Mövsümi xəstəliklər...

Bakı:

25 °C

53 %

3 m/s

Əlaqə

AZ RU EN

Ana səhifə / Sosial / Mövsümi xəstəliklər...

Mövsümi xəstəliklər...

16.10.2024 [07:43]

Payız aylarında nələrə diqqət etməli?

Havaların soyuması, yağan yağışlar payızın nəfəsini hiss etdirir. Bu fəsli sevənlər çox olsa da, payızın gəlişi ilə bir sıra xəstəliklərin aktivləşməsinə şahid oluruq. Xüsusən də mədə-bağırsaq və müxtəlif infeksion xəstəliklər, soyuqdəymə, revmatizm və başqa xəstəliklər baş qaldırır. Belə havalarda isə hər bir detala, geyimə, qidaya xüsusi diqqət etmək lazım gəlir.

Son günlər azyaşlı uşaqlar və böyüklər arasında yüksək hərarət, öskürək, qusma, ishal kimi hallar günlərlə davam edir. Bəziləri iddia edir ki, bu, koronavirusun yeni ştammıdır. Yeni bir virusun yayıldığını ehtimal edənlər də var.

Xəstəlik bəzən boğulma, xırıltılı səslə müşahidə olunur. Hərarətsalıcılar və digər preparatlar yüksək temperaturun enməsinə, ümumiyyətlə, insanın sağalmasına kömək etmir. Son həftələrdə poliklinika və xəstəxanalara məhz bu əlamətlərlə müraciət edənlərin də sayı artıb.

Orqanizmin keçirdiyi bioloji stress...

Mövzu barədə “Yeni Azərbaycan”a açıqlama verən infeksionist-həkim Mərdan Əliyev payız aylarının xüsusilə də mədə-bağırsaq xəstəliklərinin fəallaşması, həmçinin mədə xorasının kənkinləşməsi ilə müşahidə olunduğunu bildirib: “Xüsusilə sentyabr-oktyabr aylarında havada olan təlatümlər, dəyişmələr insanların adaptasiyasını ortaya çıxaran situasiyalar baş verir. Payız vaxtı mədə-bağırsaq xəstəliklərinin fəallaşması, mədə xorasının kənkinləşməsi müşahidə olunur. Bu, əslində orqanizmin keçirdiyi bioloji stressdir. Yeni dövrə adaptasiya olunur və həmin adaptasiya prosesləri özünü bəzi xəstəliklərinin kəskinləşməsi ilə ortaya qoyur.

Payız vaxtı havada olan kəskin dəyişmələr zamanı insanların geyimlərini düzgün seçməməsi də soyuqdəyməyə səbəb olur. Ən əsası qan təzyiqi olan, bronxial astması olan, şəkərli diabeti olan, bəzi yanaşı ağır xəstəlikləri olanlar belə fəsil dəyişmələrində mütləq öz həkimləri ilə məsləhətləşməlidirlər. Çünki aparılan müşahidələr göstərir ki, müəyyən xəstəliklərin ağırlaşmalarına məhz fəsil dəyişmələrində daha çox təsadüf olunur. Nəzərə alaq ki, payız qışa doğru gedir və soyuq havalar başlayır. Buna görə də soyuqdəymələr baş verir. İnsanlar bunu nəzərə almalıdır və öz sağlamlıqlarının qayğısına qalmalıdırlar. İdmanla məşğul olmalı, qidalanma tərzini düzgün seçməli, təmiz havada çox gəzməlidirlər. Geyim forması da düzgün seçilməlidir. Bütün bunlar şərtdir”.

Bədəni qışa hazırlamaq lazımdır

Payız mövsümündə qidalanmaya gəlincə, infeksionist hər mövsümün özünə uyğun qidası olduğunu qeyd edib: “İnsanlar bəzən süni qidalara və yaxud saxlanılan və mövsümə aid olmayan qidalara üstünlük verirlər. Texniki imkanlar artdıqca ərzaqları il boyunca saxlamaq da olur. Amma düşünürəm ki, mövsümi qidalardan istifadə etmək lazımdır. Payız mövsümünün də öz meyvələri, vitaminli qidaları var ki, onlardan istifadə etmək lazımdır. Qışda tədricən vitamin çatışmazlığı olur. Ona görə də indi bol-bol vitaminli qidalar qəbul etmək lazımdır ki, bədən qışa hazır olsun”.

Planlı qidalanma vacibdir!

Həkimin sözlərinə görə, payız aylarında immuniteti qoruyaraq, daha da gücləndirmək üçün təsiredici vasitələrdən biri yetərincə və planlı qidalanmaqdır: “Xüsusilə, infeksiyalara qarşı daha həssas olan uşaqlar, hamilə qadınlar, süd verən analar və yaşlılar üçün düzgün qidalanma daha çox önəmlidir. Bədənin vitamin və mineral ehtiyacını ödəmək lazımdır. Düzgün qidalanma, gün ərzində hər növ qidadan kifayət qədər qəbul etməklə mümkündür. Beləliklə, ehtiyacımız olan zülal, karbohidrat, yağ, vitamin və mineralları da qəbul etmiş oluruq”.

Zamanında tədbir görülməsə...

İnfeksionist qeyd edib ki, payız aylarında insan sağlamlığının birinci düşməni nəfəs yollarının infeksiyasıdır. Bu infeksiyalar xüsusilə, uşaqlara, yaşlılara və hamilə qadınlara daha pis təsir edir: “Belə halda qrip, faringit, sinuzit, orta qulaq iltihabı, bronxit, haymorit kimi xəstəliklərin yayılma riski də artır. Payızda şikayətlərin bir qismi də kəskin respirator virus xəstəlikləri ilə bağlı olur. Bu, iki yüzə qədər fərqli törədicilər tərəfindən baş verə bilər. Xəstəlik halsızlıq, burunaxma, boğazda ağrı, əzginlik, iştahsızlıq və hərarət şəklində özünü büruzə verir. Əgər zamanında düzgün və lazımi tədbirlər görülməsə, sətəlcəm, otit və sinusit kimi ağırlaşmalara gətirib çıxara bilər”.

Yeganə BAYRAMOVA

Paylaş:

Baxılıb: 560 dəfə