Dünya Azərbaycanlılarının Həmrəylik Günü: milli birlik simvolu

Bakı:

22 °C

59 %

3 m/s

Əlaqə

AZ RU EN

Ana səhifə / YAP xəbərləri / Dünya Azərbaycanlılarının Həmrəylik Günü: milli birlik simvolu

Dünya Azərbaycanlılarının Həmrəylik Günü: milli birlik simvolu

29.12.2025 [17:22]

Eldar Əsədov

YAP Tərtər rayon təşkilatının sədri

31 dekabr – Dünya Azərbaycanlılarının Həmrəylik Günü Azərbaycan xalqının milli yaddaşında və müasir tarixində xüsusi yer tutan, bütün dünya azərbaycanlılarını vahid amal ətrafında birləşdirən əlamətdar gündür. Bu tarix yalnız təqvim günü deyil, eyni zamanda milli birlik, həmrəylik, soy-kökə bağlılıq və azərbaycançılıq ideologiyasının parlaq ifadəsidir. Dünyanın müxtəlif ölkələrində yaşayan milyonlarla azərbaycanlını bir araya gətirən bu bayram milli kimliyimizin qorunması və möhkəmləndirilməsi baxımından mühüm əhəmiyyət daşıyır.

Dünya Azərbaycanlılarının Həmrəylik Gününün əsasını 1989-cu ilin dekabrında Araz çayı boyunca baş verən tarixi hadisələr qoymuşdur. Həmin dövrdə Azərbaycan xalqı süni şəkildə parçalanmış sərhədlərə qarşı etiraz edərək birliyə, azadlığa və milli həmrəyliyə çağırış etmişdir. Bu hadisələr xalqımızın milli özünüdərkinin güclənməsinə, azərbaycanlıların taleyinin bir olduğunu nümayiş etdirməsinə səbəb olmuşdur. 1991-ci ildə Ümummilli Lider Heydər Əliyevin təşəbbüsü ilə 31 dekabr tarixinin Dünya Azərbaycanlılarının Həmrəylik Günü kimi rəsmiləşdirilməsi bu ideyanın dövlət səviyyəsində təsdiqi olmuşdur.

Ümummilli Lider Heydər Əliyev dünya azərbaycanlılarının həmrəyliyini strateji milli vəzifə kimi qiymətləndirmiş, diaspor fəaliyyətinin gücləndirilməsini daim diqqət mərkəzində saxlamışdır. Onun formalaşdırdığı azərbaycançılıq ideologiyası milli birliyin əsas sütununa çevrilmişdir. Bu ideologiya dünyanın harasında yaşamasından asılı olmayaraq hər bir azərbaycanlının dilinə, mədəniyyətinə, tarixinə və dövlətinə bağlı olmasını əsas prinsip kimi müəyyən etmişdir.

Bu gün Prezident İlham Əliyevin rəhbərliyi ilə dünya azərbaycanlılarının həmrəyliyi daha da möhkəmlənmiş, diaspor təşkilatlarının fəaliyyəti yeni mərhələyə qədəm qoymuşdur. Xaricdə yaşayan soydaşlarımız Azərbaycanın haqq səsinin beynəlxalq ictimaiyyətə çatdırılmasında, milli maraqlarımızın müdafiəsində və ölkəmizin imicinin gücləndirilməsində mühüm rol oynayırlar. Xüsusilə 44 günlük Vətən müharibəsi dövründə dünya azərbaycanlılarının nümayiş etdirdiyi birlik və həmrəylik xalqımızın gücünü və qlobal miqyasda təşkilatlanma qabiliyyətini bir daha sübut etdi.

Dünya Azərbaycanlılarının Həmrəylik Günü eyni zamanda gənc nəslin milli ruhda tərbiyəsi baxımından da mühüm əhəmiyyət kəsb edir. Bu gün gənclərə milli dəyərlərə sədaqət, vətənpərvərlik, tarixi yaddaşa hörmət və dövlətçiliyə bağlılıq aşılanır. Xaricdə yaşayan gənc azərbaycanlıların ana dilini unutmaması, milli-mənəvi dəyərlərimizi yaşatması bu həmrəyliyin davamlılığını təmin edən əsas amillərdəndir.

31 dekabr həm də Azərbaycan xalqının sülhsevərliyini, multikultural dəyərlərə bağlılığını və humanist mövqeyini nümayiş etdirir. Dünyanın müxtəlif ölkələrində yaşayan azərbaycanlılar yaşadıqları cəmiyyətlərə inteqrasiya etməklə yanaşı, öz milli kimliklərini qoruyub saxlayaraq Azərbaycanın mədəniyyətini, musiqisini, ədəbiyyatını və tarixini təbliğ edirlər. Bu isə Azərbaycanı dünyada tanıdan mühüm vasitələrdən biridir.

31 dekabr – Dünya Azərbaycanlılarının Həmrəylik Günü xalqımızın milli birlik ideyasının rəmzi, ümumi taleyimizin və ortaq gələcəyimizin ifadəsidir. Bu gün bizi birləşdirən dəyərləri daha da möhkəmləndirməyə, dövlətçiliyimizi qorumağa və Azərbaycan adını daim uca tutmağa çağırır. Harada yaşamasından asılı olmayaraq hər bir azərbaycanlı bu həmrəyliyin daşıyıcısıdır və bu birlik Azərbaycanın bu günü və sabahı üçün ən möhkəm təminatdır.

Paylaş:

Baxılıb: 516 dəfə