İstifadə olunmuş batareyaları zibilə atmayın!

Bakı:

23 °C

47 %

4 m/s

Əlaqə

AZ RU EN

Ana səhifə / Sosial / İstifadə olunmuş batareyaları zibilə atmayın!

İstifadə olunmuş batareyaları zibilə atmayın!

17.08.2023 [13:36]

M.BAYRAMLI

Müasir dünyanın ən aktual və mühüm məsələlərindən biri də elektrik batareyaları kimi təhlükəli məişət tullantılarının düzgün utilizasiya olunmamasıdır. Batareyaların tərkibindəki ağır metallar, duzlar, civə və digər zəhərli komponentlər ətraf mühitə və insan sağlamlığına ən azı 10 il potensial təhlükə yaradır. Bu məqsədlə də, Avropada elektrik batareyalarının utilizasiyasına 2000-ci ilin əvvəlindən başlanılıb. AB ölkələri arasında istifadə olunan batareyaların toplanma nisbəti üzrə ən yaxşı göstərici (90 faiz) Almaniyadadır. Ölkədə, hətta, zibil qutusuna atılan batareyalar üçün böyük məbləğdə cərimə nəzərdə tutulur. Ölkəmizdə də insan sağlamlığına zərər verən, ətraf mühitə zərərli təsir göstərən istifadəyə yararsız elektrik batareyalarının çeşidlənməsi və xüsusi şəraitdə zərərsizləşdirilməsi üçün fəaliyyətlər davam etdirilir. Azərbaycanda ilk dəfə İDEA İctimai Birliyi işlənmiş batareya tullantılarının utilizasiyası məsələsini gündəmə gətirib və onların Bakı şəhəri üzrə təhsil müəssisələrindən toplanaraq, mütəmadi olaraq SOCAR-ın Ekologiya İdarəsinin Tullantıların İdarə Edilməsi Mərkəzinə (TİEM) təhvil verilməsini təklif edib. Nəticədə işlənmiş elektrik batareyası tullantılarının toplanması üçün nəzərdə tutulan xüsusi qutular ali və orta təhsil müəssisələrinə yerləşdirilib və onların toplanmasına başlanılıb. Zamanla işlənmiş batareyaların təhvil məntəqələrinin sayı artırılıb. Toplama qutuları müxtəlif dövlət qurumlarında, marketlərdə, bir çox şirkətlərdə yerləşdirilib.

Eləcə də Sumqayıt Kimya Sənaye Parkı”nda istifadə müddəti bitmiş batareyaların və akkumulyatorların utilizasiyası və yeni qurğuşun-turşulu akkumulyatorların istehsalı sahələrinin inkişaf etdirilməsi qərara alınıb.

Ölkəmizdə cari ildə 472 kq batareya toplanılıb

Öz növbəsində, 1 may 2022-ci il tarixindən etibarən Ekologiya və Təbii Sərvətlər Nazirliyi və “Qırmızı Ürəklər” Fondu tərəfindən “Batareyaları təhvil ver, təbiəti qoru” layihəsi də həyata keçirilir. Cari ildə 472 kq batareya toplanılıb.

Hazırda müxtəlif dövlət qurumlarında, şirkətlərdə, marketlər şəbəkələrində, ali və orta ixtisas təhsil müəssisələrində, banklarda və otellərdə təhvil qutuları yerləşdirilərək layihəyə dəstək verilir.

Bu prosesə töhfə verən bütün tərəfdaş və vətəndaşlara təşəkkür edir, hər kəsi təhlükəli və istifadəyə yararsız olan batareyaların məişət tullantılarına qarışdırılmasına yol verməməyə, batareyalar üçün ayrılan xüsusi qutulardan istifadə etməyə çağırırıq.

Paylaş:

Baxılıb: 843 dəfə