Gələcəyə yönəlmiş çoxşaxəli əməkdaşlıq

Bakı:

15 °C

94 %

0 m/s

Əlaqə

AZ RU EN

Ana səhifə / YAP xəbərləri / Gələcəyə yönəlmiş çoxşaxəli əməkdaşlıq

Gələcəyə yönəlmiş çoxşaxəli əməkdaşlıq

19.02.2026 [13:26]

İlqar İlyasov

YAP Laçın rayon təşkilatının sədri

Azərbaycan Respublikasının Prezidenti İlham Əliyevin fevralın 15-də Serbiya Respublikasına gerçəkləşdirdiyi səfər iki ölkə arasındakı münasibətlərin dinamik inkişafını və strateji tərəfdaşlığın dərinləşməsini bir daha təsdiqlədi. Dövlət başçısının səfər çərçivəsində verdiyi bəyanatlar həm siyasi, həm də iqtisadi müstəvidə gələcək əməkdaşlığın yol xəritəsini müəyyən edir. Bu münasibətlərin təməlində dayanan ən mühüm amillərdən biri ölkə rəhbərləri arasındakı qarşılıqlı etimad və şəxsi dostluq əlaqələridir. Prezident İlham Əliyev öz bəyanatında xüsusi olaraq vurğuladı ki, bizim təmaslarımız uzun illərdir ki, davam edir, biz bir-birimizi yaxından tanıyırıq, səmimi söhbətlər aparırıq və aramızda möhkəm dostluq münasibətləri var. Məhz bu şəxsi münasibətlər dövlətlərarası əlaqələrin bürokratik maneələrdən uzaq, çevik və nəticəyönümlü şəkildə inkişaf etməsinə imkan yaradır. Azərbaycan Respublikası və Serbiya Respublikası arasındakı ikitərəfli münasibətlər hər iki tərəfin bir-birinin suverenliyinə və ərazi bütövlüyünə verdiyi sarsılmaz dəstək üzərində qurulub. Beynəlxalq təşkilatlar çərçivəsində nümayiş etdirilən bu həmrəylik strateji tərəfdaşlığın ruhuna tamamilə uyğundur. Səfər zamanı iki ölkə arasında imzalanmış sənədlər əməkdaşlığın hüquqi bazasını daha da möhkəmləndirmişdir. Bu sənədlər sadəcə niyyət protokolları deyil, konkret sahələri, o cümlədən iqtisadiyyat, ticarət, texnologiya və investisiya sahələrini əhatə edən əməli sənədlərdir. Prezident bəyanatında qeyd etdi ki, bizim gələcək üçün də açıq-aydın planlarımız var və bu planlar hər iki xalqın rifahına xidmət edir. Bu strateji baxış Azərbaycanın Avropa məkanındakı ən etibarlı tərəfdaşlarından biri olan Serbiya ilə əlaqələrin uzunmüddətli perspektivini təmin edir. İqtisadi əməkdaşlığın ən prioritet istiqamətlərindən biri kimi investisiya imkanları ön plana çıxır. Prezident İlham Əliyev açıq şəkildə bəyan etdi ki, Azərbaycan Serbiyaya böyük həcmdə sərmayə qoymağa hazırdır. Bu, Azərbaycanın iqtisadi qüdrətinin və xarici bazarlarda aktiv oyunçuya çevrilməsinin bariz nümunəsidir. Xüsusilə infrastruktur, kənd təsərrüfatı və yüksək texnologiyalar sahəsində Azərbaycan investisiyaları Serbiya iqtisadiyyatının şaxələndirilməsinə töhfə verə bilər. Bununla yanaşı, bütövlükdə energetika sahəsində bizim əlaqələrimiz indi çoxşaxəli formatda inkişaf edir. Azərbaycanın enerji resurslarının Avropaya, o cümlədən Serbiyaya çatdırılması regionun enerji təhlükəsizliyinin təmin olunmasında mühüm rol oynayır. Qaz interkonnektorlarının inşası və gələcəkdə bərpa olunan enerji sahəsindəki birgə layihələr bu əməkdaşlığın onurğa sütununu təşkil edir. Səfərin yekunları göstərir ki, Azərbaycan və Serbiya arasındakı dialoq fasiləsiz xarakter daşıyır. Dövlət başçısı "Biz yaxın gələcəkdə yenə də bir-birimizlə görüşəcəyik" deməklə, münasibətlərin intensivliyinin qorunub saxlanacağını bildirdi. Bu görüşlər təkcə rəsmi protokollardan ibarət deyil, həm də regionun iqtisadi mənzərəsini dəyişəcək böyük layihələrin müzakirə edildiyi platformadır. Bakı və Belqrad arasındakı bu möhkəm körpü həm Cənubi Qafqazın, həm də Balkanların sabitliyinə və inkişafına xidmət edən mühüm amilə çevrilmişdir.

Paylaş:

Baxılıb: 671 dəfə