Babək Məmmədzadə: Azərbaycan-Türkiyə əlaqələrinin inkişafında gənclərin də özünəməxsus rolu var

Bakı:

21 °C

83 %

5 m/s

Əlaqə

AZ RU EN

Ana səhifə / Sosial / Babək Məmmədzadə: Azərbaycan-Türkiyə əlaqələrinin inkişafında gənclərin də özünəməxsus rolu var

Babək Məmmədzadə: Azərbaycan-Türkiyə əlaqələrinin inkişafında gənclərin də özünəməxsus rolu var

08.09.2015 [10:04]

“Ümummilli lider Heydər Əliyevin ifadə etdiyi “Bir millət, iki dövlət” prinsipinə sadiq qalaraq Azərbaycan-Türkiyə əlaqələrinin dinamik inkişafı hər iki millətin rifahına, iqtisadi, siyasi və mədəni sahədə qarşılıqlı maraqlarının təminatına xidmət etməkdədir. Eyni zamanda, gənclərin dövlətçilik maraqlarına xidmət göstərməsində, milli məfkurənin və yüksək vətənpərvərlik ruhunun aşılanmasında dövlət rəhbərlərinin rolu əvəzolunmazdır”. Bu fikirləri Yeni Azərbaycan Partiyası (YAP) Gənclər Birliyinin İdarə Heyətinin üzvü Babək Məmmədzadə deyib.
B.Məmmədzadə bildirib ki, Ümummilli liderin əsasını qoyduğu gənclər siyasəti məhz bu amalı özündə ehtiva edir və qardaş dövlətlərin gənclərinin birlikdə səmərəli fəaliyyət göstərməsi üçün zəmin yaradır. Onun sözlərinə görə, təsadüfi deyil ki, bu münasibətlərin sabit inkişafına hər iki dövlətin məsul gənclər təşkilatları da xüsusi töhfə verir.
“Ulu öndər deyirdi ki, “Azərbaycan-Türkiyə münasibətləri iki qardaş xalqın mənafelərinə xidmət etməklə yanaşı dünyada və bölgədə sülhün və əmin-amanlığın bərqərar olması işinə də öz töhfəsini verir”. Mustafa Kamal Atatürk isə “Azərbaycanın sevinci bizim sevincimiz, kədəri bizim kədərimizdir”, - deyə vurğulayıb. Bu kəlamlar münasibətlərimizin yüksək səviyyəsini özündə ehtiva edir. Bu yaxınlarda YAP Gənclər Birliyinin Ankara səfəri ikitərəfli münasibətlərdə gənclərin rolunu önəmsəyir. Hər iki tərəfdən gənclərin məsul şəxslərlə görüşü və ikitərəfli maraqlara xidmət edən məsələlərin müzakirəsi gənclərin bu missiyada önəmli rolunu göstərir. Səfər çərçivəsində Türkiyə xarici işlər naziri Mövlut Çavuşoğlu və TBMM-in sədri İsmət Yılmazla görüşlər səfərin əhəmiyyətini əyani şəkildə nümayiş etdirir. Azərbaycan və Türkiyə gənclərinin müxtəlif mübadilə proqramlarında və elmi konfranslarda iştirakı, hər iki dövlət üçün önəmli hadisələrin birgə anılması bu münasibətlərin siyasi maraqlara xidmət etdiyini deyil, eyni dil və kökə sahib olan iki millətin xoş və acı xatirələrini paylaşması, bir-birini müxtəlif məzmunda dəstəkləməsi kimi anlaşılır. Təhsil və mübadilə proqramları hər iki dövlətin mənafelərinə xidmət etməklə yanaşı, gənclərin milli ruhda böyüməsinə yardımçı olur. Qürurverici haldır ki, gənclər birgə tarixin araşdırılmasında birbaşa iştirak edir və arxiv sənədləri əsasında öz tarixini elmi cəhətdən araşdırır. Azərbaycan Milli Elmlər Akademiyasının Tarix İnstitutunda Azərbaycan tarixini araşdıran türk tələbələrin mövcudluğu və Türkiyə təhsil müəssisələrində azərbaycanlı tələbələrin və doktorantların nailiyyətləri bu millətin insan kapitalının dəyərindən xəbər verir”, - deyə B.Məmmədzadə vurğulayıb.
O qeyd edib ki, Xocalı soyqırımının ildönümü ilə əlaqədar ölkə hüdudlarından kənarda tədbirlərin təşkilində Azərbaycan və Türkiyə gənclərinin əməyi danılmazdır. Bununla yanaşı, Çanaqqalada şəhid olmuş türk əsgərlərinin xatirəsinə həsr olunmuş tədbirlər mütəmadi olaraq təşkil edilir. Qondarma “erməni soyqırımı”nın tanınmasına etiraz olaraq dinc etiraz aksiyalarının keçirilməsi də birgə fəaliyyətin məhsulu kimi dəyərləndirilir.
“Bakı-2015” ilk Avropa Oyunlarında Türkiyə tərəfinin geniş tərkibdə iştirakı, həmçinin, Azərbaycan və Türkiyə idmançılarının qalib gələrkən hər iki bayraqla meydana çıxması birgə düşüncənin və ruhun təzahürü kimi qiymətləndirilir. Digər sahələrdə olduğu kimi, təhsil sahəsində də dinamik əlaqələrin mövcudluğu hər iki ölkənin gəncləri arasında səmərəli münasibətlərin davamlılığına şərait yaradır. Gələcəkdə gənclərin hər iki ölkənin siyasi həyatında qərarverici gücə çevriləcəyini nəzərə alaraq bu münasibətlərin iki ölkə arasında əməkdaşlığın gələcəyi üçün nəzərəçarpacaq dərəcədə əhəmiyyətli olduğu anlaşılır. Bu düşüncədən çıxış edərək əminəm ki, bizim kimi gənclər ikitərəfli münasibətlərin gənclər sektorunda davamlı inkişafına töhfə verməklə yanaşı, bu sahədə beynəlxalq təcrübənin mühitə uyğunlaşdırılmış formasının tətbiqi ilə eyni dil və düşüncəyə malik gənclərin ortaq fəaliyyətinə müsbət təsir edəcək və gələcəyə baxışını formalaşdırmaqda yardımçı olacaq”, - deyə B.Məmmədzadə vurğulayıb.

Paylaş:

Baxılıb: 1008 dəfə