Sosial problemlər Almaniyada etiraz aksiyalarının sayını artırır

Bakı:

24 °C

52 %

6 m/s

Əlaqə

AZ RU EN

Ana səhifə / Siyasət / Sosial problemlər Almaniyada etiraz aksiyalarının sayını artırır

Sosial problemlər Almaniyada etiraz aksiyalarının sayını artırır

11.04.2012 [00:06]

Xarici KİV-in məlumalarına görə, bu ölkədə kütləvi işsizlik mühiti var
Xəbər verdiyimiz kimi, Avropanın ən iri iqtisadiyyatına malik olan Almaniyada sosial-iqtisadi problemlərin artması cəmiyyət daxilində gərginliyi artırıb. Son vaxtlar Almaniyada iqtisadi böhran, işsizlik və digər sosial problemlərlə bağlı etiraz aksiyalarının sayı artıb. “www.reuters.com” yazır ki, Almaniyanın Frankfurt aeroportunda yerli əhali və xidməti heyətin iştirakı ilə aksiya keçirilib. Aksiyada iştirak edən minlərlə insan aviadaşınmalara tətbiq edilən rüsumun artmasına, həmçinin yeni uçuş-enmə zolağının tikintisində ekoloji standartlara əməl edilməməsinə qarşı narazılığını bildirib. Aksiya iştirakçıları deyiblər ki, tikinti zamanı inşaat normalarına riayət olunmur. Bu da ətrafda yaşayan insanlarda narahatlıq yaradır. Aeroport işçiləri isə əmək haqlarının artırılmasını tələb edirlər. Ekspertlər Frankfurt aeroportunda keçirilən aksiyanı bundan əvvəl həmkarlar ittifaqlarının 9 günlük tətilinin davamı kimi qiymətləndirirlər.
“www.reuters.com” həmçinin, yazır ki, Almaniyanın DBB və KOMBA həmkarlar ittifaqları qurumlarının təşkilatçılığı ilə ölkənin ən iri aeroportlarında tətillər keçirilir. Düsseldorf, Frankfurt, Köln, Münxen, Ştutqart, həmçinin Berlin aeroportları işçilərinin keçirdikləri tətil ölkədə 400-ə yaxın reysin təxirə salınması ilə nəticələnib. Onların əsas tələbi əmək haqlarının artırılması ilə bağlıdır. Xatırladaq ki, bir müddət əvvəl həmkarlar ittifaqları və işəgötürənlər arasında danışıqlar baş tutmuşdu. Lakin tətil iştirakçılarının əmək haqlarının 6,5 faiz artırmaq istəyi qarşılığında işəgötürənlərin cəmi 3,3 faiz artım təklif etməsi danışıqların nəticəsiz qalmasına səbəb olub. Məlumatda bildirilir ki, həmkarlar ittifaqları ölkə üzrə iki milyona yaxın dövlət qulluqçusu və xidmət sahəsi əməkdaşlarının hüququnu tələb edir. Həmkarlar ittifaqlarının nümayəndələri bildiriblər ki, işəgötürənlər onların tələblərini yerinə yetirməyəcəyi təqdirdə, ölkəni daha genişmiqyaslı tətillər gözləyir.
“www.euronews.net” internet portalında verilmiş yazıda isə bildirilir ki, Almaniyanın Schlecker şirkətinə aid olan kosmetik mağazalar şəbəkəsi 11 min qadın əməkdaşını işdən azad edib. Bu qərar federal torpaqların rəhbərliyi ilə aparılan danışıqların iflasından sonra verilib. Belə ki, Saksoniya, Aşağı Saksoniya və Bavariya hakimiyyətləri 70 milyon avro kredit üçün təminat verməkdən imtina ediblər. İmtinanın əsas səbəbkarı kimi Almaniya Azad Demokratlar Partiyası göstərilib. Lideri Almaniyanın hazırkı maliyyə naziri olan bu partiya kansler Angela Merkelin də təmsil olunduğu hakim Xristian Demokratlar Partiyası ilə koalisiyaya daxildir. İmtinanı şərh edən rəsmilər bildiriblər ki, işdən azad olunan qadınlar başqa sahələrdə asanlıqla iş tapa biləcəklər. Ancaq həmkarlar ittifaqlarında bu fikirlə razılaşmırlar. Onlar hesab edirlər ki, indiki vəziyyətdə qadınlara yeni iş yeri tapmaq asan olmayacaq. Almaniyada bu markaya daxil olan mağazaların böyük əksəriyyətinin bağlanacağı gözlənilir.
Bunlarla yanaşı, Almaniyada pərakəndə satışların və alıcılıq qabiliyyətinin azalması müşahidə olunur. Bu barədə məlumatı “www.bbc.com” yayıb. Müşahidə olunan azalma 2012-ci ilin əvvəlində istehlakçı xərclərinin iqtisadiyyata gözlənilən dəstəyi vermədiyini göstərir. ötən aylarda Almaniyada keçirilən sorğu nəticəsində sənaye müəssisələrinin birjalara olan etimadını doğrultduğunu göstərsə də, mütəxəssislər iqtisadi böhranın bundan sonrakı mərhələlərdə ölkədə bir çox sahələrdə geriləməyə gətirib çıxaracağını proqrnozlaşdırırlar. Onlar bu qənaətə ötən ilin nəticələrinə əsasən gəliblər. çünki 2011-ci ilin son rübündə Almaniya iqtisadiyyatı 0,2 faiz geriləyib. Bu göstərici Avrozona iqtisadiyyatının ən böyük ölkələrindən olan Almaniyanın böhran içərisində olduğunu sübut edir.
“www.reuters.com”un yazdığına görə isə, Almaniyada Avropa İttifaqının iqtisadi böhranın aradan qaldırılması siyasətinə qarşı etiraz aksiyaları keçirilib. Franfurktda təşkil olunan nümayişdə üç mindən çox insan iştirak edib. Aksiya iştirakçıları daha sonra Mərkəzi Avropa Bankının binasına yürüş ediblər. Etirazçılar mağaza və dükanların vitrinlərini sındırıb, kütləvi talanlar törədiblər. Aksiyanı dağıdan təhlükəsizlik qüvvələri ilə etirazçılar arasında güclü qarşıdurma yaranıb. Kütləni dağıtmaq üçün polis yüksək təzyiqli su şırnaqlarından və gözyaşardıcı qazdan istifadə edib. Bundan qəzəblənən nümayişçilər asayiş keşişçilərinə daş və içərisi boya ilə doldurulmuş şüşə qablar atıblar. Toqquşmalarda onlarca insan yaralanıb, 200-dən çox etirazçı həbs edilib.
RAMİL

Paylaş:

Baxılıb: 1003 dəfə