Paytaxtda ingilis layihəsinin tətbiqi uğurla davam edir

Bakı:

26 °C

59 %

3 m/s

Əlaqə

AZ RU EN

Ana səhifə / Sosial / Paytaxtda ingilis layihəsinin tətbiqi uğurla davam edir

Paytaxtda ingilis layihəsinin tətbiqi uğurla davam edir

20.05.2021 [09:14]

Artıq xeyli müddətdir ki, Bakı Şəhər Mənzil Kommunal Təsərrüfatı Departamenti tərəfindən Böyük Britaniyanın “Mott MacDonald” şirkəti ilə birgə hazırlanmış bərk məişət tullantılarının yığılması, daşınması və çeşidlənməsinin ən müasir səviyyədə təşkil edilməsi ilə bağlı pilot layihənin paytaxtın Nərimanov rayonunda icrası uğurla həyata keçirilir. Görülən işlərin yüksək səviyyədə aparılması nəticəsində keçən müddət ərzində xeyli irəliləyişlər əldə olunub.
Bakı Şəhər İcra Hakimiyyətinin mətbuat xidmətindən AZƏRTAC-a bildirilib ki, bununla əlaqədar müqavilə şərtlərinə uyğun olaraq, bu il martın 1-dən paytaxtın Nizami, aprelin 1-dən Nəsimi, mayın 1-dən isə Yasamal rayonları bu layihəyə qoşulub.
Layihənin tətbiqinə hazırlıqla bağlı hər üç rayonda tələbata uyğun miqdarda konteyner meydançası yaradılıb, meydançalara 2 rəngdə - yaşıl və narıncı rənglərdə yeni, müasir konteynerlər quraşdırılıb.
Sakinlərin rahatlığı üçün ilkin mərhələdə Bakı Şəhər və Rayon İcra hakimiyyətlərinin əməkdaşları, bələdiyyə, təsərrüfat xidmətləri, gənclər və “Regional İnkişaf” İctimai Birliyinin könüllüləri bu işlərə cəlb edilərək, mənzillərə iki cür yaşıl və narıncı çeşidləyici paketlər və izahedici bukletlər paylanılıb, bloklara, həyətlərə, binalara maarifləndirici posterlər yapışdırılıb. Əraziyə cavabdehlər təyin olunub.
Görülən hazırlıq tədbirlərinin və təbliğat işlərinin nəticəsi olaraq layihənin icrasına mart ayında başlanılan Nizami rayonunda artıq ilkin müsbət nəticələr əldə edilib. Belə ki, əgər Nərimanov rayonunda layihənin tətbiqinin ilk günündə çeşidlənmiş tullantının həcmi bir gündə 4 ton, sonradan isə tədricən 6 və 8 ton olmuşdusa, Nizami rayonunda mart ayının ilk günlərindən 12 ton çeşidlənmiş tullantı toplanaraq yığım məntəqəsinə təhvil verilib. Hazırda bu rəqəm gündəlik təqribən 20 ton təşkil edir. Bu da, ilk növbədə, Nərimanov rayonunda əldə edilən təcrübə, həmçinin könüllülərin, kommunal xidmət əməkdaşlarının sakinlər arasında apardığı düzgün maarifləndirmə işlərinin nəticəsidir. Eyni zamanda, Nizami rayon sakinləri də ilk gündən bu layihənin tətbiqində yaxından iştirak edirlər.
Həmçinin ətraf mühitin çirklənmədən qorunması baxımından çox mühüm əhəmiyyət kəsb edən bu layihənin uğurla həyata keçirilməsi və paytaxt sakinlərinə göstərilən xidmətlərin səviyyəsinin daha da artırılması məqsədilə dövlətimizin başçısının ayırdığı maliyyə vəsaiti hesabına Bakı şəhər kommunal təsərrüfatı xidmətləri üçün 57 ədəd kommunal təyinatlı müasir avtonəqliyyat vasitəsi və mexanizmlər alınıb. Yeni texnikaların tətbiqi əhaliyə göstərilən kommunal xidmətlərin səviyyəsini yüksəldərək, xidmətlərin mövcud avtoparkının yenilənməsinə böyük kömək olub.
Layihənin uğurla həyata keçirilməsi paytaxtın təmiz saxlanılmasına, gözəlləşməsinə, ətraf mühitin və insanların sağlamlığının qorunmasına, yeni ekoloji, sanitar mədəniyyətin formalaşmasına və iqtisadi səmərənin əldə olunmasına xidmət edəcək.

Paylaş:

Baxılıb: 615 dəfə