Yeni mədəniyyət portalı təqdim olundu

Bakı:

18 °C

94 %

2 m/s

Əlaqə

AZ RU EN

Ana səhifə / Sosial / Yeni mədəniyyət portalı təqdim olundu

Yeni mədəniyyət portalı təqdim olundu

10.09.2015 [10:12]

Kamal Abdullayev: Azərbaycan burada yaşayan bütün xalqların böyük ailəsidir
Azərbaycan Yaradıcılıq Fondu (AYF) www.sim-sim.az mədəniyyət portalı ilə çoxsaylı oxucu-izləyici auditoriyasının görüşünə gəlir. Dünən Bakı Beynəlxalq Multikulturalizm Mərkəzində Azərbaycan Respublikasının millətlərarası, multikulturalizm və dini məsələlər üzrə Dövlət müşaviri Kamal Abdullayevin iştirakı ilə saytın təqdimatı keçirilib.
Təqdimatda bildirilib ki, yeni mədəniyyət portalı öz izləyicilərinə gündəlik köşə, araşdırma, esse, poeziya və nəsr nümunələri, eləcə də kino, teatr, musiqi, rəssamlıq, memarlıq və incəsənətin digər sahələrinə aid əhatəli məqalələr təqdim etməyi nəzərdə tutur. Portalda həmçinin ölkəmizdə və xaricdə çap olunmuş kitablar haqqında resenziyalara, tanınmış mədəniyyət və incəsənət xadimləri ilə müsahibələrə, müzakirə və debatlara, dünya mədəni irsindən tərcümələrə də geniş yer ayrılacaq.
Qeyd edək ki, yeni portalın təsisçisi olan Azərbaycan Yaradıcılıq Fondu 1987-ci ildə Ümumittifaq Mədəniyyət Fondunun filialı kimi təsis edilib və 2008-ci ilə qədər “Azərbaycan Mədəniyyət Fondu” adı altında fəaliyyət göstərib. Qurum 2008-ci ildən etibarən Azərbaycan Yaradıcılıq Fondu adlanır. Fondun ilk fəxri sədri Azərbaycanın görkəmli ziyalısı Bəkir Nəbiyev olub. Fondun 1991-ci ildə keçirilən 2-ci konfransında professor Kamal Abdullayev qurumun yeni sədri seçilib.
Təqdimat mərasimində çıxış edən Azərbaycan Respublikasının millətlərarası, multikulturalizm və dini məsələlər üzrə Dövlət müşaviri Kamal Abdullayev yeni mədəniyyət portalının fəaliyyətə başlamasını təqdirəlayiq hal kimi dəyərləndirib. Dövlət müşaviri yeni saytın zəngin mədəniyyətimizin və Azərbaycanın malik olduğu multikultural dəyərlərin təbliğində vacib rol oynayacağına əminliyini ifadə edib. Dövlət müşaviri Azərbaycan multikulturalizminin ədəbi, elmi-fəlsəfi və siyasi qaynaqlarının araşdırılmasında da saytın üzərinə böyük məsuliyyət düşdüyünü diqqətə çatdırıb. Azərbaycanı burada yaşayan xalqların böyük ailəsi kimi səciyyələndirən K.Abdullayev bildirib ki, Prezident İlham Əliyevin siyasi iradəsinə uyğun olaraq ölkəmizə xas olan multikultural ənənələrin daha da zənginləşməsi üçün ardıcıl tədbirlər həyata keçirilir. “Bu gün Azərbaycan dünyaya özünü tolerantlıq, fərqli mədəniyyətlərə dözümlü yanaşma nümunəsi kimi təqdim edir. Azərbaycan mühitində biz başqa xalqlara, fərqli dinlərə düşmən münasibəti bəslənməsi kimi hallara rast gəlmirik. Biz Azərbaycanı bölmürük. Respublikamız elə bir nümunəvi tolerantlıq məkanıdır ki, burada insanlar müxtəlif milli mənsubiyyətə malik olduqlarının fərqində deyillər”, - deyə K.Abdullayev vurğulayıb. Dövlət müşaviri bildirib ki, elə Azərbaycan mədəniyyətində və ədəbiyyatında da bu gün cəmiyyətimizin üstün dəyəri kimi təbliğ olunan tolerantlığa aid çoxlu nümunələrə rast gəlmək mümkündür. Nizami Gəncəvinin, Məhəmməd Füzulinin, Saib Təbrizinin, Hüseyn Cavidin və digər şair və yazıçılarımızın əsərlərindən sitatlar gətirən K.Abdullayev onu da vurğulayıb ki, müasir Azərbaycan ədəbiyyatında da xalqımıza xas olan tolerantlıq ənənələri bədii çalarlarla oxuculara çatdırılır.
Dövlət müşaviri həmçinin Azərbaycandakı tolerantlıq mühitinin, bu sahədəki ənənələrimizin təbliği məqsədilə yaxın və uzaq perspektivdə görüləcək işlər barədə də məlumat verib. Dövlət müşaviri hazırda 3 kitab üzərində iş aparıldığını bildirib. Yaxın gələcəkdə oxuculara təqdim olunacaq birinci kitab “Azərbaycan multikulturalizmi: ədəbi-bədii qaynaqlar” adlanır.
Mübariz ABDULLAYEV

Paylaş:

Baxılıb: 1000 dəfə