Ağcaqanadı qovur, insanı isə...

Bakı:

21 °C

78 %

5 m/s

Əlaqə

AZ RU EN

Ana səhifə / Sosial / Ağcaqanadı qovur, insanı isə...

Ağcaqanadı qovur, insanı isə...

23.07.2024 [11:05]

Həşəratlara qarşı dərmanların bilmədiyimiz ziyanları

Yay fəslinin ən çox istifadə edilən vasitələrindən biri də ağcaqanad və digər həşəratlar əleyhinə nəzərdə tutulan dərmanlardır. Bu günə kimi məişətdə xüsusi olaraq ağcaqanadlara qarşı bir neçə sınanmış vasitə tətbiq olunsa da, etiraf etməliyik ki, onların heç biri xüsusi kimyəvi tərkibli dərmanlar qədər effektiv olmayıb.

Ağcaqanad dərmanları müxtəlif formada olur. Son illər daha çox elektriklə işləyən adapter şəkilli aparatlardan istifadə olunur. Bu aparatlar da ya tablet şəkilli, ya mayeşəkilli dərmanla işlənənlərdir. Bir də xüsusi ağcaqanad qaçıran losyonlar, kremlər də dəbə minib.

Ağcaqanadla birgə uyuşan beynimiz...

Dərmanların nəticəsinin effektiv olması onların tərkibinə qatılan kimyəvi maddələrin bolluğundan asılıdır. Ağcaqanad dərmanlarının tərkibində daha çox “deet” (dietolyamid, ya da əsil adı diethyl meta-tolamide) və permetrin adlı kimyəvi maddələr var. “Deet” adlı maddə 1953-cü ildə kəşf olunmuş maddədir, bu maddə demək olar ki, həşəratlar əleyhinə istehsal edilən məhsulların tərkibində var. Bir müddət əvvəl fransalı Bruno Laped adlı alim bu maddənin insan beyni hüceyrəlinə məhfi təsiri barədə araşdırmasını ortaya qoydu. Nevrotoksik təsirə malik maddə sinir sistemini tədricən dağıtmaq gücünə malikdir.

İstifadəsi xeyli asan olan və ağcaqanadları bir göz qırpımında məhv edən bu vasitələr insan orqanizminə necə təsir göstərir?

Evdə körpə uşaq varsa...

Mövzu ilə bağlı sualımızı cavablandıran həkim-terapevt Mələk Zeynalova bildirib ki, həşəratlar əleyhinə olan dərmanlar insan orqanizminə bir o qədər də zərərli təsir göstərmir: “Amma əgər evdə körpə uşaq varsa, məsləhətdir ki, bu dərmanlardan mümkün qədər istifadə olunmasın. Çünki körpə uşaqların immun sistemi möhkəmlənməyib. Bu dərmanlar uşaqlarda ürəkbulanma, başgicəllənmə, qusmaya səbəb ola bilər. Böyüklərdə immun sistemi güclü olduğuna görə bu dərmanlar zərərli hesab olunmur. Allergiyası olan şəxslər də bu dərmanlardan istifadə edərkən ehtiyalı olmalıdırlar. Ağcaqanad dərmanları orqanizmdə allergiyanın güclənməsinə səbəb olur. Ümumiyyətlə, istifadə formasından asılı olmayaraq, bütün növ həşərat dərmanları orqanizm üçün zərərli hesab oluna bilər”.

Uşaq yatmazdan 3-4 saat əvvəl...

M.Zeynalova qeyd edib ki, həşərat əleyhinə olan dərmanların kimyəvi tərkibi tam müəyyən olunmayıb. Ona görə də bütün ehtimalları nəzərə alıb mütləq özümüzü qorumalıyıq: “Valideynlərə məsləhətim odur ki, uşaqların otağında bu dərmanlardan qətiyyən istifadə etməsinlər. Çox vacib olduqda isə yaxşı olar ki, həmin dərmanlar uşaq yatmazdan 3-4 saat əvvəl istifadə edilsin. Bir şeyi də nəzərə almaq lazımdır ki, dərman istifadə olunan zaman uşaqlar otaqda olmamalıdırlar. Ümumiyyətlə, məsləhətdir ki, dərman enerjidə taxılı olarkən otaqda heç kim olmasın. Çünki bu dərmanların həm də bakteriativ təsiri var”.

Sinir sisteminə mənfi təsir göstərir...

Həkimin sözlərinə görə, ağcaqanad dərmanlarının tərkibində toksiki maddələr daha çoxdur: “Xüsusən də tüstü şəklində yandırılan dərmanlarda toksiklik dərəcəsi yüksək olur. Onların tərkibində xüsusi maddələr var ki, həmin maddələr insanın daha çox sinir sisteminə mənfi təsir göstərir. Həşərat dərmanlarından zəhərlənmə zamanı ürəkbulanma, mədə ağrıları, halsızlıq, iştahasızlıq, müxtəlif dəri səpkiləri müşahidə olunur. Dərmanlar sinir sisteminə toksiki təsir göstərdikdə isə yuxululuq və yaxud da ayıqlıq baş verir. Bundan başqa, zəhərlənən insanın orqanizmində əzələ ağrıları da yaranır. Bəzən ağır reaksiyalar hətta qıcolmaya qədər gətirib çıxara bilir”.

Yeganə BAYRAMOVA

Paylaş:

Baxılıb: 608 dəfə