Azərbaycanın xarici işlər naziri BMT Təhlükəsizlik Şurasında keçirilən açıq müzakirələrdə çıxış edib

Bakı:

25 °C

67 %

4 m/s

AZ RU EN

Ana səhifə / Xarici siyasət / Azərbaycanın xarici işlər naziri BMT Təhlükəsizlik Şurasında keçirilən açıq müzakirələrdə çıxış edib

Azərbaycanın xarici işlər naziri BMT Təhlükəsizlik Şurasında keçirilən açıq müzakirələrdə çıxış edib

08.08.2013 [10:11]

BMT Təhlükəsizlik Şurasında “Beynəlxalq sülhün və təhlükəsizliyin qorunmasında BMT ilə regional və subregional təşkilatlar arasında əməkdaşlıq” mövzusunda açıq müzakirələr keçirilib.
Xarici İşlər Nazirliyinin mətbuat xidmətindən AzərTAc-a bildiriblər ki, Argentinanın Prezidenti xanım Kristina Fernandez Kirşnerin sədrlik etdiyi tədbirdə Azərbaycanın xarici siyasət idarəsinin rəhbəri Elmar Məmmədyarovun çıxışı dinlənilib.
Nazir diqqətə çatdırıb ki, BMT Nizamnaməsinə uyğun olaraq, Təhlükəsizlik Şurasında iştirak edən üzv ölkələr beynəlxalq sülhün və təhlükəsizliyin qorunmasında əsas məsuliyyəti daşıyırlar və bu məsuliyyət altında öz vəzifələrini icra etmək üçün Təhlükəsizlik Şurasının onların adından çıxış etməsinə dair razılığa gəliblər. Eyni zamanda, Nizamnamənin 8-ci bəndi münaqişələrin sülh yolu ilə həllində BMT ilə regional təsisatlar arasındakı əməkdaşlığı təşviq edir.
Son on ildə Afrika Birliyinin rolunun əhəmiyyətli dərəcədə artdığını qeyd edən Elmar Məmmədyarov deyib: “Şübhəsiz ki, Təhlükəsizlik Şurasının müzakirələrinin əhəmiyyətli hissəsini təşkil edən Afrikanın bu gün üzləşdiyi problemlər birgə siyasi və diplomatik vasitələrlə daha yaxşı həll edilə bilər. Bu xüsusda, sülh və təhlükəsizlik sahəsində BMT ilə Afrika Birliyi arasında strateji əlaqələrin inkişafında əldə olunmuş irəliləyişi alqışlayırıq”.
Vurğulanıb ki, Təhlükəsizlik Şurasının üzvü, Afrika Birliyi və Ərəb Dövlətləri Liqasında müşahidəçi olan Azərbaycan BMT ilə bu regional təşkilatlar arasındakı tərəfdaşlıq əlaqələrinin inkişafını bundan sonra da dəstəkləyəcək. O deyib: “Biz, həmçinin Latın Amerikası və Karib Dövlətləri İttifaqı və Cənubi Amerika Ölkələri Birliyi kimi yeni subregional təşkilatların fəaliyyətini qeyd etməklə yanaşı, onların bu görüşdə iştirakını və müzakirələrə töhfə verməsini alqışlayırıq. Bununla yanaşı, İslam Əməkdaşlıq Təşkilatı və Türkdilli Dövlətlərin Əməkdaşlıq Şurası kimi üzv dövlətlərin ümumi mədəniyyət və dil dəyərləri əsasında formalaşmış təşkilatların rolunun artması, qarşılıqlı maraq doğuran geniş gündəlikdə BMT ilə bu təşkilatların əməkdaşlığını və qarşılıqlı əlaqəsini genişləndirmək məqsədinə daha yaxşı xidmət edəcək imkanların və müvafiq yanaşmaların tədqiqinə zərurət yaradır”.
Nazir diqqətə çatdırıb ki, hər şeydən əvvəl üzv dövlətlərin öz öhdəliklərinə sadiq qalması, Nizamnamədə təsbit edildiyi kimi, suverenlik, ərazi bütövlüyü və dövlətlərin siyasi müstəqilliyinə hörmət edilməsi həlledici amildir. Biz hərbi münaqişələr zamanı bəzi hallarda beynəlxalq normaların və prinsiplərin təhrif olunması cəhdlərinin edilməsinə və BMT Təhlükəsizlik Şurasının qətnamələrinə əməl olunmamasına narahatçılığımızı ifadə edirik. O deyib: “Ona görə bu əhəmiyyətlidir ki, bu gün bizim görüşümüzdə Təhlükəsizlik Şurası münaqişənin qarşısının alınması üçün əlaqəli şəkildə beynəlxalq tədbirlərin görülməsinin əhəmiyyətini ifadə etdi. Müzakirələr Nizamnaməyə, Təhlükəsizlik Şurasının müvafiq qətnamələrinə uyğun olaraq mübahisələrin sülh yolu ilə həlli və münaqişələrin qarşısının alınması məqsədilə regional səviyyədə səylər göstərilməsi üçün BMT-nin orqan və institutlarının da daxil olduqları beynəlxalq birliyə çağırış etdi. Təhlükəsizlik Şurası, həmçinin regional tərəfdaşların həmişə sülh və təhlükəsizlik sahəsində öz fəaliyyətləri barədə məlumat verməli olduqlarını vurğuladı. Prioritet məsələ kimi Təhlükəsizlik Şurasının qətnamələrinin yerinə yetirilməsinə, xüsusilə münaqişələrin qarşısının alınması, idarə və həll edilməsi ilə əlaqəli qətnamələrə daha çox diqqət ayrılmalıdır”.
Elmar Məmmədyarov vurğulayıb ki, ərazilərinin əhəmiyyətli hissəsinin işğalından və geniş miqyasda etnik təmizləmədən əziyyət çəkən ölkə kimi Azərbaycan dünyanın müxtəlif bölgələrində həlli uzadılmış münaqişələri və onların humanitar və insan hüquqları baxımından nəticələrinin həllinə yönəlmiş işlərin görülməsinə dair yanaşmaları dəstəkləyir.

Paylaş:

Baxılıb: 2470 dəfə