Avqustun 12-si Beynəlxalq Gənclər Günüdür

Bakı:

26 °C

49 %

0 m/s

Əlaqə

AZ RU EN

Ana səhifə / Sosial / Avqustun 12-si Beynəlxalq Gənclər Günüdür

Avqustun 12-si Beynəlxalq Gənclər Günüdür

12.08.2025 [15:35]

Hər il avqustun 12-də Beynəlxalq Gənclər Günü qeyd edilir. Bu günün təsis olunması barədə qərar 1998-ci ildə Gənclərin İşləri üzrə Nazirlərin Ümumdünya konfransında qəbul edilib və BMT Baş Assambleyasının 1999-cu il 17 dekabr tarixli qətnaməsi ilə rəsmiləşdirilib. Bu günün əsas məqsədi gənclərin ictimai həyatın müxtəlif sahələrində fəal iştirakına təkan vermək, onların nailiyyətlərini tanıtmaq və qarşılaşdıqları problemlərin həlli istiqamətində beynəlxalq əməkdaşlığı gücləndirməkdir. Qeyd edək ki, 1997-ci ildə Ümummilli Lider Heydər Əliyevin Fərmanı ilə fevralın 2-si Azərbaycan Gəncləri Günü elan edilib. Bu addım MDB məkanında və Şərqi Avropa ölkələri arasında analoqu olmayan bir təşəbbüs olub.

Azərbaycanda dövlət gənclər siyasətinin təməli Ulu Öndər Heydər Əliyev tərəfindən qoyulub. Ümummilli Liderin rəhbərliyi ilə qəbul edilmiş qanunlar, fərmanlar, dövlət proqramları gənclərin sosial, iqtisadi, mədəni və mənəvi inkişafına güclü təkan verib. 1997-ci ildə təsis olunan Azərbaycan Gəncləri Günü gənclərin cəmiyyətin mühüm təbəqəsi kimi formalaşmasına və onların milli-mənəvi dəyərlərə bağlılığının güclənməsinə töhfə verib.

Ulu Öndərin siyasətində gənclərin təhsilinə, peşə hazırlığına, sağlam həyat tərzinin təşviqinə xüsusi önəm verilib. Bu istiqamətdə həyata keçirilən tədbirlər nəticəsində gənclər yalnız ölkə daxilində deyil, beynəlxalq miqyasda da uğurlar qazanıblar. Prezident İlham Əliyevin rəhbərliyi ilə gənclər siyasəti yeni mərhələyə qədəm qoyub, “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” kimi mühüm layihələr reallaşdırılıb. Bu proqram çərçivəsində minlərlə gənc dünyanın nüfuzlu ali məktəblərində təhsil almaq imkanı əldə edib.

İdmanın inkişafına yönəlik dövlət siyasəti də gənclərin potensialının reallaşdırılmasında mühüm rol oynayıb. Prezident İlham Əliyevin təşəbbüsü ilə ölkədə 50-yə yaxın Olimpiya İdman Kompleksi inşa edilib, Azərbaycan beynəlxalq idman yarışlarının keçirildiyi mərkəzə çevrilib. Qazanılan beynəlxalq uğurlar gənclərin motivasiyasını artırıb, onların milli qürur hissini gücləndirib.

Müasir mərhələdə gənclərin rolu və perspektivləri

XXI əsrdə qlobal iqtisadi və texnoloji dəyişikliklər Azərbaycan gənclərinin qarşısında yeni imkanlar və vəzifələr açıb. 2015-ci ildə təsdiq edilmiş “2015-2025-ci illərdə Azərbaycan gənclərinin İnkişaf Strategiyası” gənclərin intellektual, fiziki və mənəvi potensialının artırılmasına, onların sosial-iqtisadi və mədəni həyatdakı rolunun möhkəmləndirilməsinə yönəlib. Sənədin əsas məqsədi innovativ düşüncəyə malik, yaradıcı və rəqabətqabiliyyətli gənc nəslin formalaşdırılmasıdır.

Azərbaycan gəncləri yalnız təhsil və idman sahələrində deyil, həm də ictimai-siyasi proseslərdə fəal iştirak edirlər. 2020-ci il Vətən müharibəsində gənc hərbçilərimizin göstərdiyi qəhrəmanlıq, onların adlarını xalqımızın müasir tarixində əbədi olaraq yazdırıb. Bununla yanaşı, arxa cəbhədə fəaliyyət göstərən gənclər də informasiya müharibəsində mühüm rol oynayıb, ölkəmizin haqlı mövqeyini beynəlxalq ictimaiyyətə çatdırıblar.

Dövlətin dəstəyi ilə həyata keçirilən “Yüksəliş” müsabiqəsi, Gənclərin İnkişaf və Karyera Mərkəzlərinin yaradılması və könüllülük hərəkatının genişləndirilməsi gənclərin liderlik və idarəçilik bacarıqlarını inkişaf etdirməkdədir. Xüsusən “Könüllülər ili” çərçivəsində icra edilən sosial layihələr gənclərin həm yerli, həm də beynəlxalq səviyyədə fəallığını artırıb.

Pandemiya dövründə gənclərin göstərdiyi sosial həmrəylik də dövlət-gənclər münasibətlərinin yüksək səviyyəsini nümayiş etdirib. Onlar maarifləndirmə kampaniyaları, sosial yardımlar və könüllü fəaliyyətlərlə həmrəylik nümunəsi göstəriblər.

Bu gün Azərbaycan gəncliyi dövlətin əsas strateji resurslarından biri kimi qəbul olunur. Onların milli dəyərlərə sadiqliyi, modern düşüncəsi və inkişafyönümlü fəaliyyəti ölkənin sabit və dinamik inkişafına töhfə verir. Prezident İlham Əliyevin “Mənim gənclərə xüsusi münasibətim var, mənim ürəyim sizinlədir. Siz bütün işlərdə mənə arxalana bilərsiniz. Mən də sizə arxalanıram” fikri dövlətin gənclərə inamının və etimadının rəmzi kimi tarixə düşüb.

Paylaş:

Baxılıb: 408 dəfə