İkinci Qarabağ müharibəsi ölkəmizdə milli həmrəyliyi, milli birliyi daha da gücləndirdi

Bakı:

15 °C

77 %

3 m/s

Əlaqə

AZ RU EN

Ana səhifə / YAP xəbərləri / İkinci Qarabağ müharibəsi ölkəmizdə milli həmrəyliyi, milli birliyi daha da gücləndirdi

İkinci Qarabağ müharibəsi ölkəmizdə milli həmrəyliyi, milli birliyi daha da gücləndirdi

04.11.2025 [13:42]

İkinci Qarabağ müharibəsi Azərbaycan tarixinin ən şanlı səhifələrindən biridir. Bu müharibə yalnız ərazi bütövlüyümüzün bərpası ilə deyil, həm də xalqımızın milli həmrəyliyinin və birliyinin təzahürü kimi yadda qaldı. 30 ilə yaxın davam edən işğal dövrü boyu xalqımızın qəlbində yanan azadlıq istəyi 2020-ci ildə böyük bir milli oyanışa çevrildi. Hər bir azərbaycanlı özünü bu mübarizənin bir hissəsi kimi hiss etdi. Dövlət rəhbərliyi, ordu, xalq və diaspor təşkilatları arasında misilsiz həmrəylik və koordinasiya formalaşdı. Bu həmrəylik Vətən müharibəsinin qələbə ilə başa çatmasında həlledici rol oynadı.

Müharibə günlərində bütün Azərbaycan xalqı – gəncindən yaşlısına, qadınından kişisinə qədər – ordumuza mənəvi və maddi dəstək göstərdi. Şəhərlərdə və kəndlərdə insanlar könüllü ianələr topladı, gənclər cəbhəyə yollandı, analar və bacılar əsgərlər üçün ərzaq, geyim və digər ehtiyacları təmin etdi. Sosial şəbəkələrdə və informasiya müharibəsində gənclərimizin fəallığı milli birliyin müasir təzahürlərindən biri oldu. Azərbaycanın hər bir guşəsində “Qarabağ Azərbaycandır!” şüarı xalqın ortaq düşüncə və məqsədinin rəmzinə çevrildi.

Bu dövrdə milli kimlik, vətənpərvərlik və mənəvi dəyərlər daha da gücləndi. Cəmiyyətin müxtəlif təbəqələri, siyasi partiyalar, ictimai təşkilatlar və sadə vətəndaşlar dövlətin ətrafında sıx birləşərək misilsiz həmrəylik nümayiş etdirdilər. Hətta xaricdə yaşayan soydaşlarımız da bir yumruq kimi birləşərək Azərbaycanın haqq səsini beynəlxalq arenada ucaltdılar. Bu, milli birliyin yalnız ölkə daxilində deyil, həm də qlobal miqyasda özünü göstərdiyini sübut etdi.

İkinci Qarabağ müharibəsi həm də Azərbaycanda yaşayan bütün etnik və dini qruplar arasında birgəyaşayış, qarşılıqlı hörmət və həmrəyliyin nə qədər möhkəm olduğunu göstərdi. Talış, ləzgi, rus, avar və digər xalqların nümayəndələri də Azərbaycan Ordusunun sıralarında Vətən uğrunda döyüşdülər. Bu fakt Azərbaycanın çoxmillətli, tolerant və birləşdirici dövlət modeli olduğunu bütün dünyaya nümayiş etdirdi.

Qələbədən sonra isə milli birlik yeni bir mərhələyə qədəm qoydu. Şəhid ailələrinə, qazilərə göstərilən diqqət və qayğı cəmiyyətdə həmrəyliyin daha da möhkəmlənməsinə səbəb oldu. Qələbə həm də gənc nəslin vətənpərvərlik ruhunda tərbiyəsində mühüm dönüş nöqtəsi oldu. Məktəblərdə, ali təhsil müəssisələrində və mədəni tədbirlərdə vətən sevgisi, milli dəyərlərə hörmət və birlik ideyası ön plana çəkildi.

Bu müharibə bir daha sübut etdi ki, Azərbaycan xalqı qarşısında milli məqsədlər dayandıqda parçalanmaz bir gücə çevrilir. Dövlətin gücü xalqın birliyindən, xalqın qüdrəti isə dövlətə olan inamdan qaynaqlanır. Bu qarşılıqlı etimad sayəsində Azərbaycan regionda nüfuzlu və qalib bir dövlətə çevrildi.

İkinci Qarabağ müharibəsi təkcə torpaqlarımızı azad etmədi, həm də xalqımızın milli ruhunu, özünə inamını və tarixi ədalət hissini bərpa etdi. Bu müharibə Azərbaycan xalqını birləşdirən ortaq dəyərlərin, ortaq məqsədlərin və ortaq gələcəyin rəmzinə çevrildi. Bu gün də həmin həmrəylik və birlik ruhu ölkəmizin siyasi sabitliyinin, sosial inkişafının və güclü dövlətçilik ənənələrinin əsas dayaqlarından biridir.

İkinci Qarabağ müharibəsi yalnız hərbi qələbə deyil, həm də Azərbaycan xalqının milli həmrəylik və birlik tarixinin parlaq zirvəsidir.

Rəhman Ağabalayev

YAP Qusar rayon təşkilatının fəal üzvü

Paylaş:

Baxılıb: 390 dəfə