiyyətlidir. Brüsseldən Bakıya geosiyasi baxış Azərbaycanın etibarlı və perspektivli tərəfdaş kimi qəbul olunduğunu göstərir.

Paylaş:

Baxılıb: 771 dəfə