Bakının Səbail və Nyu-Yorkun Bruklin rayonları arasında dostluq və əməkdaşlıq haqqında protokol imzalanıb

Bakı:

29 °C

49 %

13 m/s

AZ RU EN

Ana səhifə / Xarici siyasət / Bakının Səbail və Nyu-Yorkun Bruklin rayonları arasında dostluq və əməkdaşlıq haqqında protokol imzalanıb

Bakının Səbail və Nyu-Yorkun Bruklin rayonları arasında dostluq və əməkdaşlıq haqqında protokol imzalanıb

21.11.2014 [09:28]

Bakının Səbail və Nyu-Yorkun Bruklin rayonları arasında dostluq və əməkdaşlıq haqqında protokol imzalanıb.
Protokol ABŞ-da səfərdə olan Səbail rayon İcra Hakimiyyətinin başçısı Asif Əsgərovun rəhbərlik etdiyi nümayəndə heyətinin Bruklin rayonunun yerli hakimiyyət rəhbəri Erik Adamsla görüşündə imzalanıb.
Görüşdə Erik Adams 2012-ci ildə “Eurovision” mahnı müsabiqəsini izləmək məqsədilə Azərbaycana səfər etdiyini və Bakının onda zəngin təəssüratlar yaratdığını bildirib.
Ölkəmizin son illər bütün sahələrdə sürətli inkişafından və uğurlarından xəbərdar olduğunu vurğulayan E.Adams Bruklin və Səbail rayonları arasında işgüzar münasibətlərin qurulmasının tərəflər arasında əlaqələrin daha da intensivləşməsinə, xüsusilə də mədəniyyət və turizm sahələrində qarşılıqlı təcrübə mübadiləsinə, eləcə də xalqlarımız arasında təmaslara təkan verəcəyinə əminliyini ifadə edib.
Asif Əsgərov müstəqilliyimizin bərpasından sonra Ümummilli lider Heydər Əliyevin və Prezident İlham Əliyevin həyata keçirdikləri müdrik siyasət nəticəsində Azərbaycanın böyük inkişaf yolu keçdiyini, xüsusilə son illər ərzində ölkəmizdə bir sıra irimiqyaslı beynəlxalq tədbirlərin təşkil olunduğunu bildirib. O, ilk Avropa Oyunlarının 2015-ci ildə Bakıda keçiriləcəyini söyləyib və E.Adamsı bu tədbirə dəvət edib.
Görüş iştirakçılarına Səbail rayonu və rayonda aparılan quruculuq işləri barədə də məlumat verilib.
Azərbaycanın Vaşinqtondakı səfirliyinin müşaviri Məmməd Talıbov ölkəmiz ilə ABŞ arasındakı strateji tərəfdaşlıq barədə danışıb. Qeyd edib ki, bir müddət öncə “Azərbaycan Hava Yolları” tərəfindən həyata keçirilən Bakı-Nyu-York birbaşa uçuşları həm Azərbaycanın ümumi inkişafının, həm də ölkələrimiz arasında münasibətlərin müsbət dinamikasının göstəricisidir.
M.Talıbov ölkəmizin zəngin dövlətçilik ənənələrinə malik olduğunu və müsəlman Şərqində ilk demokratik respublikanın məhz Azərbaycanda yarandığını diqqətə çatdırıb.
Azərbaycanın zəngin tolerant ənənələrini vurğulayan diplomat ABŞ-da olduğu kimi, ölkəmizdə də çoxsaylı etnik qrup və dini icmaların əsrlər boyu sülh və əmin-amanlıq şəraitində yaşadığını bildirib.
Görüşdə Azərbaycanın ABŞ-dakı səfirliyinin əməkdaşları və Bruklindəki Azərbaycan icmasının fəal nümayəndəsi Mariyetta Rozental da iştirak ediblər.
Protokolun imzalanması mərasimindən sonra Azərbaycan icmasının yaratdığı “My Way” mədəni inkişaf mərkəzinin yetirmələri milli rəqslərimizdən ibarət proqram nümayiş etdiriblər.
Mədəni hissənin sonunda çıxış edən Mariyetta Rozental Bruklin rayonu Administrasiyası, Azərbaycanın Mədəniyyət və Turizm Nazirliyi və ölkəmizin ABŞ-dakı səfirliyinə bu tədbirin təşkilinə görə minnətdarlığını bildirib.

Paylaş:

Baxılıb: 1684 dəfə