Süni qiymət artımına qarşı mübarizə nəticə verir: bazarlarda qiymətlər sabitləşir

Bakı:

11 °C

82 %

8 m/s

Əlaqə

AZ RU EN

Ana səhifə / Sosial / Süni qiymət artımına qarşı mübarizə nəticə verir: bazarlarda qiymətlər sabitləşir

Süni qiymət artımına qarşı mübarizə nəticə verir: bazarlarda qiymətlər sabitləşir

15.01.2016 [09:34]

Müvafiq cəza tədbirləri ilə yanaşı, institusional işlər də süni qiymət artımı və inhisarçılığa qarşı mübarizənin səmərəli olmasını şərtləndirir
Azərbaycanda həyata keçirilən davamlı islahatlar müəyyən olunmuş hədəflərə çatmaq üçün strateji zəmin formalaşdırır. Təsadüfi deyil ki, məhz ardıcıl sosial-iqtisadi islahatlar sayəsində ölkəmizdə ayrı-ayrı sahələrin inkişafına nail olunub və bu, beynəlxalq miqyasda da müsbət qiymətləndirilir. Amma bütün bunlara rəğmən, müəyyən siyasi səbəblərdən dünya iqtisadiyyatında baş verən geriləmələr, o cümlədən qlobal maliyyə bazarında cərəyan edən neqativ tendensiyalar bir sıra ölkələr kimi Azərbaycana da təsir edib. Xüsusilə də, ötən ilin sonunda neftin qiymətinin ucuzlaşmasının davam etməsi Mərkəzi Bank tərəfindən yeni məzənnə siyasətinə keçidlə nəticələndi və bu, milli valyutamız olan manatın dollar və avroya nisbətdə ucuzlaşmasına gətirib çıxardı. Təbii ki, manatın dollara qarşı ucuzlaşmasından sonra idxal olunan məhsullar üzrə qiymət artımı gözlənilən idi, amma bahalaşma ölkədə istehsal olunan mallara da sirayət etdi. Daha dəqiq desək, bəzi işbazlar devalvasiyadan sonra xüsusilə də istehlak məhsulları üzərində süni qiymət artımına yol verməklə ajiotaj yaratmağa çalışdılar. Amma dövlət tərəfindən süni qiymət artımının qarşısının alınması üçün müvafiq tədbirlər görüldü, eləcə də inhisarçılıq və bu kimi digər hallara qarşı mübarizə daha da gücləndirildi.
Hazırda istehlak mallarının qiymətlərinin süni şəkildə qaldırılması cəhdlərinə qarşı sistemli mübarizə aparılır, müvafiq tədbirlər görülür. Prezident İlham Əliyev Nazirlər Kabinetinin 2015-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında çıxışı zamanı bu məsələyə toxunaraq qeyd etmişdi ki, istehlak qiymətlərinə çox ciddi nəzarət etmək lazımdır: “Manatın məzənnəsinin dəyişməsi ilə bağlı bəzi işbazlar qiymətləri süni şəkildə qaldırmaq istəyirlər. Əlbəttə ki, biz ərzaq məhsulları ilə bağlı müəyyən dərəcədə idxaldan asılıyıq. Hələ ki, özümüzü tam 100 faiz təmin edə bilməmişik. Ancaq o məhsullar ki, Azərbaycanda istehsal olunur, orada qiymət artımı ümumiyyətlə mümkün deyil, olmamalıdır. Ümumiyyətlə, mən bilirəm, məlumat da gəlir ki, natəmiz insanlar, işbazlar bax bu məzənnə məsələsindən sui-istifadə etmək istəyirlər. Buna son qoyulmalıdır. Süni bahalaşmaya son qoyulmalıdır və burada çox ciddi cəza tədbirləri görülməlidir”.
Qeyd edək ki, müvafiq cəza tədbirləri ilə yanaşı, institusional işlər də süni qiymət artımı və inhisarçılığa qarşı mübarizənin səmərəli olmasını şərtləndirir. Xəbər verildiyi kimi, manatın kursunda baş vermiş dəyişiklikdən sonra süni qiymət artımı, məqsədli mal qıtlığı yaradılması və digər sui-istifadə cəhdlərinin qarşısının alınması üçün İqtisadiyyat və Sənaye Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti və Baş Prokuror yanında Korrupsiyaya Qarşı Mübarizə Baş İdarəsi tərəfindən birgə Tədbirlər Planı hazırlanır. Süni qiymət artımı və mal qıtlığı yaratmaqla vəziyyətdən sui-istifadə edən təsərrüfat subyektləri barədə, habelə inhisarçılıq və korrupsiya kimi neqativ halların vaxtında aşkar edilərək qarşısının alınması məqsədilə tədbirlər həyata keçirilməklə qanun pozuntularına yol vermiş şəxslər barəsində ən ciddi tədbirlər görüləcək.
Artıq süni qiymət artımına qarşı mübarizə nəticə verir: bazarlarda qiymətlər sabitləşir. Paralel olaraq gömrük, vergi sistemində maksimum şəffaflığın təmin olunması, inhisarçılığın aradan qaldırılması istiqamətində ardıcıl addımların atılması diqqət mərkəzindədir. Bir sözlə, dövlət tərəfindən müvafiq tədbirlər davam etdirilir. Prezident İlham Əliyevin qeyd etdiyi kimi: “Biz bundan sonra iqtisadi liberallaşma siyasətini daha da ciddi şəkildə aparmalıyıq. Xüsusilə, inhisarçılığa qarşı mübarizə daha da ciddi olacaq. Həm idxalda, həm yerli istehsalda inhisarçılığa yol verilməməlidir. Heç kimin burada xüsusi imtiyazı yoxdur, ola da bilməz. Kim dövlət büdcəsinə daxilolmaların qarşısını alacaqsa, cəzalandırılacaq. Ona görə gömrük, vergi sistemində maksimum şəffaflıq təmin edilməlidir və ediləcəkdir”.
NURLAN

Paylaş:

Baxılıb: 648 dəfə