Nəsimi rayonunda 26 İyun – Milli Ordu Gününə həsr olunmuş tədbir keçirildi

Bakı:

24 °C

64 %

8 m/s

Əlaqə

AZ RU EN

Ana səhifə / YAP xəbərləri / Nəsimi rayonunda 26 İyun – Milli Ordu Gününə həsr olunmuş tədbir keçirildi

Nəsimi rayonunda 26 İyun – Milli Ordu Gününə həsr olunmuş tədbir keçirildi

26.06.2025 [18:50]

Azərbaycan Respublikasında 2025-ci ilin “Konstitusiya və Suverenlik İli” çərçivəsində 26 iyun 2025-ci il tarixində Yeni Azərbaycan Partiyası Nəsimi rayon təşkilatı və Müharibə, Əmək və Silahlı Qüvvələr Veteranlar Təşkilatının birgə təşkilatçılığı ilə Milli Ordu Gününə həsr olunmuş tədbir keçirildi.

Tədbir öncə Ulu Öndər Heydər Əliyevin və torpaqlarımızın azadlığı uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilməsi və Dövlət Himninin səsləndirilməsi ilə başlayıb.

Tədbiri giriş sözü ilə açan Müharibə, Əmək və Silahlı Qüvvələr Veteranlar Təşkilatının sədri Cəlil Xəlilov müharibə veteranlarının, şəhid ailələrinin və qazilərin dövlət qayğısı ilə əhatə olunmasından məmnunluqla danışdı. O, xüsusilə Vətən müharibəsində əldə olunan tarixi Qələbənin ordumuzun qüdrətindən və xalqımızın birlik ruhundan qaynaqlandığını vurğuladı.

Daha sonra çıxış edən Yeni Azərbaycan Partiyası Nəsimi rayon təşkilatının sədri Azər Süleymanov Milli Ordu Gününün tarixi əhəmiyyətindən danışaraq Ulu Öndər Heydər Əliyevin ordu quruculuğu sahəsində qoyduğu möhkəm təməllərin bu gün Prezident, Müzəffər Ali Baş Komandan İlham Əliyev tərəfindən uğurla davam etdirildiyini bildirdi.

Tədbirdə iştirak edən Milli Məclisin deputatı Azər Allahverənov çıxışında Azərbaycan Ordusunun müasir texnologiyalarla təchiz olunması və kadr potensialının gücləndirilməsi sahəsində aparılan islahatlardan bəhs etdi. O bildirdi ki, Ali Baş Komandan İlham Əliyevin rəhbərliyi ilə Azərbaycan Ordusu regionun ən güclü hərbi qüvvələrindən birinə çevrilmişdir.

Müdafiə nazirinin müşaviri Abdulla Qurbani hərbi-vətənpərvərlik istiqamətində uzun illər fəaliyyət göstərən tanınmış ziyalı, tədbirdə gənclərin milli ruhda tərbiyə olunmasının, tariximizin, şəhidlərimizin xatirəsinin yaşadılmasının vacibliyini qeyd etdi. O, milli dəyərlərin qorunması və ötürülməsi sahəsində belə tədbirlərin önəmini vurğuladı.

Qarabağ müharibəsi veteranları, əlilləri və şəhid ailələri ictimai birliyinin Nəsimi rayon şöbəsinin sədri Azər Quliyev isə çıxışında vətənpərvərlik ruhunun yeni nəsillərə aşılanmasının əhəmiyyətinə toxunaraq qeyd etdi ki, şəhidlərin və qazilərin şərəfli yolu Azərbaycan gəncliyi üçün əbədi nümunədir.

Tədbirdə Azərbaycanın ordu quruculuğundakı nailiyyətləri, Silahlı Qüvvələrin keçdiyi şərəfli yol və xalq-ordu birliyinin önəmi xüsusi vurğulandı. Çıxışçılar Azərbaycan Ordusunun regionda sülh və sabitliyin təminatçısı kimi mühüm rolunu qeyd etdilər.

Tədbirin sonunda xatirə şəkili çəkdirildi və iştirakçılar tərəfindən Azərbaycan Ordusuna və dövlətçiliyimizə dəstək mesajları verildi və Yeni Azərbaycan Partiyasının himni səsləndirildi.

Paylaş:

Baxılıb: 411 dəfə