Sumqayıtda yeni yaşayış kompleksinə köçürülmə başlanır

Bakı:

18 °C

88 %

3 m/s

Əlaqə

AZ RU EN

Ana səhifə / Sosial / Sumqayıtda yeni yaşayış kompleksinə köçürülmə başlanır

Sumqayıtda yeni yaşayış kompleksinə köçürülmə başlanır

23.02.2019 [10:23]

Azərbaycan Respublikasının Prezidenti İlham Əliyev məcburi köçkünlərin problemlərinin həllini daim diqqətdə saxlayır, bu kateqoriyadan olan vətəndaşların mənzil-məişət şəraitinin yaxşılaşdırılması üçün zəruri tədbirlər həyata keçirir. Birinci vitse-prezident xanım Mehriban Əliyevanın tapşırığına əsasən, ilk növbədə, Bakı və Sumqayıt ərazisində ən qəzalı və ağır şəraitdə yaşayan məcburi köçkün ailələri yeni mənzillərlə təmin edilir.
Hazırda Abşeron rayonunun ərazisindəki 1000 ailəlik, Bakının Qaradağ rayonunun Ümid qəsəbəsindəki 300 ailəlik yeni yaşayış binalarında məcburi köçkünlərin yerləşdirilməsi davam edir.
Qaçqınların və Məcburi Köçkünlərin İşləri üzrə Dövlət Komitəsindən AZƏRTAC-a bildirilib ki, Sumqayıt şəhərinin mərkəzində, Koroğlu prospektində inşa edilən və ötən il dekabrın 27-də Azərbaycan Respublikasının Prezidenti İlham Əliyevin və birinci xanım Mehriban Əliyevanın iştirakı ilə açılış mərasimi olan 1005 mənzildən ibarət yaşayış kompleksi də məcburi köçkünlərin istifadəsinə veriləcək. Yeni mənzillərin bölgüsü üzrə ilk püşkatma mərasimi fevralın 22-də N.Nərimanov adına Mədəniyyət Evində keçirilib. Məcburi köçkün ailələrinin nümayəndələri mövcud qaydalar əsasında onlar üçün əvvəlcədən ayrılmış otaq sayı üzrə bina və mənzilin nömrəsini müəyyənləşdirib. Bundan bir neçə gün sonra isə ailələrin yeni mənzillərə köçürülməsinə başlanacaq.
Püşkatmada iştirak edən Cəbrayıl rayonundan məcburi köçkün Yetər Quliyeva, Laçın rayonundan Taleh Abdullayev, Qubadlı rayonundan Namazalı Dünyamalıyev və başqaları mənzillərin bölgüsünün mövcud qanunvericilik normaları və sosial ədalət prinsipləri əsasında şəffaflıqla aparılmasından razı qaldıqlarını qeyd edərək, onların mənzil-məişət şəraitinin yaxşılaşdırılmasına diqqət və qayğı göstərən Prezident İlham Əliyevə və Birinci vitse-prezident Mehriban Əliyevaya minnətdarlıqlarını bildiriblər.
Qeyd edək ki, kompleksə daxil olan mənzillərin hamısı tam təmirlidir və mətbəx mebeli, qaz sobası ilə təchiz olunub. Bundan başqa, mənzillərdə mərkəzləşdirilmiş internet və televiziya şəbəkəsi quraşdırılıb. Ərazidə sakinlərin asudə vaxtlarını səmərəli keçirmələri üçün iki istirahət guşəsi yaradılıb, uşaq meydançası quraşdırılıb. Kompleksin ümumi ərazisinin 67 faizində yaşıllıq və abadlıq işləri görülüb. Bu kompleks şəhərin memarlıq üslubuna uyğun inşa olunub, binaların fasadlarına xüsusi diqqət yetirilib, fərqli üslubda pəncərələr quraşdırılıb.

Paylaş:

Baxılıb: 477 dəfə