Tarixi ədalətin bərpası: Xocalının azad edilməsi

Bakı:

16 °C

77 %

1 m/s

Əlaqə

AZ RU EN

Ana səhifə / YAP xəbərləri / Tarixi ədalətin bərpası: Xocalının azad edilməsi

Tarixi ədalətin bərpası: Xocalının azad edilməsi

25.02.2026 [12:17]

Uzun illər davam edən işğal siyasəti nəticəsində Xocalı şəhəri öz əvvəlki simasını tamamilə itirmiş, xarabalığa çevrilmişdi. Bir zamanlar yaşayışın, ailə səmimiyyətinin, uşaq səslərinin və şəhər həyatının hökm sürdüyü bu məkan işğal dövründə məqsədli şəkildə məhv edilmiş, həyat üçün yararsız hala salınmışdır. Dağıdılmış evlər, yerlə-yeksan edilmiş küçələr və sıradan çıxarılmış infrastruktur Xocalının hansı faciəli taleyi yaşadığını açıq şəkildə ortaya qoyur.

İşğal təkcə ərazi itkisi ilə yekunlaşmamışdır. Xocalıda həyata keçirilən dağıntılar planlı xarakter daşımış, şəhərin sosial, mədəni və iqtisadi dayaqları sistemli şəkildə sıradan çıxarılmışdır. Yaşayış binalarının dağıdılması, məktəblərin və uşaq bağçalarının yararsız hala salınması bu şəhərdə mülki həyatın tamamilə məhv edilməsinə yönəlmişdi.

Xarabalığa çevrilmiş şəhər həm də beynəlxalq humanitar hüququn kobud şəkildə pozulmasının canlı sübutudur. Mülki əhaliyə məxsus obyektlərin qəsdən dağıdılması, yaşayış məkanlarının viran edilməsi və şəhər infrastrukturunun sıradan çıxarılması müharibə qaydalarına ziddir. Xocalıda baş verənlər münaqişə dövründə mülki əhalinin necə sistemli şəkildə hədəfə alındığını açıq şəkildə nümayiş etdirir.

İşğaldan sonra Xocalıda üzə çıxan mənzərə dağıntıların miqyasını daha aydın göstərdi. Tamamilə yararsız hala salınmış yaşayış sahələri, məhv edilmiş kommunikasiya xətləri və sosial obyektlər uzun illər davam edən vandalizmin nəticəsi idi. Bu mənzərə bir daha sübut etdi ki, Xocalı məqsədli şəkildə viran qoyulmuş, onun dirçəlməsi illərlə əngəllənmişdir.

Bu gün Xocalının bərpası təkcə tikinti və infrastruktur məsələsi deyil. Bu proses eyni zamanda tarixi ədalətin bərpası, kollektiv yaddaşın dirçəldilməsi və insan ləyaqətinin yenidən təsdiqidir. Xarabalığa çevrilmiş şəhərin yenidən qurulması, orada həyatın bərpa edilməsi işğalın izlərini silmək yox, əksinə, həmin izləri unutmadan gələcəyə doğru inamla addımlamaq deməkdir.

Xocalının yenidən dirçəlməsi göstərir ki, şəhərlər dağıdıla bilər, lakin xalqın yaddaşı və iradəsi məhv edilə bilməz. Bir zamanlar xarabalığa çevrilmiş Xocalı bu gün bərpa və qayıdışın rəmzinə çevrilməkdədir. Bu dirçəliş təkcə bir şəhərin deyil, bütövlükdə milli yaddaşın və tarixi ədalətin qələbəsidir.

İsa Məmmədov

YAP Babək rayon təşkilatının sədri

Paylaş:

Baxılıb: 265 dəfə