Azərbaycan–Qazaxıstan münasibətlərində yeni mərhələ

Bakı:

23 °C

64 %

6 m/s

Əlaqə

AZ RU EN

Ana səhifə / YAP xəbərləri / Azərbaycan–Qazaxıstan münasibətlərində yeni mərhələ

Azərbaycan–Qazaxıstan münasibətlərində yeni mərhələ

23.10.2025 [16:41]

Cari ilin oktyabrın 21-də Qazaxıstanın paytaxtı Astanada Azərbaycan–Qazaxıstan Ali Dövlətlərarası Şurasının növbəti iclası keçirildi. Bu mühüm tədbirdə Azərbaycan Respublikasının Prezidenti, möhtərəm cənab İlham Əliyev iştirak və çıxış etdi. Dövlət başçımızın çıxışı iki qardaş ölkə arasında münasibətlərin strateji səviyyədə möhkəmləndirilməsinə, regionda sülh və əməkdaşlıq mühitinin dərinləşdirilməsinə xidmət edən mühüm mesajlarla yadda qaldı.

Azərbaycan Prezidenti çıxışında vurğuladı ki, Azərbaycan ilə Qazaxıstanı tarixən birləşdirən köklər – ortaq dil, din, mədəniyyət və ən əsası qardaşlıq münasibətləri – bu gün dövlətlərarası münasibətlərin təməlini təşkil edir. Ölkə başçımız qeyd etdi ki, iki ölkə arasında əlaqələr sadəcə dostluq çərçivəsində deyil, artıq müttəfiqlik səviyyəsinə yüksəlib. Bu, həm siyasi, həm iqtisadi, həm də mədəni-humanitar sahələrdə özünü aydın göstərir.

Dövlət rəhbəri xüsusi olaraq iqtisadi əməkdaşlıqdan danışarkən bildirdi ki, Azərbaycan ilə Qazaxıstan arasında ticarət dövriyyəsi son illərdə dinamik şəkildə artmaqdadır və bu göstəricini daha da yüksəltmək üçün geniş imkanlar mövcuddur. Prezident İlham Əliyev həmçinin nəqliyyat-logistika sahəsində əməkdaşlığın əhəmiyyətini vurğuladı. O, qeyd etdi ki, “Orta Dəhliz” layihəsi iki ölkə üçün strateji əhəmiyyət daşıyır və bu istiqamətdə görülən işlər regionun nəqliyyat xəritəsini tamamilə dəyişdirəcək.

Cənab Prezident enerji sektorunda da əməkdaşlığın perspektivlərinə toxundu. O bildirdi ki, Azərbaycan və Qazaxıstan təkcə xammal ixrac edən ölkələr kimi deyil, həm də regionun enerji təhlükəsizliyinə real töhfə verən tərəfdaşlardır. Bu baxımdan, Xəzər dənizi üzərindən enerji və nəqliyyat əlaqələrinin inkişafı iki ölkənin gələcək inkişaf strategiyasında mühüm yer tutur.

Azərbaycan Respublikasının Prezidenti çıxışında sülh və sabitlik məsələlərinə də xüsusi yer ayırdı. O, qeyd etdi ki, Cənubi Qafqazda yeni geosiyasi reallıq formalaşıb və Azərbaycan regionda davamlı sülhün, qarşılıqlı hörmətin və əməkdaşlığın təmin olunması tərəfdarıdır. Onun sözlərinə görə, Azərbaycanın sülh təşəbbüsləri bölgənin ümumi inkişafına xidmət edir və bu istiqamətdə Qazaxıstanın dəstəyini ölkəmiz yüksək qiymətləndirir.

İclasın yekununda Azərbaycan və Qazaxıstan arasında bir sıra mühüm sənədlər imzalandı. Bu sənədlər təkcə siyasi bəyanatlar deyil, iki ölkənin gələcək onilliklər üçün əməkdaşlıq xəritəsini müəyyən edən praktiki addımların başlanğıcı kimi dəyərləndirilir.

Astanada səsləndirilən bəyanat bir daha göstərdi ki, Azərbaycan Prezidenti cənab İlham Əliyevin rəhbərliyi ilə Azərbaycan təkcə regionun deyil, bütün türk dünyasının inkişafında aparıcı rol oynayır. Dövlət başçımızın uzaqgörən siyasəti nəticəsində Azərbaycan öz milli maraqlarını qorumaqla yanaşı, həm də dost və qardaş ölkələrlə bərabər, sabit və ədalətli regional düzənin qurulmasına mühüm töhfə verir.

Bu gün Azərbaycan–Qazaxıstan münasibətləri artıq sadəcə diplomatik əməkdaşlıq çərçivəsində deyil, ortaq tarixə, ortaq gələcəyə və qardaşlıq dəyərlərinə əsaslanan strateji tərəfdaşlıq modeli kimi formalaşır.

Nazim Bünyatov

YAP Ağcabədi rayon təşkilatın sədr müavini

Paylaş:

Baxılıb: 546 dəfə