Dövlət qayğısı, idman siyasəti və gələcək nəsillərin formalaşması

Bakı:

15 °C

72 %

6 m/s

Əlaqə

AZ RU EN

Ana səhifə / YAP xəbərləri / Dövlət qayğısı, idman siyasəti və gələcək nəsillərin formalaşması

Dövlət qayğısı, idman siyasəti və gələcək nəsillərin formalaşması

01.05.2026 [20:40]

Müasir dövrdə idman yalnız fiziki inkişaf vasitəsi deyil, həm də dövlətin beynəlxalq imicinin formalaşmasında, milli birliyin möhkəmləndirilməsində və gənc nəslin sağlam ruhda yetişdirilməsində mühüm strateji sahələrdən biri kimi çıxış edir. Azərbaycanda idman siyasətinin məqsədyönlü və sistemli şəkildə həyata keçirilməsi bu sahənin dövlət prioritetləri sırasında xüsusi yer tutduğunu aydın şəkildə nümayiş etdirir. Bu siyasətin əsasını isə dövlət qayğısı, güclü infrastruktur və insan kapitalına verilən dəyər təşkil edir.

Azərbaycan Respublikasının Prezidenti İlham Əliyev tərəfindən çempion idmançılarla keçirilən görüşlər idman sahəsinə göstərilən diqqətin bariz nümunəsidir. Bu cür görüşlər təkcə idmançıların uğurlarının qiymətləndirilməsi deyil, həm də gələcək hədəflərin müəyyənləşdirilməsi baxımından mühüm əhəmiyyət kəsb edir. Dövlət başçısı çıxışlarında dəfələrlə vurğulayıb ki, Azərbaycan idmançıları beynəlxalq arenalarda ölkəni layiqincə təmsil edir, müxtəlif nüfuzlu yarışlarda yüksək nəticələr əldə edərək dövlət bayrağını zirvələrə qaldırırlar.

İdman sahəsində qazanılan uğurların arxasında sistemli dövlət siyasəti dayanır. Bu siyasət ilk növbədə geniş və müasir idman infrastrukturunun yaradılmasını əhatə edir. Son illərdə paytaxtla yanaşı, regionlarda da Olimpiya idman komplekslərinin, müasir stadionların, ixtisaslaşmış idman zallarının tikilib istifadəyə verilməsi gənclərin idmana cəlb olunmasında mühüm rol oynayır. Bu infrastruktur yalnız peşəkar idmançıların yetişdirilməsinə deyil, eyni zamanda kütləvi idmanın inkişafına xidmət edir. Beləliklə, sağlam həyat tərzinin təşviqi dövlət siyasətinin əsas istiqamətlərindən birinə çevrilmişdir.

Azərbaycanın beynəlxalq idman məkanında mövqeyinin güclənməsində ölkədə keçirilən nüfuzlu yarışların rolu da böyükdür. Müxtəlif dünya və Avropa çempionatlarının, eləcə də digər beynəlxalq turnirlərin Azərbaycanda təşkili ölkənin idman potensialını nümayiş etdirməklə yanaşı, onun təşkilatçılıq imkanlarını da dünyaya təqdim edir. Bu tədbirlər həm də gənclər arasında idmana marağın artmasına, yeni istedadların üzə çıxmasına zəmin yaradır.

Xüsusilə güləş idman növü Azərbaycanda ənənəvi və uğurlu sahələrdən biri kimi seçilir. Yunan-Roma, sərbəst və qadın güləşi üzrə əldə olunan nailiyyətlər ölkədə idmanın kompleks inkişaf modelinin uğurla tətbiq olunduğunu göstərir. Son illərdə qadın güləşçilərin beynəlxalq yarışlarda qazandıqları medallar bu sahəyə marağın artdığını, gender bərabərliyinin idmanda da öz əksini tapdığını sübut edir. Bu, eyni zamanda cəmiyyətin inkişaf səviyyəsinin və müasir dəyərlərə açıq olmasının göstəricisidir.

İdman yalnız fiziki güc və texniki bacarıq deyil, həm də mənəvi keyfiyyətlər deməkdir. Azərbaycan idmançıları öz davranışları, vətənpərvərlik ruhu və nümunəvi həyat tərzi ilə gənclər üçün örnək rolunu oynayırlar. Onların qazandıqları uğurlar gənc nəslin motivasiyasını artırır, ölkəyə bağlılıq hissini gücləndirir və sağlam rəqabət mühitinin formalaşmasına töhfə verir. Bu baxımdan idmançıların cəmiyyətdəki rolu yalnız yarış meydanları ilə məhdudlaşmır, onlar həm də milli-mənəvi dəyərlərin daşıyıcıları kimi çıxış edirlər.

Dövlət qayğısı idmançıların sosial rifahının yaxşılaşdırılmasında da özünü göstərir. Mükafatlandırma sistemi, fəxri adların verilməsi, maddi və mənəvi dəstək idmançıların daha yüksək nəticələr əldə etməsinə stimul yaradır. Bu yanaşma idmanın davamlı inkişafını təmin etməklə yanaşı, yeni nəsil idmançıların yetişməsinə də müsbət təsir göstərir.

Azərbaycanda həyata keçirilən idman siyasəti strateji baxımdan düzgün qurulmuş və davamlı inkişaf prinsiplərinə əsaslanır. Dövlət başçısının bu sahəyə göstərdiyi diqqət və qayğı idmanın ölkədə prioritet istiqamətlərdən biri olduğunu bir daha təsdiqləyir. Qazanılan uğurların ardıcıl xarakter alması, beynəlxalq arenada əldə olunan nailiyyətlərin artması və gənc nəslin idmana artan marağı gələcəkdə Azərbaycanın idman sahəsində daha böyük zirvələr fəth edəcəyinə əminlik yaradır.

Şamo Qasımov

Yeni Azərbaycan Partiyası Laçın rayon təşkilatının sədr müavini

Paylaş:

Baxılıb: 102 dəfə