Hərbi, diplomatik və strateji düşüncənin parlaq nəticəsi

Bakı:

22 °C

58 %

4 m/s

Əlaqə

AZ RU EN

Ana səhifə / YAP xəbərləri / Hərbi, diplomatik və strateji düşüncənin parlaq nəticəsi

Hərbi, diplomatik və strateji düşüncənin parlaq nəticəsi

20.11.2025 [15:42]

20 noyabr Azərbaycan xalqı üçün yalnız bir tarixi hadisənin deyil, böyük bir dönüş nöqtəsinin rəmzidir. Bu tarix uzun illər işğal altında qalan Ağdamın doğma sahibinə qovuşduğu gün kimi yaddaşlara həkk olunub. Bir zamanlar Qarabağın ən inkişaf etmiş mərkəzlərindən olan Ağdam mədəniyyət, sənət, sənaye və kənd təsərrüfatı sahələrində böyük nüfuza malik idi. Lakin 1993-cü ildə şəhərin işğalı ilə Ağdam tamamilə dağıdıldı, evlər, məscidlər, məktəblər, tarixi abidələr viran qoyuldu və şəhər “Qafqazın Xirosiması” adlandırılacaq qədər böyük bir faciənin simvoluna çevrildi.

Bu ağır günlərin sona çatması, ilk növbədə, Prezident İlham Əliyevin qətiyyətli siyasi iradəsi, müdrik rəhbərliyi və güclü diplomatik fəaliyyəti sayəsində mümkün oldu. 2020-ci il Vətən müharibəsində Azərbaycan Ordusu Ali Baş Komandanın əmrləri ilə tarixi ədaləti bərpa etdi və 20 noyabrda Ağdam rayonu bir güllə belə atılmadan Azərbaycana qaytarıldı. Bu, həm hərbi, həm diplomatik, həm də strateji düşüncənin parlaq nəticəsi idi. Prezident İlham Əliyevin müharibə dövründə göstərdiyi liderlik, xalqı bir yumruq kimi birləşdirməsi, informasiya cəbhəsində qazandığı üstünlük Ağdamın azad olunmasının əsas səbəblərindən biri oldu.

Ağdam işğaldan azad edildikdən dərhal sonra Prezident İlham Əliyevin bölgəyə etdiyi səfərlər şəhərin yenidən dirçəlişinə verilən böyük əhəmiyyəti göstərdi. Dövlət başçısı Birinci vitse-prezident Mehriban Əliyeva ilə birlikdə Ağdama dəfələrlə səfər edərək burada aparılan quruculuq işləri ilə yaxından tanış oldu, yeni layihələrin təməlini qoydu və şəhərin gələcək inkişaf konsepsiyasını şəxsən diqqətdə saxladı. Ali Baş Komandanın Ağdam səfərləri təkcə bir rəsmi vizit deyil, həm də şəhərin taleyinin dövlət siyasətində prioritet olduğunu göstərən mesaj idi. Onun işğaldan sonrakı ilk çıxışlarında Ağdamın mərkəzində dayanaraq “Biz Ağdamı dirçəldəcəyik!” deməsi ağdamlılara böyük ümid və ruh yüksəkliyi verdi.

Bu gün Ağdamda həyata keçirilən genişmiqyaslı bərpa və quruculuq işləri, salınan yeni yollar, “ağıllı şəhər” konsepsiyası, müasir yaşayış məhəllələri və sosial infrastruktur layihələri Prezident İlham Əliyevin rəhbərliyi ilə reallaşan böyük Qayıdış proqramının tərkib hissəsidir. Artıq bir zamanlar dağıntılar içində olan Ağdam addım-addım yenidən qurulur, əvvəlkindən də daha güclü və müasir bir şəhərə çevrilir. 20 noyabr isə ağdamlıların arzusunun gerçəyə çevrildiyi, tarixi ədalətin bərpa olunduğu və dirçəlişin başlandığı gün kimi hər il böyük qürurla qeyd olunur.

Sahib Şükürov

YAP Göyçay rayon təşkilatının sədri

Paylaş:

Baxılıb: 501 dəfə