BDU-nun sosial elmlər və psixologiya fakültəsinin yaranmasının 25 illiyi qeyd olunub

Bakı:

29 °C

56 %

4 m/s

Əlaqə

AZ RU EN

Ana səhifə / Sosial / BDU-nun sosial elmlər və psixologiya fakültəsinin yaranmasının 25 illiyi qeyd olunub

BDU-nun sosial elmlər və psixologiya fakültəsinin yaranmasının 25 illiyi qeyd olunub

20.12.2016 [10:29]

Dekabrın 19-da Bakı Dövlət Universitetində (BDU) sosial elmlər və psixologiya fakültəsinin yaranmasının 25 illik yubileyinə həsr olunan tədbir keçirilib.
Universitetdən AZƏRTAC-a bildiriblər ki, tədbirdə çıxış edən rektor, akademik Abel Məhərrəmov BDU-nun tarixi, beynəlxalq əlaqələri, əldə olunan uğurlar, sosial elmlər və psixologiya fakültəsinin universitetin həyatındakı rolu barədə danışıb. Bildirilib ki, sosial elmlər və psixologiya fakültəsi ölkəmizdə baş verən sosial-siyasi hadisələr fonunda suveren dövlətimiz üçün sosial-siyasi münasibətlər ixtisasları üzrə kadr hazırlığına ehtiyacdan yaranıb. Fəaliyyəti dövründə respublikamız üçün minlərlə yüksək ixtisaslı mütəxəssis hazırlayan fakültə həm də uzun illər ərzində bir sıra xarici ölkələr üçün yüzlərlə kadr hazırlayıb, beynəlxalq miqyasda tanınan peşəkar müəllimlərin yorulmaz xidməti sayəsində regionun elmi mərkəzinə çevrilib, ali struktur rəhbərlərinin formalaşmasında müstəsna rol oynayıb. Fakültənin psixologiya, sosiologiya, sosial iş, fəlsəfə və politologiya ixtisaslarının yetirmələri bir çox fəaliyyət sahələrində uğurla çalışır, layiqli vətəndaş və mütəxəssis kimi özlərini təsdiqləyirlər.
A.Məhərrəmov qeyd edib ki, ötən 25 ildə fakültənin fəaliyyətinin daha da təkmilləşdirilməsi istiqamətində mühüm işlər həyata keçirilib, yeni kafedralar yaradılıb, mövcud kafedralarda struktur dəyişiklikləri aparılıb. Fakültənin kafedraları müvafiq ixtisaslar üzrə aparıcı kafedralar olduğundan digər ali məktəblər və kolleclər, habelə bir sıra digər müəssisələr üçün yüksək ixtisaslı kadrlar hazırlanmasında fəal iştirak edirlər.
Sosial elmlər və psixologiya fakültəsinin dekanı, professor Hikmət Əlizadə fakültənin tarixi, bugünkü fəaliyyəti barədə məlumat verib. Bildirilib ki, hazırda fakültənin nəzdində səkkiz kafedra, elmi tədqiqat laboratoriyaları və mərkəzlər fəaliyyət göstərir. Fakültədə 106 nəfərdən ibarət pedaqoji heyət, o cümlədən Azərbaycan Milli Elmlər Akademiyasının bir müxbir üzvü, 20 nəfər elmlər doktoru, professor, 56 nəfər elmlər namizədi, dosent, 12 nəfər baş müəllim, 17 müəllim çalışır. Hazırda fakültədə 1400-dək tələbə və magistrantın təhsil aldığını qeyd edən dekan burada tədrisin təşkili və yüksək ixtisaslı kadr hazırlığı ilə bağlı görülən işlər barədə danışıb.
Bildirilib ki, bu fakültənin yaradılması ilə universitetin, respublikanın humanitar elm və təhsilinin tarixində yeni bir mərhələ açılıb. Sosial elmlər və psixologiya fakültəsi bir çox elmi və tədris istiqamətləri üzrə elmi tədqiqatlar aparıb, cəmiyyətin təfəkkür mədəniyyətini formalaşdırıb. Fakültə çətin inkişaf yolu keçib və nəticədə sosiologiya, politologiya, fəlsəfə, psixologiya cəmiyyətimizdə baş verən iqtisadi, sosial-siyasi, mənəvi proseslərin ayrılmaz tərkib hissəsinə çevrilib.
Milli Məclisin deputatları Hadı Rəcəbli və Səməd Seyidov, professor Əjdər Ağayev fakültənin əməkdaşlarını və tələbələri yubiley münasibətilə təbrik edib, uğurlar arzulayıblar.
Fakültənin bir qrup əməkdaşına fəxri fərman, təşəkkürnamə və pul mükafatı təqdim edilib.
Tədbir bədii hissə ilə yekunlaşıb.

Paylaş:

Baxılıb: 736 dəfə