Avropa etiraf edir...

Bakı:

2 °C

93 %

9 m/s

Əlaqə

AZ RU EN

Ana səhifə / Xarici siyasət / Avropa etiraf edir...

Avropa etiraf edir...

07.06.2022 [09:57]

M.FEYİZLİ

Artıq 100-cü günü arxada qalan Rusiya-Ukrayna müharibəsinin başlaması ilə bağlı polemikalar səngimək bilmir. Səsləndirilən fikirlər, irəli sürülən versiyalar bir sıra hallarda daban-dabana ziddiyyət təşkil edir. Tarix boyunca çoxsaylı müharibə məşəqqətləri ilə üz-üzə qalan bəşəriyyətin XXI əsrdə yenidən növbəti bir dağıdıcı müharibənin sərt sınağına çəkilməsi suallar doğurur. Müharibə niyə başladı və burada kim günahkardır?

Başda ABŞ olmaqla Qərb sualın cavabı olaraq Rusiyanı nişan verir. İlk baxışda bu qəbildən olan dəyərləndirmələrdə həqiqət payı yox deyil. Bəli, müharibə düyməsini məhz Rusiya basıb və bu ölkənin qoşunları suveren dövlətin beynəlxalq birlik tərəfindən tanınan sərhədlərini pozaraq onun bir sıra yaşayış məntəqələrini zəbt edib. Hazırda Ukraynanın ağır artileriya atəşinə məruz qalan ayrı-ayrı şəhərləri xarabalıqları xatırladır. Milyonlarla insan dogma ev-eşiyini tərk edərək başqa ölkələrə sığınıb, aralarında uşaqlar, qadınlar da olmaqla ölənlərin, yaralananların sayı həddindən artıq çoxdur və bu barədə müxtəlif rəqəmlər səsləndirilir. Bütün bunları nəzər aldıqda, əlbəttə ki, müharibə düyməsini ilk basan Rusiyanın üzərinə böyük məsuliyyət düşdüyünü inkar etmək mümkün deyil...

Müharibə tərəfi olan Rusiyadan isə fərqli açıqlamalar eşidilir. İndiyədək prezident Vladimir Putin, xarici işlər naziri Sergey Lavrov və digər rəsmilər səviyyəsində müharibənin başlamasının baiskarı kimi ABŞ, Avropa və Şimali Atlantika Alyansı (NATO) göstərilib. Bildirilib ki, başda ABŞ olmaqla Qərb Rusiyaya müharibəni başlamamağa heç bir şans qoymayıb. Bu qəbildən olan açıqlamalarda əsas arqumentlərdən biri kimi, zamanında Rusiya ilə NATO arasında alyansın şimal qonşumuzun sərhədlərinə doğru genişlənməsinin məhdudlaşdırılmasını özündə ehtiva edən sənədin imzalanması göstərilir. Bu sənədə əsaslanan Rusiya Ukraynanın NATO-nun sıralarına daxil olması məsələsinin yenidən gündəmə gəlməsini həzm edə bilməyib, buna kəskin etirazını bildirib. Aparılan səmərəsiz danışıqların nəticəsi isə müharibə düyməsinin basılması olub.

Beynəlxalq birlikdə Rusiyanın əsaslandırılmaları subyektiv fikirlər kimi qəbul olunsa da, müharibə uzandıqca və onun fəsadları artdıqca Qərbin də ünvanına ittihamlar artmaqdadır. Nə qədər paradoksal görünsə də, müharibə etirafları bu gün həm də Avropanın özündə də eşidilməkdədir. Avropa Parlamentinin (AP) Fransanın “Milli birlik” partiyasından olan deputatı Terri Mariani Avropa İttifaqında (Aİ) anti-Rusiya ritorikasının səbəblərini açıqlayıb. Onun sözlərinə görə, Aİ-də belə bir əhval-ruhiyyənin yaranması və münasibətlərin kəskinləşməsi Şərqi Avropa ölkələrinə görədir. Deputat müvafiq açıqlama ilə “Valeurs Actuelles” qəzetinin əməkdaşı ilə söhbətində bildirib. Onun sözlərinə görə, Aİ-nin Şərqə doğru genişlənməsi düşünülməmiş və tələsik addım olub, buna görə də qurum yeni üzvlərin təsir dairəsinə düşüb. “Brüssel Rusiya ilə münasibətlərdə tarixən bu ölkə ilə düşmənçilik mövqeyində olmayan və ümumi rifaha can atan Cənubi Avropa ölkələrinin rəyini nəzərə almadan, Şərqi Avropa dövlətlərinin təsiri altına düşüb. Aİ-nin rəhbərliyi öz siyasətini Şərqə doğru aparıb, həmin ölkələr də tarixən Rusiya ilə düşmənçilik münasibətlərində olublar. Rusiya Federasiyasının Ukraynada xüsusi əməliyyata başlamasının əsas səbəblərindən biri məhz budur”, - deyə siyasətçi bildirib. Deputat əlavə edib ki, əgər Aİ başqa pozisiyadan çıxış etsə idi, biz Rusiya ilə ixtilaflardan kənarda qala bilərdik və Ukrayna böhranı baş verməzdi.

Göründüyü kimi, Rusiya və Qərb dağıdıcı müharibənin peşmançılığını və məsuliyyətini birlikdə bölüşməyə çalışaraq bir-birilərinin ünvanına sərt ittihamlar səsləndirirlər. Müharibə poliqonu isə Ukraynadır. Qərbin və Rusiyanın düşmənçiliyinin, ziddiyyətli münasibətlərinin, eləcə də siyasilərin səhv qərarlarının acı fəsadlarını sadə insanlar öz həyatlarında yaşamaq məcburiyyətində qalıblar.

Paylaş:

Baxılıb: 918 dəfə