Dünyanı gözəlləşdirən varlıq

Bakı:

21 °C

43 %

4 m/s

Əlaqə

AZ RU EN

Ana səhifə / YAP xəbərləri / Dünyanı gözəlləşdirən varlıq

Dünyanı gözəlləşdirən varlıq

04.03.2026 [21:35]

8 Mart – Beynəlxalq Qadınlar Günü qadınların cəmiyyətdəki rolunun, hüquq və azadlıqlarının, habelə bəşəri dəyərlərin qorunmasındakı xidmətlərinin yüksək qiymətləndirildiyi əlamətdar gündür. Azərbaycan qadını tarix boyu zəkası, iradəsi və vətənpərvərliyi ilə seçilmiş, milli-mənəvi dəyərlərimizin qorunması və yaşadılmasında mühüm rol oynamışdır.

1918-ci ildə yaradılmış Azərbaycan Xalq Cümhuriyyəti qadınlara seçmək və seçilmək hüququ verməklə Şərqdə və müsəlman aləmində ilk demokratik təşəbbüslərdən birini reallaşdırmışdır. Bu addım Azərbaycan dövlətçiliyinin demokratik ənənələrə sadiqliyinin bariz nümunəsi olmaqla yanaşı, qadınların ictimai-siyasi proseslərdə fəal iştirakının əsasını qoymuşdur.

1920–1991-ci illərdə Azərbaycan qadını mürəkkəb, lakin şərəfli inkişaf yolu keçmişdir. Qısa müddət ərzində qadınlar arasında savadsızlıq aradan qaldırılmış, onların təhsil səviyyəsi əhəmiyyətli dərəcədə yüksəlmişdir. Qadınlar pedaqogika, tibb, mühəndislik və digər sahələrdə peşəkar fəaliyyətə başlamışlar. Yaradılmış qadın şuraları və “Azərbaycan qadını” jurnalı qadın hərəkatının inkişafında mühüm rol oynamışdır. Azərbaycan qadınları təhsil, elm və mədəniyyət sahələrində kişilərlə bərabər şəkildə layiqincə təmsil olunmuşlar.

Müstəqillik dövründə ilk Qadınlar Qurultayı 14 sentyabr 1998-ci il tarixində Bakıda, Ümummilli Lider Heydər Əliyevin təşəbbüsü ilə keçirilmişdir. Bu tarixi tədbir müstəqil Azərbaycan qadınlarının ictimai-siyasi həyatında yeni mərhələnin başlanğıcını qoymuş və dövlət qadın siyasətinin formalaşmasında mühüm rol oynamışdır.

Müstəqillik illərində qadın hüquqlarının müdafiəsi və gender bərabərliyinin təmin edilməsi dövlət siyasətinin prioritet istiqamətlərindən birinə çevrilmişdir. Qadınların ictimai, siyasi, iqtisadi və mədəni həyatda fəal iştirakını təmin etmək məqsədilə hüquqi baza daha da möhkəmləndirilmişdir.

Ümummilli Lider Heydər Əliyev tərəfindən 6 mart 2000-ci il tarixində “Azərbaycan Respublikasında dövlət qadın siyasətinin həyata keçirilməsi haqqında” Fərman imzalanmışdır. Bu sənəd qadın siyasətinin institusional əsaslarını müəyyənləşdirmiş və gender bərabərliyinin təmin olunması istiqamətində mühüm mərhələ təşkil etmişdir. Qadınların idarəetmə və qərarqəbuletmə proseslərində iştirakının artırılması dövlət siyasətinin əsas istiqamətlərindən biri kimi müəyyən edilmişdir.

Hazırda dövlət qadın siyasəti İlham Əliyev tərəfindən yeni çağırışlar və müasir yanaşmalar əsasında uğurla davam etdirilir. Qadınların rəhbər vəzifələrə irəli çəkilməsi, sosial müdafiəsinin gücləndirilməsi və sahibkarlıq fəaliyyətinə dəstək göstərilməsi bu siyasətin prioritet istiqamətləri sırasındadır.

Azərbaycan Respublikasının Konstitusiyası qadın və kişilərin bərabər hüquqlara malik olduğunu təsbit edir. Gender bərabərliyinin təmin olunması, məişət zorakılığına qarşı mübarizə və qadınların sosial müdafiəsinin gücləndirilməsi istiqamətində bir sıra qanunvericilik aktları və dövlət proqramları qəbul edilmişdir. Qadın hüquqlarının müdafiəsi həm milli qanunvericilik, həm də beynəlxalq konvensiyalar çərçivəsində təmin olunur.

Bu gün Azərbaycan qadınları ictimai-siyasi həyatın bütün sahələrində fəal iştirak edirlər. Onlar elm, təhsil, səhiyyə, mədəniyyət, biznes və dövlət idarəçiliyi sahələrində mühüm nailiyyətlər əldə edirlər. Fəal vətəndaşlıq mövqeyi nümayiş etdirən Azərbaycan qadını cəmiyyətin inkişafında aparıcı qüvvələrdən birinə çevrilmişdir.

Azərbaycan Respublikasının Milli Məclisində qadın deputatların sayının artması qadınların qanunvericilik prosesində və dövlət idarəçiliyində rolunun gücləndiyini göstərir.

“Güclü Cəmiyyətin Zərif Simaları” layihəsi qadınların cəmiyyətdəki rolunun təbliği, onların uğur hekayələrinin ictimaiyyətə çatdırılması və gənc nəslə nümunə kimi təqdim edilməsi baxımından mühüm əhəmiyyət kəsb edir. Bu kimi təşəbbüslər qadın həmrəyliyinin və sosial fəallığın artırılmasına xidmət edir.

Azərbaycan tarixində qadınlar dövlətçilik, mədəniyyət və ədəbiyyat sahələrində mühüm iz qoymuşlar. Onlar həm ailə institutunun qoruyucusu, həm də ictimai həyatın fəal iştirakçısı kimi çıxış etmişlər. Maariflənmə prosesində fəal iştirak edən qadınlarımız milli dəyərlərə sadiq qalaraq ana dilimizin, mədəniyyətimizin və mənəviyyatımızın qorunub saxlanılmasında əvəzsiz rol oynamışlar.

Ölkənin Birinci vitse-prezidenti Mehriban Əliyeva Azərbaycan qadınının müasir simasını təcəssüm etdirir. Onun təşəbbüsü ilə həyata keçirilən sosial, humanitar və mədəni layihələr ölkənin beynəlxalq nüfuzunun artmasına və “yumşaq güc” siyasətinin möhkəmlənməsinə töhfə verir.

Gender bərabərliyi siyasəti qadın və kişilər üçün bərabər imkanların yaradılmasını təmin edir. Azərbaycan qadınının ölkənin sosial-iqtisadi, mədəni və siyasi inkişafında mühüm və danılmaz payı vardır. Onların fəaliyyəti dövlət quruculuğunun, vətəndaş cəmiyyətinin və milli həmrəyliyin möhkəmlənməsinə xidmət edir.

8 Mart – Beynəlxalq Qadınlar Günü münasibətilə bütün Azərbaycan qadınlarını təbrik edir, onlara möhkəm cansağlığı, ailə səadəti və yeni nailiyyətlər arzulayırıq. Azərbaycan qadını daim yüksək dəyərlərin, humanizmin və tərəqqinin simvolu olaraq qalacaqdır.

Kənan Quliyev

YAP Laçın rayon təşkilatının məsləhətçisi

Paylaş:

Baxılıb: 255 dəfə