Təhsil Nazirliyindən tələbələrə növbəti güzəştli addım

Bakı:

12 °C

94 %

2 m/s

Əlaqə

AZ RU EN

Ana səhifə / Sosial / Təhsil Nazirliyindən tələbələrə növbəti güzəştli addım

Təhsil Nazirliyindən tələbələrə növbəti güzəştli addım

07.06.2016 [10:08]

Azərbaycanın 10 müxtəlif ali məktəbində təhsil alan və təhsil haqqını ödəməkdə çətinlik çəkən aztəminatlı ailələrdən olan tələbələrə uzunmüddətli güzəştli kreditlər təqdim olunur
İyunun 6-da Təhsil Nazirliyində Maarifçi Tələbə Kredit Fondunun fəaliyyətə başlamasına və qurumun saytının istifadəyə verilməsinə həsr olunmuş media-brifinq keçirilib. Tədbirdə çıxış edən nazirliyin İctimaiyyətlə əlaqələr sektorunun müdiri Cəsarət Valehov məlumat verib ki, Təhsil Nazirliyinin təşəbbüsü ilə yaradılmış Maarifçi Tələbə Kredit Fondu dövlət ali təhsil müəssisələri - Azərbaycan Dillər Universiteti, Azərbaycan Dövlət Pedaqoji Universiteti, Azərbaycan Dövlət Neft və Sənaye Universiteti, Azərbaycan Texniki Universiteti, Azərbaycan Dövlət İqtisad Universiteti, Azərbaycan Memarlıq və İnşaat Universiteti, Bakı Dövlət Universiteti, Bakı Slavyan Universiteti, Gəncə Dövlət Universiteti və Sumqayıt Dövlət Universiteti tərəfindən təsis olunub.
Hansı tələbələr kredit üçün müraciət edə bilərlər?
Tədbirdə çıxış edən fondun icraçı direktoru Rüfət Mahmud deyib ki, rəhbərlik etdiyi qurumun əsas missiyası təhsil haqqını ödəməkdə çətinlik çəkən aztəminatlı ailələrdən olan tələbələrə uzunmüddətli güzəştli kreditlər verilməsi vasitəsilə onlara ali təhsil almaqda bərabər imkanların yaradılmasıdır. Kredit verilməsi qaydaları və şərtləri haqqında danışan icraçı direktorun sözlərinə görə, kreditlər üçün müraciət edən tələbələr müəyyən ümumi tələblərə cavab verməlidirlər. Belə ki, fonda Azərbaycan Respublikasının vətəndaşı olan, müvafiq təsisçi universitetlərin birində - yuxarıda adları qeyd olunan 10 universitetin birində təhsil alan və təhsilini davam etdirmək üçün maliyyə yardımına ehtiyac duyan tələbələr müraciət edə bilərlər. Bu zaman tələbənin ailəsinin sosial durumu və onun tədris göstəriciləri nəzərə alınmalıdır: “Belə ki, kredit üçün müraciət edən tələbənin valideynlərinin illik gəliri 10 min AZN və ya daha az, tələbənin yaşı 25 və daha az olmalıdır. Bundan başqa, bu imkandan yalnız bakalavr pilləsində əyani şöbəsində təhsil alan tələbələr yararlana bilərlər. Yalnız 2, 3 və 4-cü kurslarda təhsil alan və ümumi orta müvəffəqiyyət göstəricisi 71 və ya daha yuxarı olan, akademik borcu olmayan tələbələr üçün kredit ayrılacaq. Həmçinin birinci kursa yeni qəbul olunmuş tələbələr üçün bu təklifdən istifadə etmək mümkün olmayacaq”.
Tələbələr krediti təhsillərini başa vurduqdan bir il sonra ödəməyə başlayacaqlar
R.Mahmud həmçinin deyib ki, kreditlər tələbələrə illik 8 faizlə veriləcək. Lakin tələbələr bu krediti ödəməyə təhsilini başa vurduqdan bir il sonra başlayacaq. Oğlanlar əgər hərbi xidmətə yollanacaqlarsa, o zaman onlar hərbi xidmətdən qaydıtdıqdan bir il sonra, yəni təhsilini başa vurduqdan 2 il sonra krediti ödəməyə başlayacaqlar: “Tələbələr fondun təqdim etdiyi iki kredit paketindən - standart və güzəştli kredit paketlərindən yararlana bilərlər. Standart paketlər üzrə kredit 8 faizlə verilir. Güzəştli paketlərdə isə 6 faizlik kredit məbləği nəzərdə tutulur. Kredit şərtlərinə uyğun gələn tələbələrdən ailə başçısını itirmiş, valideynlərini itirmiş və ya valideyn himayəsindən məhrum olmuş, sağlamlıq imkanları məhdud şəxslər güzəştli şərtlərlə kredit almaq imkanına malik olacaqlar. Tələbə universiteti bitirəndən 1 il sonra 10 il ərzində krediti geri qaytarır. Fondun maliyyə əməliyyatlarının agent bankı kimi Kapitalbank seçilib. Gələcəkdə digər banklarla da əməliyyat aparmaq mümkün olacaq. Bir tələbə hər bir il üçün maksimum 4000 manat məbləğində kredit ala bilər. Kreditin maksimum məbləği isə 20 min manatdır. Həmin məbləğdə vəsait tələbənin təhsil haqqının ödənilməsi üçün müvafiq ali məktəbə ödənilir”.
Gələcəkdə fərqli kredit növləri təqdim ediləcək
Tədbirdə qeyd olunub ki, artıq dünəndən etibarən müraciətlərin qəbuluna başlanıb və marağında olan tələbələr iyun ayının 15-nə qədər fonda müraciət edə bilərlər. R.Mahmud həmçinin vurğulayıb ki, fond bu il tələbələrə təhsil haqqı krediti təklif edir. Gələcəkdə isə müraciətləri nəzərə alıb ehtiyac və təyinatına görə fərqli kredit növlərini təqdim etmək nəzərdə tutulur. Belə ki, yataqxana haqqı krediti, tədris materialları krediti, elmi-tədqiqat və araşdırma krediti və s. kredit növlərindən yararlanmaq mümkün olacaq.
Qeyd edək ki, tədbirdə həmçinin fondun yenicə istifadəyə verilmiş rəsmi veb səhifəsi (www.maarifci.az) barədə söhbət açılıb. Bildirilib ki, portalda fondun missiyası, fəaliyyəti, təqdim olunan kredit növləri və onların şərtləri barədə ətraflı məlumatlar yerləşdirilib. Bundan əlavə, portalda elektron (onlayn) müraciət pəncərəsi yaradılıb ki, bu da kreditlər üçün müraciət prosesində şəffaflıq və operativliyin təmin olunması məqsədlərinə xidmət edir. Müraciət prosesi, uyğunluq meyarları və tələb olunan sənədlərin siyahısı haqqında məlumatları da portalın müvafiq səhifələrindən rahatlıqla tapmaq mümkündür.
AQŞİN

Paylaş:

Baxılıb: 700 dəfə