Azərbaycan və Serbiya arasında yüksələn əməkdaşlıq modeli

Bakı:

26 °C

57 %

10 m/s

Əlaqə

AZ RU EN

Ana səhifə / YAP xəbərləri / Azərbaycan və Serbiya arasında yüksələn əməkdaşlıq modeli

Azərbaycan və Serbiya arasında yüksələn əməkdaşlıq modeli

18.02.2026 [19:46]

Azərbaycan Respublikası ilə Serbiya Respublikası arasında ikitərəfli münasibətlər son illərdə dinamik inkişaf edərək strateji tərəfdaşlıq səviyyəsinə yüksəlmişdir. Hər iki ölkə beynəlxalq hüququn norma və prinsiplərinə, dövlətlərin suverenliyi və ərazi bütövlüyünə hörmətə əsaslanan siyasət yürüdür. Qarşılıqlı etimad və siyasi iradə Bakı ilə Belqrad arasında əməkdaşlığın əsasını təşkil edir.

Yüksək səviyyəli siyasi dialoq münasibətlərin inkişafında həlledici rol oynayır. Azərbaycan Respublikasının Prezidenti İlham Əliyev ilə Serbiya Respublikasının Prezidenti Aleksandar Vuçiç arasında keçirilən müntəzəm görüşlər əməkdaşlığın istiqamətlərini müəyyənləşdirir və konkret nəticələrə gətirib çıxarır. Dövlət başçılarının qarşılıqlı səfərləri münasibətlərin davamlı və sistemli xarakter aldığını göstərir.

Enerji sahəsində əməkdaşlıq ikitərəfli münasibətlərin əsas sütunlarından biridir. Azərbaycan Avropanın enerji təhlükəsizliyində mühüm rol oynayan etibarlı tərəfdaş kimi çıxış edir. Serbiyanın enerji mənbələrinin şaxələndirilməsi siyasəti çərçivəsində Azərbaycan qazının bu ölkəyə tədarükü xüsusi əhəmiyyət daşıyır

İqtisadi sahədə əlaqələrin genişləndirilməsi də prioritet istiqamətlərdəndir. Ticarət dövriyyəsinin artırılması, qarşılıqlı investisiyaların təşviqi, nəqliyyat və logistika sahəsində birgə layihələrin həyata keçirilməsi mühüm perspektivlər açır. Azərbaycan Şərq-Qərb nəqliyyat dəhlizinin vacib iştirakçısı kimi, Serbiya isə Balkan regionunda mühüm tranzit mərkəzi olaraq qarşılıqlı tamamlayıcı rol oynayır. Bu amil iqtisadi əməkdaşlığın dərinləşməsi üçün əlverişli zəmin yaradır.

Humanitar sahədə əməkdaşlıq da diqqət mərkəzindədir. Təhsil, mədəniyyət və idman sahələrində həyata keçirilən layihələr xalqlar arasında dostluq münasibətlərini gücləndirir. Qarşılıqlı mədəni tədbirlər və ictimai diplomatiya təşəbbüsləri dövlətlərarası əlaqələrin sosial dayaqlarını möhkəmləndirir.

Fevralın 15-də cənab Prezident İlham Əliyevin Serbiyaya rəsmi səfəri isə ikitərəfli münasibətlərin inkişafında yeni mərhələ kimi qiymətləndirilə bilər. Səfər çərçivəsində aparılan danışıqlar və verilən bəyanatlar göstərdi ki, Azərbaycan–Serbiya əlaqələri təkcə mövcud əməkdaşlıq sahələri ilə məhdudlaşmır, həm də yeni istiqamətlər üzrə genişlənmək potensialına malikdir. Enerji təchizatı, infrastruktur, investisiya və regional əməkdaşlıq məsələlərinin geniş müzakirəsi iki ölkənin uzunmüddətli strateji baxışının uzlaşdığını nümayiş etdirdi.

Bu səfərin əhəmiyyəti ondadır ki, o, tərəflər arasında siyasi etimadı daha da möhkəmləndirdi, praktiki əməkdaşlıq mexanizmlərini konkretləşdirdi və strateji tərəfdaşlığın real məzmununu zənginləşdirdi. Eyni zamanda, regional və beynəlxalq məsələlərdə ortaq mövqelərin bir daha təsdiqlənməsi Azərbaycan ilə Serbiya arasında münasibətlərin davamlı və perspektivli xarakter daşıdığını göstərdi.

Nəticə etibarilə, Azərbaycan Respublikası ilə Serbiya Respublikası arasında münasibətlər qarşılıqlı hörmət və strateji maraqlara əsaslanaraq inkişaf edir. Son rəsmi səfər isə bu münasibətlərin möhkəmlənməsində və gələcək əməkdaşlıq istiqamətlərinin müəyyənləşdirilməsində mühüm siyasi hadisə kimi tarixə düşdü.

Elşən Səfərov

YAP Ağcabədi rayon təşkilatının əməkdaşı

Paylaş:

Baxılıb: 501 dəfə