Gədəbəy seçiciləri Prezident İlham Əliyevə səs verəcəklər

Bakı:

26 °C

54 %

3 m/s

Əlaqə

AZ RU EN

Ana səhifə / YAP xəbərləri / Gədəbəy seçiciləri Prezident İlham Əliyevə səs verəcəklər

Gədəbəy seçiciləri Prezident İlham Əliyevə səs verəcəklər

04.10.2013 [10:00]

Rayonun Çay Rəsullu və Düz Rəsullu kəndlərində seçicilərlə görüşlər keçirilib
9 oktyabr 2013-cü il prezident seçkiləri öncəsi təbliğat-təşviqat kampaniyası çərçivəsində keçirilən kütləvi tədbirlər davam edir. Yeni Azərbaycan Partiyasının Sədri, Prezident İlham Əliyevin təbliğatına həsr olunmuş növbəti tədbir Gədəbəy rayonunun Çay Rəsullu və Düz Rəsullu kəndlərində keçirilib.
İlk olaraq qarşıdan gələn prezident seçkilərinin olduqca əlamətdar bir hadisə olduğunu qeyd edən YAP rayon təşkilatının aparat rəhbəri Namiq Rüstəmov Prezident İlham Əliyevin bu seçkilərdə alternativsiz lider olduğunu dilə gətirib. Son illər Gədəbəy rayonunda aparılan yenidənqurma işlərindən bəhs açan N.Rüstəmov cənab İlham Əliyevin prezidentliyi dövründə rayonda bir sıra sənaye müəssisələrinin, o cümlədən, məktəblərin istifadəyə verildiyini xatırladıb. Natiq Prezidentimizin uğurlu və davamlı daxili siyasətindən danışaraq, Gədəbəy rayonunun daima dövlətçiliyə sədaqətli olduğunu önə çəkib. O, məhz bu sədaqətdən çıxış edərək Gədəbəy camaatının Ümummilli liderimiz, müstəqil Azərbaycanın memarı Heydər Əliyev siyasətinin davamçısı İlham Əliyevə səs verəcəyinə inandığını deyib.
Daha sonra çıxış edən Bakı Dövlət Universitetinin Sosiologiya kafedrasının müdiri, professor, “Şöhrət” ordenli İzzət Rüstəmov bildirib ki, Prezident İlham Əliyevin həyata keçirdiyi uğurlu siyasi kurs Azərbaycanın inkişafının yeni mərhələsidir: “İlham Əliyevin son 10 ildə, Prezident olduğu dövrdə gördüyü işlər bunu deməyə əsas verir. Fəaliyyətinin hər anında milli mənafenin qorunması uğrunda mübarizə aparan cənab İlham Əliyev yalnız millətinin və dövlətinin rifahı uğrunda çalışır”.
Çıxış edən millət vəkili Sevinc Hüseynova vətəndaşların seçkidə fəal iştirakının ölkəmizin sabahı naminə vacib bir şərt olduğunu önə çəkib: “Mən inanıram ki, xalqımız 2003-cü ildə, 2008-ci ildə olduğu kimi, müstəqilliyin əbədiliyinə, sarsılmazlığına, inkişafa, yüksəlişə - İlham Əliyevə səs verəcək. Məhz İlham Əliyev Azərbaycanı işıqlı, inamlı sabaha aparacaq!”.
Çıxış edən Avrasya Universitetinin rektoru Nazim Hüseynli, Texniki Universitetin Kimya kafedrasının müdiri Mahmud Rüstəmov ölkə Prezidentinin regionların inkişafına xüsusi diqqət göstərdiyini önə çəkiblər. Bildirilib ki, regionların sosial-iqtisadi inkişafına həsr edilən dövlət proqramları Azərbaycanın yeni inkişaf mərhələsinə qədəm qoymasını şərtləndirib. Bu gün ölkəmizdə bütün sahələr paralel şəkildə inkişaf edir. Bu yolu davamlı etmək üçün Azərbaycan xalqı 9 oktyabrda Prezident İlham Əliyevə səs verməlidir.
Çıxış edən kənd sakinləri bildiriblər ki, hər bir Gədəbəy seçicisi bu gün ölkə Prezidentinin apardığı siyasi kursu dəstəkləyir. Onlar əminlik ifadə ediblər ki, hər bir rayon sakini ölkəmizdəki siyasi-iqtisadi sabitliyi dəstəkləyir və bu dəstəyi oktyabrın 9-da YAP-ın namizədi cənab İlham Əliyevə səs verməklə, növbəti dəfə nümayiş etdirəcəklər.
Pərviz SADAYOĞLU

Paylaş:

Baxılıb: 1241 dəfə