Türk dünyasının qarşısında açılan tarixi fürsətlər

Bakı:

15 °C

94 %

1 m/s

Əlaqə

AZ RU EN

Ana səhifə / YAP xəbərləri / Türk dünyasının qarşısında açılan tarixi fürsətlər

Türk dünyasının qarşısında açılan tarixi fürsətlər

09.10.2025 [13:26]

Toğrul Zeynalov

YAP Ağdam rayon təşkilatının əməkdaşı

Bu gün Türk Dövlətləri Təşkilatı ciddi geosiyasi mərkəzlərdən biri kimi formalaşır. Prezident İlham Əliyevin 7 oktyabr 2025-ci il tarixində Qəbələdə keçirilən Türk Dövlətləri Təşkilatının Dövlət Başçıları Şurasının 12-ci Zirvə Görüşündə çıxışında səsləndirdiyi bu fikir, müasir dövrdə türk dünyasının qarşısında açılan tarixi fürsətləri və regional güc kimi təşəkkül tapmaq istiqamətində atılan konkret addımları əks etdirir. Təşkilat artıq yalnız mədəni və tarixi bağlar əsasında qurulmuş bir birlik deyil, eyni zamanda siyasi, iqtisadi, hərbi, enerji və nəqliyyat sahələrində əməkdaşlığı dərinləşdirən, beynəlxalq münasibətlər sistemində öz yeri və çəkisi olan güclü bir platformaya çevrilməkdədir.

Hazırda Türk Dövlətləri Təşkilatı üzv dövlətlərin milli maraqlarını qorumaq və ortaq strateji mövqelər formalaşdırmaq baxımından mühüm bir dialoq və əməkdaşlıq məkanıdır. Azərbaycanın təşəbbüsləri və liderliyi ilə bu təşkilat qısa müddətdə siyasi koordinasiyanın dərinləşdirilməsi, regional təhlükəsizliyin gücləndirilməsi və qarşılıqlı etimadın artırılması istiqamətində mühüm uğurlar əldə edib. Prezident İlham Əliyevin vurğuladığı kimi, təşkilatın güclənməsi təkcə region üçün deyil, daha geniş coğrafiyada sabitliyin və əməkdaşlığın möhkəmləndirilməsi baxımından da mühüm əhəmiyyət kəsb edir. Bugünkü şəraitdə dünyada yeni güc mərkəzlərinin formalaşdığı və beynəlxalq münasibətlər sisteminin yenidən qurulduğu bir zamanda Türk Dövlətləri Təşkilatı da öz nüfuzunu artıraraq qlobal güc balansında söz sahibi olmağa doğru irəliləyir.

Cənab Prezident öz çıxışında Türk dünyasının ortaq dəyərlər üzərində birləşdiyini, tarixi və mədəni bağların siyasi reallıqlarla birləşərək praktiki nəticələr verdiyini qeyd etdi. Bu birlik xalqlar arasında həmrəyliyin möhkəmlənməsi, dil, mədəniyyət, təhsil və informasiya sahələrində ortaq layihələrin həyata keçirilməsi ilə müşayiət olunur. Xüsusilə son illərdə Türk Akademiyası, Türk Mədəniyyəti və İrsi Fondu kimi təsisatların fəaliyyəti, ortaq təhsil proqramlarının icrası və gənclər arasında mübadilə mexanizmləri türk xalqları arasında mənəvi körpüləri daha da möhkəmləndirir. Bu, yalnız simvolik deyil, strateji dəyəri olan birgəlik nümunəsidir.

Eyni zamanda iqtisadi sahədə də Türk Dövlətləri Təşkilatı üzv dövlətlər arasında qarşılıqlı ticarətin və investisiya axınlarının artırılması, ortaq infrastruktur layihələrinin həyata keçirilməsi ilə geosiyasi gücünü daha da artırır. Prezident İlham Əliyev çıxışında bildirdi ki, Azərbaycan indiyədək digər türk dövlətlərinə 20 milyard dollardan artıq sərmayə yatırıb və bu investisiyalar qarşılıqlı inam və ortaq maraqların göstəricisidir. Bu təşəbbüslər təkcə iqtisadi deyil, həm də strateji mahiyyət daşıyır. Azərbaycan, Türkiyə, Qazaxıstan, Özbəkistan və digər üzv dövlətlər arasında enerji, logistika və nəqliyyat sahələrində reallaşan layihələr bütövlükdə türk coğrafiyasını bir-birinə daha da yaxınlaşdırır. Bu da təşkilatın regionlararası nəqliyyat qovşağına çevrilməsinə xidmət edir.

Paylaş:

Baxılıb: 592 dəfə