15 İyun – Milli Qurtuluş Günü: Azərbaycanın xilası və dövlətçilik tarixində dönüş nöqtəsi

Bakı:

25 °C

53 %

1 m/s

Əlaqə

AZ RU EN

Ana səhifə / YAP xəbərləri / 15 İyun – Milli Qurtuluş Günü: Azərbaycanın xilası və dövlətçilik tarixində dönüş nöqtəsi

15 İyun – Milli Qurtuluş Günü: Azərbaycanın xilası və dövlətçilik tarixində dönüş nöqtəsi

11.06.2026 [16:09]

Azərbaycan xalqının müasir tarixində xüsusi yer tutan 15 İyun – Milli Qurtuluş Günü ölkəmizin müstəqilliyinin qorunub saxlanılması, dövlətçiliyimizin möhkəmləndirilməsi və gələcək inkişafının əsasının qoyulması baxımından taleyüklü bir tarixdir. Bu gün Azərbaycan xalqının Ümummilli Lideri Heydər Əliyevin hakimiyyətə qayıdışı ilə ölkənin üzləşdiyi ağır siyasi, iqtisadi və sosial böhrandan xilas olmasının rəmzi kimi qeyd olunur.

1991-ci ildə dövlət müstəqilliyini bərpa edən Azərbaycan qısa müddət sonra ciddi daxili və xarici təhdidlərlə üz-üzə qaldı. Ölkədə siyasi qeyri-sabitlik hökm sürür, hakimiyyət böhranı dərinləşir, iqtisadi vəziyyət ağırlaşırdı. Ermənistanın Azərbaycana qarşı hərbi təcavüzü nəticəsində torpaqlarımız işğal olunur, cəbhədə vəziyyət daha da gərginləşirdi. Bütün bunlar ölkəni vətəndaş qarşıdurması və dövlət müstəqilliyinin itirilməsi təhlükəsi ilə üz-üzə qoymuşdu.

Belə mürəkkəb bir şəraitdə xalqın təkidli tələbi ilə Naxçıvanda yaşayan Heydər Əliyev Bakıya dəvət edildi. 1993-cü il iyunun 15-də Heydər Əliyev Azərbaycan Respublikası Ali Sovetinin sədri seçildi. Bu hadisə ölkənin taleyində yeni mərhələnin başlanğıcı oldu. Azərbaycan xalqı məhz həmin gündən etibarən sabitlik, inkişaf və tərəqqi yoluna qədəm qoydu.

Milli Qurtuluş Azərbaycanın dövlət müstəqilliyinin qorunması baxımından həlledici rol oynadı. Heydər Əliyevin uzaqgörən siyasəti nəticəsində ölkədə siyasi sabitlik bərpa edildi, qanunsuz silahlı dəstələrin fəaliyyəti dayandırıldı, dövlət idarəçiliyində nizam yaradıldı. Dövlət institutlarının möhkəmləndirilməsi istiqamətində mühüm addımlar atıldı və vətəndaş həmrəyliyi təmin edildi.

Qurtuluşdan sonra həyata keçirilən islahatlar Azərbaycanın gələcək inkişafının təməlini formalaşdırdı. 1994-cü ildə imzalanan “Əsrin müqaviləsi” ölkəmizin iqtisadi yüksəlişinin başlanğıc nöqtəsinə çevrildi. Xarici investisiyaların cəlb edilməsi, beynəlxalq əlaqələrin genişləndirilməsi və bazar iqtisadiyyatına keçid prosesinin sürətləndirilməsi Azərbaycanın dünya birliyində mövqeyini gücləndirdi.

1995-ci ildə ilk milli Konstitusiyanın qəbul edilməsi, demokratik dövlət quruculuğu istiqamətində atılan addımlar və hüquqi islahatlar ölkənin müasir inkişaf modelinin formalaşmasına şərait yaratdı. Bu dövrdə Azərbaycan beynəlxalq aləmdə etibarlı tərəfdaş kimi tanınmağa başladı.

Bu gün Prezident İlham Əliyevin rəhbərliyi ilə Heydər Əliyev siyasi kursu uğurla davam etdirilir. Azərbaycanın qazandığı böyük nailiyyətlər, iqtisadi qüdrəti, beynəlxalq nüfuzu və xüsusilə 2020-ci ildə Vətən müharibəsində əldə olunan tarixi Zəfər Milli Qurtuluşun bəhrələrinin ən parlaq təzahürləridir.

15 İyun – Milli Qurtuluş Günü təkcə tarixi hadisənin ildönümü deyil, həm də Azərbaycan dövlətinin möhkəm təməllər üzərində qurulduğunu, xalqın birlik və həmrəylik sayəsində bütün çətinliklərin öhdəsindən gələ bildiyini göstərən əlamətdar gündür. Bu tarix hər bir azərbaycanlı üçün dövlətçilik, müstəqillik və milli həmrəylik rəmzidir.

Elnur Qəhrəmanov,

YAP Gədəbəy rayon təşkilatının əməkdaşı

Paylaş:

Baxılıb: 185 dəfə