XİN Ermənistanın riyakarlığını ifşa etdi

Bakı:

26 °C

47 %

1 m/s

Əlaqə

AZ RU EN

Ana səhifə / Siyasət / XİN Ermənistanın riyakarlığını ifşa etdi

XİN Ermənistanın riyakarlığını ifşa etdi

10.03.2023 [10:22]

Nardar BAYRAMLI

Ermənistan Qarabağ separatçılarını silahla təmin etməsini gizlətməyə çalışsa da, bu mümkün olan məsələ deyil. Azərbaycanın Müdafiə Nazirliyi tərəfindən erməni silahlı qüvvələrinin nəqliyyat vasitələrinin Xankəndi-Xəlfəli-Turşsu torpaq yolunda hərəkətinə dair videogörüntü yayılması qarşı tərəfin “kürkünə birə salıb”. Bu səbəbdən Ermənistan Xarici İşlər Nazirliyi martın 8-də tələsik bəyanat yayaraq həmin yoldan hərbi məqsədlər üçün istifadə etməsini “təkzib etməyə” çalışıb. Amma “təkzib” üçün konkret fakt ortaya qoya bilməyib. Əvəzində isə ölkəmizə qarşı əsassız iddialar səsləndirib. Məsələyə Azərbaycanın Xarici İşlər Nazirliyindən münasibət bildirilib. Qeyd olunub ki, ölkəmizə qarşı yalan və iftira dolu növbəti bəyanat Ermənistanın 30 ilə yaxın bir dövrdə həyata keçirdiyi işğal siyasətini, habelə hazırkı postmünaqişə dövründə Azərbaycana və azərbaycanlılara qarşı törətdiyi təxribatları ört-basdır etmək məqsədi daşıyır. Vurğulanıb ki, Silahlı Qüvvələrimizin bölmələrinin müşahidə kameraları tərəfindən qeydə alınmış və Azərbaycan Müdafiə Nazirliyi tərəfindən nümayiş etdirilmiş videoçəkilişdə açıq-aşkar erməni silahlı qüvvələrinin nəqliyyat vasitələrinin Xankəndi-Xəlfəli-Turşsu torpaq yolundan növbəti dəfə hərbi məqsədlər üçün istifadə etməsi faktının Ermənistan tərəfindən təkzib olunması riyakarlıqdır. Son 30 ildə beynəlxalq hüququn norma və prinsiplərini və 2020-ci il müharibəsindən sonra 10 noyabr tarixli üçtərəfli Bəyanat çərçivəsində üzərinə götürdüyü əksər öhdəlikləri kobud şəkildə pozan Ermənistanın torpaqlarını işğal etdiyi Azərbaycanı öhdəlikləri yerinə yetirməməkdə ittiham etməsi tamamilə əsassızdır. Eynilə, Beynəlxalq Ədalət Məhkəməsinin sonuncu qərarını təhrif etməyə və arzularını reallıq kimi təqdim etməyə çalışan rəsmi İrəvanın guya Azərbaycanın qərarı yerinə yetirməkdən boyun qaçırmasını iddia etməsi qəbulolunmazdır.

Absurd “etnik təmizləmə” iddiası...

Ümumiyyətlə, müstəqillik qazanan dövrdən beynəlxalq hüququn norma və prinsiplərinə zidd olaraq Azərbaycanın beynəlxalq tanınmış ərazilərinə qarşı hərbi təcavüz və kütləvi qırğınlar törədən, işğal altında olan şəhərləri və yüzlərlə kəndi viran qoyan, azərbaycanlılara qarşı etnik təmizləmə həyata keçirən, yüz minlərlə əhalini öz doğma torpaqlarından qovan, beynəlxalq təşkilatların bölgəyə missiyalarına maneçilik törədən Ermənistanın ərazilərimiz 2020-ci ildə işğaldan azad olunandan sonra beynəlxalq hüquqa istinad etməsi, beynəlxalq təşkilatlara üz tutması, habelə dövlətimizin guya bölgənin erməni sakinlərinə qarşı “etnik təmizləmə” və “soyqırım” həyata keçirməyə hazırlaşdığı iddiası absurddur. Azərbaycan dövlət səviyyəsində bəyan edib ki, Qarabağda yaşayan erməni sakinlərimiz Konstitusiyamıza uyğun olaraq digər vətəndaşlarımızla bərabər hüquqlara sahibdirlər. Qarabağdakı erməni sakinlərimizin Azərbaycan cəmiyyətinə inteqrasiyası onların sosial-iqtisadi rifahının yüksəlməsinə də ciddi təsir göstərəcək.

Gecikmiş etiraf, yoxsa gecikmiş təkzib?

Nə qədər absurd olsa da, rəsmi İrəvan Azərbaycanın Qarabağ ərazisində guya Ermənistan silahlı qüvvələrinin mövcud olmamasını iddia edir. Lakin Xarici İşlər Nazirliyimiz bu iddianı da əsassız hesab edir: “Bir daha xatırladırıq ki, Ermənistan nəinki indi, 30 ilə yaxın işğal dövründə belə Azərbaycan ərazilərini işğal etmədiklərini sübut etməyə çalışırdı. Halbuki, Azərbaycan ərazilərinin Ermənistan tərəfindən işğalı faktı, bütün qüvvələrini Azərbaycanın işğal olunmuş ərazilərində yerləşdirdiyi, idxal etdiyi əsas hərbi texnikanı Azərbaycan ərazisinə ötürdüyü, bütün qüvvələrin Ermənistan müdafiə nazirinə tabe olduğu, bir çox hərbçilərə qarşı məhz Ermənistan ərazisində cinayət işi açıldığı və həbs olunduqları bəllidir. Bununla yanaşı, Ermənistan siyasi rəhbərliyinin erməni qüvvələrinin Azərbaycan ərazisindən çıxarılmadığını etiraf etdiyi məlumdur. Habelə Qüvvələrin 2022-ci ilin sentyabr ayında çıxarılacağı bəyan edilsə də, bu hələ də baş verməyib. Azərbaycan ərazisindən hansı qüvvələrin çıxarılması barədə öhdəliyə gəldikdə isə bir daha xatırladırıq ki, 10 noyabr 2020-ci il Bəyanatının 4-cü bəndinə əsasən, məhz bütün erməni silahlı qüvvələrinin Azərbaycan ərazisindən çıxarılması nəzərdə tutulur və bu məsələdə manipulyasiyalar yolverilməzdir”.

Xarici İşlər Nazirliyi hesab edir ki, Ermənistan tərəfinin Azərbaycana qarşı təcavüz siyasətinin və qeyri-qanuni əməllərinin qarşısının alınması məqsədilə, Laçın yolunun başlanğıcında sərhəd-nəzarət keçid məntəqəsi yaradılması labüddür. Dövlətimiz bundan sonra da öz milli maraqlarının və təhlükəsizliyinin müdafiəsi məqsədilə bütün lazımi tədbirləri görməyə davam edəcək. Göründüyü kimi, erməni tərəfi öz qanunsuz əməllərini gizlətmək üçün Azərbaycanı əsassız olaraq ittiham etməyə və beynəlxalq miqyasda mənfi rəy formalaşdırmağa çalışır. Amma bu cəhdlərin hamısı əbəsdir.

Paylaş:

Baxılıb: 580 dəfə