Azərbaycan və İtaliya prezidentləri strateji əməkdaşlığın gələcəyini dəyərləndirdilər

Bakı:

23 °C

68 %

9 m/s

Əlaqə

AZ RU EN

Ana səhifə / YAP xəbərləri / Azərbaycan və İtaliya prezidentləri strateji əməkdaşlığın gələcəyini dəyərləndirdilər

Azərbaycan və İtaliya prezidentləri strateji əməkdaşlığın gələcəyini dəyərləndirdilər

07.10.2025 [13:29]

Azərbaycan Respublikasının Prezidenti İlham Əliyev və İtaliya Respublikasının Prezidenti Sercio Mattarella arasında 30 sentyabr tarixində keçirilən rəsmi görüşlərdən sonra mətbuata bəyanat verilib. Bəyanatda iki ölkə arasında mövcud olan strateji tərəfdaşlıq münasibətləri yüksək qiymətləndirilib, əməkdaşlığın gələcək inkişaf perspektivləri barədə ətraflı fikir mübadiləsi aparılıb.

Cənab Prezident İlham Əliyev İtaliya Prezidentinin Azərbaycana ikinci dəfə rəsmi səfər etməsini xüsusi vurğulayıb. O, bu səfərin ölkələr arasında dostluq və strateji tərəfdaşlıq əlaqələrinin daha da möhkəmləndirilməsi baxımından mühüm hadisə olduğunu qeyd edib. Bildirilib ki, 2015-ci ildə və 2020-ci ildə imzalanmış strateji tərəfdaşlıq sənədləri iki ölkə arasında münasibətlərin hüquqi bazasını formalaşdırır və əməkdaşlığın dərinləşməsi üçün etibarlı zəmin yaradır.

Azərbaycan-İtaliya münasibətlərinin mühüm istiqamətlərindən biri energetika sahəsindəki əməkdaşlıqdır. Prezident İlham Əliyev qeyd edib ki, Azərbaycan uzun illərdir İtaliyaya xam neft ixrac edir və bu sahədə formalaşmış etibarlı tərəfdaşlıq əlaqələri var. 2020-ci ildən etibarən isə Trans-Adriatik Boru Kəməri vasitəsilə Azərbaycan qazı İtaliya bazarına çatdırılır. Bu, Azərbaycanın Avropanın enerji təhlükəsizliyində oynadığı rolu daha da artırır. Prezident həmçinin gələcəkdə yaşıl enerji sahəsində əməkdaşlıq imkanlarının araşdırıldığını, xüsusilə elektrik enerjisinin Avropaya ixracı üzrə layihələrin gündəmdə olduğunu bildirib.

Ticarət və iqtisadi münasibətlərin yüksək səviyyədə olduğunu vurğulayan Prezident İlham Əliyev qeyd edib ki, İtaliya hazırda Azərbaycanın əsas ticarət tərəfdaşlarından biridir. Ticarət dövriyyəsi artan dinamika ilə inkişaf edir. İtalyan şirkətləri Azərbaycan iqtisadiyyatının müxtəlif sahələrində, xüsusilə sənaye və infrastruktur layihələrində fəal iştirak edirlər.

Görüşdə həmçinin mədəni, humanitar, elmi və təhsil sahələrində əməkdaşlıq məsələləri də müzakirə olunub. Prezident İlham Əliyev İtaliya ilə mövcud olan tarixi-mədəni əlaqələrin daha da genişləndirilməsinin əhəmiyyətini vurğulayıb. O, Bakıda fəaliyyət göstərən İtaliya-Azərbaycan Universitetinin bu sahədə əməkdaşlığın bariz nümunəsi olduğunu bildirib.

Prezident bəyanatında qeyd edib ki, iki ölkə arasında siyasi münasibətlər yüksək səviyyədədir və qarşılıqlı etimad üzərində qurulub. Azərbaycan və İtaliya beynəlxalq təşkilatlar çərçivəsində də bir-birini dəstəkləyir, beynəlxalq hüquqa və ərazi bütövlüyü prinsipinə əsaslanan mövqe nümayiş etdirirlər.

Sonda Prezident İlham Əliyev İtaliya Prezidentinin səfərinin nəticələrini yüksək qiymətləndirərək, bu səfərin iki ölkə arasında strateji tərəfdaşlığın daha da möhkəmləndirilməsinə təkan verəcəyinə əminliyini ifadə edib.

Rövşən Əhmədov

YAP Ağcabədi rayon təşkilatının sədri

Paylaş:

Baxılıb: 642 dəfə