Bərdə məktəbliləri İsmayıllı-Qəbələ-Şəki bölgəsi ilə tanışlıq imkanı əldə ediblər

Bakı:

28 °C

54 %

5 m/s

Əlaqə

AZ RU EN

Ana səhifə / Sosial / Bərdə məktəbliləri İsmayıllı-Qəbələ-Şəki bölgəsi ilə tanışlıq imkanı əldə ediblər

Bərdə məktəbliləri İsmayıllı-Qəbələ-Şəki bölgəsi ilə tanışlıq imkanı əldə ediblər

17.03.2016 [10:08]

Martın 16-da Bərdə rayonunun mərkəzi meydanında rayonun rəhbər işçiləri, müəllimlər və valideynlər “Ölkəmizi tanıyaq” layihəsi çərçivəsində təşkil olunmuş maarifləndirici tur-aksiyada iştirak edən məktəbliləri İsmayıllı-Qəbələ-Şəki marşrutu istiqamətində yola salıblar.
AZƏRTAC xəbər verir ki, şagirdlər əvvəlcə Ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad ediblər.
Mərasimdə çıxış edən Bərdə rayon İcra Hakimiyyəti başçısının müavini, Yeni Azərbaycan Partiyası rayon təşkilatının sədri Fəqət Şadlinskaya ölkəmizdə gənclərin hərtərəfli inkişafı üçün yaradılan şəraitdən, onlara göstərilən dövlət qayğısından bəhs edib, belə layihələrin yeniyetmə və gənclərin vətənpərvərlik tərbiyəsinin daha da yüksəldilməsində, dünyagörüşünün formalaşmasında mühüm rol oynadığını vurğulayıb.
Qrupun rəhbəri, Bərdə şəhər Zərifə Əliyeva adına məktəb-liseyin müəllimi Tamella Əliyeva AZƏRTAC-a müsahibəsində deyib: “Ölkəmizin tarixini, mədəniyyətini, adət-ənənələrini öyrənmək məqsədilə respublikamızın müxtəlif şəhər və rayonlarında yaşayan məktəblilərin digər bölgələrə səyahətlərinin təşkil edilməsinin böyük əhəmiyyəti var. Bu səyahətlər zamanı onlar ölkəmizi daha yaxından tanıyır, dünyagörüşlərini zənginləşdirirlər. İnanıram ki, bu səfər şagirdlərin tədrisdə əldə etdikləri nəzəri biliklərin möhkəmləndirilməsində mühüm rol oynayacaq”.
Qaradəmirçi kənd tam orta məktəbin IX sinif şagirdi Fidan Nəsirli tur-aksiyada iştirak etdiyinə görə çox sevindiyini deyib: “Yola düşdüyümüz bölgənin təbiəti, tarixi abidələri haqqında çox eşitmişəm. Xüsusən Lahıc qəsəbəsini, “Qəbələnd” istirahət mərkəzini, “Tufandağ” xizəkçilik kompleksini, Şəki Xan Sarayını görmək arzusunda idim. Arzuma çatdığım üçün çox sevinirəm”.
Bərdə şəhər inküliziv tam orta məktəbin IX sinif şagirdi Turan Eyvazlı fikirlərini belə ifadə edib: “Qədim Bərdə tarixi abidələrlə zəngindir. Şəhərimiz gündən-günə müasirləşir, gözəlləşir. Bilirəm ki, səfər edəcəyimiz İsmayıllı, Qəbələ və Şəki rayonları da öz gözəlliyi, qədim tarixi və abidələri ilə məşhurdur. Bizi qarşıda çox maraqlı səfər gözləyir. Bu şəraiti yaratdığına görə şagird dostlarım adından dövlətimizin başçısına minnətdarlığımı bildirirəm”.
Mərasim başa çatdıqdan sonra 40 şagird onlar üçün ayrılmış avtobusla İsmayıllı-Qəbələ-Şəki marşrutu üzrə yola çıxıblar.

Paylaş:

Baxılıb: 978 dəfə