27 Sentyabr tarixini xalqımız böyük ehtiramla əbədi olaraq yad edəcəklər!

Bakı:

20 °C

88 %

8 m/s

Əlaqə

AZ RU EN

Ana səhifə / YAP xəbərləri / 27 Sentyabr tarixini xalqımız böyük ehtiramla əbədi olaraq yad edəcəklər!

27 Sentyabr tarixini xalqımız böyük ehtiramla əbədi olaraq yad edəcəklər!

26.09.2025 [22:48]

Azərbaycan Prezidenti, Müzəffər Ali Baş Komandan cənab İlham Əliyevin rəhbərliyi ilə 2020-ci il sentyabrın 27-də başlanan "Dəmir yumruq" əməliyyatı ilə 44 gün davam edən Vətən Müharibəsində Azərbaycan Ordusu yüksək döyüş bacarığını nümayiş etdirərək bütün dünyaya öz gücünü, qüdrətini göstərdi. Ermənistan və havadarları tərəfindən işğal olunmuş torpaqlarımız əsgər və zabitlərimizin qanı və canı bahasına azad edildi. Bu, “Güclü ordu - güclü dövlət” strategiyasının və «dəmir yumruq» siyasətinin nəticəsidir. Vətən müharibəsində qəhrəmancasına döyüşmüş, Azərbaycan Bayrağını işğaldan azad edilən torpaqlarımızda dalğalandırmış, ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq, Azərbaycan Respublikasının Prezidenti cənab İlham Əliyevin 2020-ci il 2 dekabr tarixli Sərancamı ilə hər il sentyabrın 27-si Azərbaycan Respublikasında Anım Günü kimi qeyd edilməsi qərara alınmışdır. Hər il 27 sentyabr Azərbaycan xalqı üçün həm qürur, həm də kədər dolu bir gündür. Bu gün, 44 günlük Vətən müharibəsinin başlandığı və Azərbaycanın tarixi ədaləti bərpa etmək üçün qətiyyət nümayiş etdirdiyi bir Anım Günüdür. Bu tarix, illərlə davam edən işğala, haqsızlığa və beynəlxalq laqeydliyə qarşı duruşumuzun rəmzinə çevrilib. Azərbaycan Silahlı Qüvvələrinin Ali Baş Komandanı, Prezident cənab İlham Əliyevin qətiyyətli rəhbərliyi ilə Azərbaycan Ordusu 44 günlük Vətən müharibəsində misilsiz şücaət göstərdi. Bu Qələbə sadəcə hərbi gücün deyil, həm də strateji siyasətin, illərlə davam edən ordu quruculuğunun və xalq-dövlət birliyinin nəticəsi idi. Ulu Öndər Heydər Əliyevin təməlini qoyduğu ordu quruculuğu siyasəti Prezident İlham Əliyev tərəfindən uğurla davam etdirilmiş, ordumuz ən müasir texnika və təlimlərlə təchiz edilmişdir. Bu gün Azərbaycan Ordusunun döyüş taktikası hətta xarici hərbi məktəblərdə dərslik kimi öyrənilir. Bu müharibənin əsas rəmzi “Dəmir Yumruq” olmuşdur. Bu rəmz xalqımızın Ali Baş Komandanın ətrafında sıx birləşdiyini, fərqli siyasi partiyaların, xarici ölkələrdə yaşayan azərbaycanlıların milli maraqlar naminə bir yumruq kimi birləşdiyini göstərdi. Cənab Prezident İlham Əliyevin diplomatik və informasiya sahəsində apardığı mübarizə də az əhəmiyyətli deyildi. O, aparıcı xarici mediaya verdiyi müsahibələrlə beynəlxalq ictimaiyyətə Azərbaycanın haqq səsini çatdırmış, ölkəmizə qarşı yönələn təzyiqlərin qarşısını almışdır. Dövlət başçısının dediyi kimi, Azərbaycan ərazisində separatizmin kökü kəsildi. Ermənistan silahlı qüvvələrinin qalıqları və qeyri-qanuni silahlı dəstələri tərk-silah edilərək ərazilərimizdən çıxarıldı, respublikamızın suverenliyi tam təmin edildi, bütün ölkə ərazisində Konstitusiya quruluşu bərpa olundu. Vətən müharibəsinin birinci günü Prezident, Silahlı Qüvvələrin Ali Baş Komandanı İlham Əliyev televiziya ilə xalqa müraciət edərək Ermənistan silahlı qüvvələrinin bir neçə istiqamətdə törətdiyi təxribatlara cavab olaraq ordumuzun genişmiqyaslı əks-hücum əməliyyatına başladığını bəyan etdi: «Ermənistan işğalçı dövlətdir, bu işğala son qoyulmalıdır və son qoyulacaqdır. Biz haqq yolundayıq. Bizim işimiz haqq işidir. Biz zəfər çalacağıq! Qarabağ bizimdir, Qarabağ Azərbaycandır!». Dövlətimizin başçısının xalqa müraciətində dediyi bu sözlər hər bir azərbaycanlını düşmən üzərində Qələbəyə ruhlandıran şüara çevrildi. Məhz əks-hücum əməliyyatının ilk saatlarında cəbhə xəttindən bir-birinin ardınca xoş xəbərlər gəlməyə başladı. Düşmənin xüsusilə möhkəmləndirilmiş ön müdafiə xəttini yaran Azərbaycan Ordusunun Füzuli rayonunun Qaraxanbəyli, Yuxarı Əbdürrəhmanlı, Horadiz və Qərvənd, Cəbrayıl rayonunun Nüzgar və Böyük Mərcanlı kəndlərini, Ağdərə rayonunda və Murovdağ silsiləsində mühüm strateji yüksəklikləri azad etməsi böyük ruh yüksəkliyi ilə qarşılandı.

Cənab Prezident İlham Əliyev 2 dekabr 2020-ci il tarixində imzaladığı Sərəncamla 27 sentyabr tarixini Azərbaycan Respublikasında Anım Günü elan etdi. Bu, şəhidlərimizin xatirəsinə, onların ailələrinə və qazilərimizə göstərilən ali ehtiramın təzahürüdür. Qazanılan Şanlı Qələbə Ali Baş Komandan, Prezident İlham Əliyevin «Dəmir yumruq» siyasəti ilə Güclü Ordumuzun əsgər və zabitlərimizin rəşadətilə əldə edilib. Bizim Prezidentimiz daima xalqı ilə, xalq da öz Prezidenti ilə birlikdədir. Məhz bu birliyin, həmrəyliyin reallığıdır ki, Prezidentimizin ilk gündən çağırışına bütün Azərbaycanın igid oğulları, ehtiyatda olan əsgər və zabitləri səs verərək, müsəlləh əsgər kimi döyüş meydanına yollandılar. Vətən müharibəsi Qəhrəmanları və qaziləri üçün xüsusi orden və medallar təsis edilmiş, onların sosial rifahının təmin edilməsi dövlətin ən mühüm prioritetlərindən biri olmuşdur. 27 sentyabr bizə tarixin hər bir səhifəsini: illərlə davam edən ədalətsizliyi, xalqımızın çəkdiyi əziyyətləri və sonda qazanılan Qələbənin böyüklüyünü xatırladır. Bu gün biz qalib bir xalq kimi, müzəffər bir dövlət kimi yaşayırıq. Şəhidlərimizin qanı yerdə qalmadı, ədalət bərpa olundu. Onların xatirəsi hər zaman qəlbimizdə yaşayacaqdır. Allah şəhidlərimizə rəhmət eləsin.

Elşən Əzizov

Yeni Azərbaycan Partiyası Saatlı rayon təşkilatının sədri

Paylaş:

Baxılıb: 604 dəfə